ഒളിച്ചോടി വിവാഹിതരായ കമിതാക്കള്‍ ജാര്‍ഖണ്ഡ് റാഞ്ചി അര്‍ഗോറ പൊലീസ് സ്‌റ്റേഷന്‍ ലോക്കപ്പില്‍ ജീവനൊടുക്കി. ഇരുപതുകാരനായ യുവാവും അന്യമതത്തില്‍പ്പെട്ട പ്രായപൂര്‍ത്തിയാകാത്ത പെണ്‍കുട്ടിയും തിങ്കളാഴ്ച രാത്രി വിഷം കഴിച്ചാണ് ജീവനൊടുക്കിയത്.

ഗോഡ സ്വദേശികളായ ഇരുവരുടെയും ബന്ധത്തെ പെണ്‍കുട്ടിയുടെ വീട്ടുകാര്‍ എതിര്‍ത്തിരുന്നു. അതോടെ ഒരുമാസം മുന്‍പ് ഒളിച്ചോടി രഹസ്യമായി വിവാഹം കഴിക്കുകയായിരുന്നു. പെണ്‍കുട്ടിയെ യുവാവ് തട്ടിക്കൊണ്ടു പോയതായി കാട്ടി മാതാപിതാക്കള്‍ ഗോഡ പൊലീസ് സ്‌റ്റേഷനില്‍ പരാതി നല്‍കിയതോടെ ഇരുവരും റാഞ്ചിയിലേക്ക് കടക്കുകയായിരുന്നു. ഒരുമാസമായി പൊലീസും ബന്ധുക്കളും ഇരുവര്‍ക്കുമായി തിരച്ചില്‍ നടത്തിയെങ്കിലും കണ്ടെത്താനായിരുന്നില്ല.

കമിതാക്കള്‍ റാഞ്ചിയില്‍ ഉണ്ടെന്ന സൂചന ലഭിച്ചതിനെ തുടര്‍ന്ന് ഗോഡ പൊലീസ് അര്‍ഗോറ പൊലീസിനു നല്‍കിയ വിവരത്തിന്റെ അടിസ്ഥാനത്തില്‍ ഇരുവരെയും തിങ്കളാഴ്ച വൈകിട്ട് അറസ്റ്റ് ചെയ്ത് ലോക്കപ്പിലാക്കി. സ്‌റ്റേഷനിലെ അടുത്തടുത്ത ലോക്കപ്പ് മുറികളിലാണ് പാര്‍പ്പിച്ചിരുന്നത്. രാത്രിയില്‍ ഇരുവരും വിഷം കഴിക്കുകയായിരുന്നുവെന്നു പൊലീസ് പറഞ്ഞു.

കമിതാക്കള്‍ കൈവശം വിഷം കരുതിയിരുന്നതായും മതിയായ പരിശോധന നടത്താതെയുമാണ് കമിതാക്കളെ അടുത്തടുത്ത ലോക്കപ്പ് മുറികളില്‍ അടച്ചതെന്നും റാഞ്ചി സീനിയര്‍ എസ്പി കുല്‍ദീപ് ദ്വിവേദി അറിയിച്ചു. ജോലിയില്‍ വീഴ്ച വരുത്തിയതിന്റെ പേരില്‍ മൂന്നു പൊലീസുകാരെ സസ്‌പെന്‍ഡ് ചെയ്തു. ലോക്കപ്പില്‍ വിഷം കഴിച്ചശേഷം ഏറെ കഴിഞ്ഞാണ് ഇരുവരെയും ആശുപത്രിയില്‍ എത്തിച്ചതെന്നു പറയപ്പെടുന്നു. സംഭവത്തെക്കുറിച്ച് മജിസ്‌ട്രേട്ട്തല അന്വേഷണത്തിനു സര്‍ക്കാര്‍ ഉത്തരവിട്ടു. മൃതദേഹങ്ങള്‍ പോസ്റ്റ് മോര്‍ട്ടത്തിനുശേഷം ബന്ധുക്കള്‍ക്ക് കൈമാറി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha