യുവാവിനെയും 17കാരിയായ പെണ്‍കുട്ടിയെയും കാണാനില്ലെന്ന് കാണിച്ച് കുടുംബം പരാതി നല്‍കിയതിന് പിന്നാലെ യുവാവും പെണ്‍കുട്ടിയും കാട്ടികൂട്ടിയ കോലാഹലം സോഷ്യല്‍ മീഡിയയില്‍ വൈറലാണ്. ഒളിച്ചോടാന്‍ ശ്രമിച്ച ഇരുവരെയും പിടികൂടാന്‍ ശ്രമിക്കുന്നതിനിടെ പൊലീസ് ജീപ്പിന് മുകളില്‍ കയറി ബഹളം വച്ച യുവാവും പെണ്‍കുട്ടിയും അറസ്റ്റില്‍. രാജസ്ഥാനിലെ കോട്ടയില്‍ സെപ്തംബര്‍ 19നാണ് സംഭവം. റാംപുരയില്‍ വച്ച് പൊലീസ് ഇവരെ പിടികൂടാന്‍ ശ്രമിക്കുന്നതിനിടെയാണ് നാടകീയ സംഭവങ്ങള്‍ അരങ്ങേറിയത്. സംഭവം നടക്കുന്ന സമയത്ത് 22കാരനായ യുവാവ് മദ്യലഹരിയിലായിരുന്നെന്നാണ് പൊലീസ് പറയുന്നത്. പൊതുസ്ഥലത്ത് ബഹളമുണ്ടാക്കിയതിനും പ്രായപൂര്‍ത്തിയാകാത്ത പെണ്‍കുട്ടിയെ തട്ടിക്കൊണ്ടുപോയതിനും യുവാവിനെതിരെ കേസെടുത്തിട്ടുണ്ട്.

പൊലീസെത്തി ഇരുവരെയും കസ്റ്റഡിയിലെടുക്കാന്‍ ശ്രമിച്ചപ്പോഴാണ് സിനിമാസ്‌റ്റൈലില്‍ കമിതാക്കള്‍ പ്രതിരോധം തീര്‍ത്തത്. യുവാവ് കയറിയതിന് പിന്നാലെ പെണ്‍കുട്ടിയും ജീപ്പിന്റെ മുകളിലേക്ക് കയറുകയായിരുന്നു. ആള്‍ക്കാര്‍ കൂടിയതോടെ പലരും വീഡിയോ എടുത്ത് ദൃശ്യങ്ങള്‍ സമൂഹമാദ്ധ്യമങ്ങളില്‍ പ്രചപിരിപ്പിച്ചു.

ഏകദേശം പത്ത് മിനിട്ടോളം ഇവര്‍ പൊലീസുകാരെയും വഴിയാത്രക്കാരെയും തടസ്സപ്പെടുത്തി ജീപ്പിന് മുകളില്‍ കയറി മുദ്രാവാക്യം മുഴക്കുകയും ബഹളം വയ്ക്കുകയും ചെയ്തു. ഇതുകാരണം പ്രദേശത്ത് ഗതാഗതം സ്തംഭിച്ചു. ഒടുവില്‍ ഇരുവരെയും ബലം പ്രയോഗിച്ച് കീഴ്പ്പടുത്തിയാണ് പൊലീസ് സ്‌റ്റേഷനിലേക്ക് കൊണ്ടുപോയത്.