ടെന്നിസ് താരം രാധിക യാദവിനെ (25) പിതാവ് വെടിവച്ചുകൊന്നു. ഗുരുഗ്രാമിലെ സുശാന്ത് ലോക് ഫേസ്-2ലെ വസതിയിലാണ് സംഭവം. മകള്‍ക്കുനേരെ പിതാവ് അഞ്ച് റൗണ്ട് വെടിയുതിര്‍ത്തു. മൂന്നു ബുള്ളറ്റുകള്‍ രാധികയുടെ ശരീരത്തില്‍നിന്ന് കണ്ടെടുത്തു. പരുക്കേറ്റ രാധികയെ ഉടന്‍ ആശുപത്രിയിലെത്തിച്ചെങ്കിലും രക്ഷിക്കാനായില്ല പിതാവിനെ പൊലീസ് അറസ്റ്റ് ചെയ്തു. എപ്പോഴും ഇന്‍സ്റ്റഗ്രാം റീല്‍സെടുക്കുന്ന മകളുടെ സ്വഭാവത്തില്‍ പിതാവ് അസ്വസ്ഥനായിരുന്നുവെന്നാണ് റിപ്പോര്‍ട്ട്.

രാധിക പങ്കുവച്ച ഒരു റീല്‍സിനെച്ചൊല്ലിയുള്ള തര്‍ക്കമാണ് വെടിവയ്പില്‍ കലാശിച്ചതെന്ന് ഗുരുഗ്രാം പൊലീസ് പബ്ലിക് റിലേഷന്‍സ് ഓഫിസര്‍ സന്ദീപ് കുമാര്‍ പറഞ്ഞു. സംസ്ഥാനതല ടെന്നിസ് താരമായിരുന്ന രാധിക നിരവധി മത്സരങ്ങളില്‍ വിജയിച്ചിട്ടുണ്ട്. രാജ്യാന്തര ടെന്നിസ് ഫെഡറേഷന്റെ പട്ടികയില്‍ ഡബിള്‍സ് ടെന്നിസ് കളിക്കാരില്‍ 113ാം സ്ഥാനത്താണ് രാധികയെന്ന് ടെന്നീസ്‌ഖേലോ.കോം വെബ്‌സൈറ്റ് പറയുന്നു. പിതാവ് ഉപയോഗിച്ച തോക്ക് പൊലീസ് പിടിച്ചെടുത്തിട്ടുണ്ട്.