രാജ്യം വിട്ട മദ്യവ്യവസായി വിജയ് മല്യ സണ്‍ഡേ ഗാര്‍ഡിയനു അഭിമുഖം നല്‍കിയതായുള്ള വാര്‍ത്ത മല്യ തന്റെ ട്വിറ്റര്‍ പേജിലൂടെ നിഷേധിച്ചിരുന്നു. ഇമെയിലിലൂടെ നടത്തിയ അഭിമുഖത്തിന്റെ വിശദാംശങ്ങള്‍ സണ്‍ഡേ ഗാര്‍ഡിയന്‍ പത്രം പുറത്തുവിട്ടു. ഇമെയിലിന്റെ പൂര്‍ണ്ണ രൂപം ചുവടെ.
ഞാനൊരു ഇന്ത്യക്കാരനാണ്. നാട്ടിലേക്കു തിരിച്ചു വരണമെന്നു എനിക്ക് ആഗ്രഹമുണ്ട്. എന്നാല്‍ എന്റെ ഭാഗം വ്യക്തമാക്കാനുള്ള അവസരം കിട്ടുമെന്നു ഉറപ്പില്ല. കുറ്റവാളിയായി ഞാന്‍ ചിത്രീകരിക്കപ്പെട്ടു കഴിഞ്ഞു. തിരിച്ചു വരാനുള്ള ശരിയായ സമയം ഇതല്ലെന്നുമാണു പത്രം പുറത്തുവിട്ട അഭിമുഖത്തില്‍ മല്യ പറഞ്ഞിരിക്കുന്നത്. താന്‍ പറയുന്ന കാര്യങ്ങള്‍ വളച്ചൊടിച്ച് എഴുതരുതെന്നും അതു തെറ്റിദ്ധാരണയ്ക്കിടയാക്കുമെന്നും മല്യ പറയുന്നു. ചോദ്യത്തിന് മറുപടിയായി താന്‍ പറയുന്ന ഉത്തരങ്ങള്‍ അതേപടി കൊടുക്കണമെന്നും മല്യ മാധ്യമപ്രവര്‍ത്തകനോട് ആവശ്യപ്പെട്ടിട്ടുണ്ട്.
മുന്‍നിര മാധ്യമങ്ങളെല്ലാം തന്നെക്കുറിച്ച് നിരവധി കള്ളങ്ങള്‍ പറഞ്ഞു പരത്തുകയാണെന്നും താന്‍ ബലിയാടായി മാറിയിരിക്കുന്നുവെന്നും ഒരു ചോദ്യത്തിനു മറുപടിയായി മല്യ പറഞ്ഞു. താന്‍ ഇപ്പോള്‍ എവിടെയാണെന്നു വെളിപ്പെടുത്താന്‍ ആഗ്രഹിക്കുന്നില്ലെന്നും ഈ സമയത്ത് അതാണ് തനിക്ക് സുരക്ഷിതമെന്നും മല്യ അഭിമുഖത്തില്‍ വ്യക്തമാക്കിയിട്ടുണ്ട്.
അതേസമയം, താന്‍ അഭിമുഖം നല്‍കിയതായുള്ള പത്രത്തിന്റെ അവകാശവാദം തന്നെ ഞെട്ടിച്ചുവെന്നും ഒരു മാധ്യമത്തിനോടും താനൊന്നും പറഞ്ഞിട്ടില്ലെന്നും മല്യ കഴിഞ്ഞദിവസം പ്രതികരിച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha