സബ് ഇന്‍സ്‌പെക്ടറായി അള്‍മാറാട്ടം നടത്തിയ യുവതി പിടിയില്‍
രണ്ട് വര്‍ഷത്തോളം രാജസ്ഥാന്‍ പൊലീസ് അക്കാദമിയില്‍ സബ് ഇന്‍സ്‌പെക്ടറായി അള്‍മാറാട്ടം നടത്തിയും സോഷ്യല്‍ മീഡിയയില്‍ വീഡിയോസ് ഇടുകയും ചെയ്ത യുവതി ഒടുവില്‍ പിടിയില്‍. മോന ബുഗാലിയ എന്ന മൂളിയാണ് അറസ്റ്റിലായത്. പരീക്ഷയില്‍ പരാജയപ്പെട്ടതിന് പിന്നാലെ യുവതി വ്യാജ രേഖകളുടെ പിന്‍ബലത്തോടെയാണ് സബ് ഇന്‍സ്‌പെക്ടറായി പൊതുസമൂഹത്തിന് മുന്നില്‍ തിളങ്ങിയത്.
പൊലീസ് ഉദ്യോഗസ്ഥരുടെ വിരുന്നുകളിലും ചടങ്ങുകളിലും പങ്കെടുത്ത് ഉന്നത ഉദ്യോഗസ്ഥര്‍ക്കൊപ്പം നിന്ന് ചിത്രങ്ങളെടുക്കുകയും അത് സോഷ്യല്‍ മീഡിയയില്‍ പോസ്റ്റ് ചെയ്യുകയും ചെയ്തു. രണ്ടുവര്‍ഷത്തോളം അവര്‍ പൊലീസിനെയും നാട്ടുകാരെയും പറ്റിച്ചു. പിന്നീട് 2023ല്‍ തട്ടിപ്പ് പുറത്തായപ്പോള്‍ ഒളിവില്‍ പോയിി. രണ്ട് വര്‍ഷങ്ങള്‍ക്ക് ശേഷം രാജസ്ഥാനിലെ സിക്കാറില്‍ നിന്നാണ് യുവതിയെ പിടികൂടിയത്.
രാജസ്ഥാനിലെ നാഗൗര്‍ സ്വദേശിയാണ് മോന. പിതാവ് ട്രക്ക് ഡ്രൈവറാണ്. പൊലീസില്‍ ജോലിക്ക് കയറുക എന്നത് വലിയ സ്വപ്നമായിരുന്നു. എന്നാല്‍ 2021ല്‍ യോഗ്യത പരീക്ഷയില്‍ പരാജയപ്പെട്ടു. ശേഷം അവര്‍ 'മൂളി ദേവി' എന്ന വ്യാജ പേരില്‍ രേഖകള്‍ സൃഷ്ടിച്ച് സബ് ഇന്‍സ്‌പെക്ടറായി തിരഞ്ഞെടുത്തതായി അവകാശപ്പെടുന്ന സന്ദേശം സോഷ്യല്‍ മീഡിയയില്‍ പങ്കുവച്ചു. കൂടാതെ യൂണിഫോം അണിഞ്ഞ് കറങ്ങി നടന്നു. ചില പൊലീസ് വാട്‌സാപ്പ് ഗ്രൂപ്പിലും മോന കയറിക്കൂടി പലരുമായി സംവദിക്കുകയും ചെയ്തു. അവരെക്കുറിച്ച് ആര്‍ക്കും സംശയം തോന്നിയില്ല. പരേഡ് ഗ്രൗണ്ടില്‍ യൂണിഫോമില്‍ വരികയും സേനയിലെ പുതിയ അംഗങ്ങളുമായി പരിചയം സ്ഥാപിക്കുകയും ചെയ്തു.
ചില ട്രെയിനി സബ് ഇന്‍സ്‌പെക്ടര്‍മാര്‍ മോനയുടെ ഐഡന്റിറ്റിയെക്കുറിച്ച് സംശയം ഉന്നയിച്ചപ്പോഴാണ് കള്ളം പൊളിഞ്ഞത്. പിന്നാലെ മുതിര്‍ന്ന ഉദ്യോഗസ്ഥരെ വിവരം അറിയിക്കുകയായിരുന്നു. തുടര്‍ന്നാണ് മോന ഒളിവില്‍ പോയത്. അറസ്റ്റിന് പിന്നാലെ മോന താമസിച്ച വാടകമുറിയില്‍ പൊലീസ് പരിശോധന നടത്തി. ഏഴ് ലക്ഷം രൂപയും മൂന്ന് പ്രത്യേക പൊലീസ് യൂണിഫോമുകളും രാജസ്ഥാന്‍ പൊലീസ് അക്കാദമിയിലെ പരീക്ഷ പേപ്പറുകളും അവിടെ നിന്ന് കണ്ടെത്തി.
https://www.facebook.com/Malayalivartha
