കാമുകനെ സ്വന്തം വീട്ടിലേക്ക് വിളിച്ചുവരുത്തി ആറു മണിക്കൂറോളം അവിടെ ചെലവഴിച്ച യുവാവിന്റെ സ്വകാര്യ ഭാഗം ബ്ലേഡ് കൊണ്ട് മുറിച്ചുമാറ്റി യുവതി. ഉത്തര്‍പ്രദേശിലെ സന്ത് കബീര്‍ നഗര്‍ ജില്ലയിലാണ് സംഭവം. ഇരുവരും തമ്മില്‍ വഴക്കുണ്ടായെന്നും ഇതിന് പിന്നാലെയാണ് യുവതി കടുംകൈ ചെയ്തതെന്നുമാണ് പ്രാദേശിക മാദ്ധ്യമങ്ങള്‍ റിപ്പോര്‍ട്ട് ചെയ്യുന്നത്. ആറു വര്‍ഷമായി ഇരുവരും പ്രണയത്തിലായിരുന്നുവെന്ന് യുവാവിന്റെ അമ്മ പൊലീസിന് മൊഴി നല്‍കി. വികാസിനെ വീട്ടിലേക്ക് യുവതി വിളിച്ചു വരുത്തുകയായിരുന്നു എന്നും അവര്‍ ആരോപിച്ചു. യുവതി കരുതിക്കൂട്ടി മകനെ ആക്രമിക്കുകയായിരുന്നു എന്നും അവര്‍ പറഞ്ഞു.

ഖലീദാഹാദ് കോട്വാലി പ്രദേശത്തെ മുഷാര ഗ്രാമത്തിലാണ് യുവതി താമസിക്കുന്നത്. അതേ പ്രദേശത്തെ ജംഗിള്‍ കാലയില്‍ താമസിക്കുന്ന വികാസ് നിഷാദ് എന്ന 19കാരനാണ് കാമുകിയെ കാണാനായി അയല്‍ഗ്രാമത്തിലെത്തിയത്. യുവതി വിളിച്ചതനുസരിച്ചാണ് വികാസ് എത്തിയതെന്നാണ് റിപ്പോര്‍ട്ടുകളില്‍ പറയുന്നത്. കാമുകിയോടൊപ്പം ഇയാള്‍ വീട്ടില്‍ ആറു മണിക്കൂറോളം ചെലവഴിച്ചു. ഇതിനിടെ ഇരുവരും തമ്മില്‍ തര്‍ക്കമുണ്ടായെന്നും ഇതിന് പിന്നാലെ യുവതി വികാസിന്റെ സ്വകാര്യഭാഗം ബ്ലേഡ് ഉപയോഗിച്ച് മുറിക്കുകയായിരുന്നു.
രക്തത്തില്‍ കുളിച്ച നിലയിലാണ് ഇയാള്‍ തിരികെ സ്വന്തം വീട്ടിലെത്തിയത്. ഉടന്‍ തന്നെ വീട്ടുകാര്‍ ഇയാളെ ആശുപത്രിയിലെത്തിക്കുകയായിരുന്നു. മണിക്കൂറുകളോളം യുവാവിന് രക്തസ്രാവമുണ്ടായതായി റിപ്പോര്‍ട്ടുകളുണ്ട്.