കൊല്ക്കത്തയില് കനത്ത മഴയില് റോഡിനടിയിലെ വൈദ്യുതി ലൈനില് നിന്ന് ഷോക്കേറ്റ് അഞ്ച് മരണം.... നിരവധി കടകളിലും വീടുകളിലും വെള്ളം കയറിയതിനെ തുടര്ന്ന് നൂറുകണക്കിന് ആളുകളെ മാറ്റിപ്പാര്പ്പിച്ചു , മെട്രോ സര്വീസുകള് താല്ക്കാലികമായി നിര്ത്തിവച്ചു
ജനജീവിതം ദുസഹമാക്കി പശ്ചിമബംഗാളില് ശക്തമായ മഴ. കൊല്ക്കത്തയില് കനത്ത മഴയില് റോഡിനടിയിലെ വൈദ്യുതി ലൈനില് നിന്ന് ഷോക്കേറ്റ് അഞ്ചുമരണം. മഴയത്ത് വൈദ്യുതി ലൈനില് ഉണ്ടായ കേടുപാടുകളില് നിന്നാണ് ഇവര്ക്ക് ഷോക്കേറ്റ് എന്നാണ് സൂചനകളുള്ളത്.
കനത്ത മഴയില് കൊല്ക്കത്തയിലെയും പരിസരപ്രദേശങ്ങളിലെയും താഴ്ന്ന പ്രദേശങ്ങളില് വെള്ളം കയറുകയും ചെയ്തു. നിരവധി കടകളിലും വീടുകളിലും വെള്ളം കയറിയതിനെ തുടര്ന്ന് നൂറുകണക്കിന് ആളുകളെ മാറ്റിപ്പാര്പ്പിച്ചിരിക്കുകയാണ്. കനത്ത മഴ റോഡ് വ്യോമ റെയില് ഗതാഗതത്തെ സാരമായി ബാധിച്ചു.
മഴയില് മെട്രോ സ്റ്റേഷനുകളില് വെള്ളം കയറിയതിനെ തുടര്ന്ന് മെട്രോ സര്വീസുകള് താല്ക്കാലികമായി നിര്ത്തിവച്ചു. ബംഗാള് ഉള്ക്കടലില് രൂപപ്പെട്ട ന്യൂനമര്ദ്ദത്തെ തുടര്ന്നാണ് കൊല്ക്കത്തയില് ശക്തമായ മഴ ലഭിച്ചത്. രണ്ടുദിവസം കൂടി ശക്തമായ മഴ തുടരുമെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പുള്ളത്.
അതേസമയം നാളെ മധ്യ കിഴക്കന്-വടക്കന് ബംഗാള് ഉള്ക്കടലിനു മുകളിലായി പുതിയ ന്യൂനമര്ദ്ദം കൂടി രൂപപ്പെടാന് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. അടുത്ത അഞ്ച് ദിവസം കേരളത്തില് നേരിയ ഇടത്തരം മഴയ്ക്ക് സാധ്യത
നിലവിലിപ്പോള് ഗംഗാതട പശ്ചിമ ബംഗാള്, വടക്കന് ഒഡിഷ, വടക്കു പടിഞ്ഞാറന് ബംഗാള് ഉള്ക്കടലിനും മുകളിലായി ന്യൂനമര്ദ്ദം സ്ഥിതിചെയ്യുന്നു. അടുത്ത 24 മണിക്കൂറിനുള്ളില് ഇതു ദുര്ബലമാകാന് സാധ്യതയുണ്ടെന്നാണ് പ്രവചനം. വരും ദിവസങ്ങളില് വിവിധ ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്.
https://www.facebook.com/Malayalivartha
