പ്രധാനമന്ത്രി നരേന്ദ്ര മോഡിയെ പുകഴ്ത്തി കേന്ദ്രമന്ത്രി വെങ്കയ്യ നായിഡു. പാവങ്ങളുടെ മിശിഹാ (രക്ഷകന്‍) ആണെന്നും രാജ്യത്തിനു ലഭിച്ച സമ്മാനമാണ് മോഡിയെന്ന് അദ്ദേഹം വിശേഷിപ്പിച്ചു. അദ്ദേഹം എല്ലാ മേഖലയിലും മാറ്റങ്ങള്‍ കൊണ്ടുവരാന്‍ പ്രവര്‍ത്തിക്കുകയാണ്. എല്ലാ പ്രതിസന്ധികളും തരണം ചെയ്ത് അത് നിറവേറ്റുമെന്നും നായിഡു പറഞ്ഞു. ഡല്‍ഹിയില്‍ നടന്ന പാര്‍ട്ടി ദേശീയ നിര്‍വാഹക സമിതി യോഗത്തില്‍ അവതരിപ്പിച്ച പ്രമേയത്തിലാണ് മോഡിയെ പ്രകീര്‍ത്തിച്ച് സംസാരിച്ചത്.
അതേസമയം, നായിഡുവിന്റെ പ്രസ്താവനയില്‍ വിശദീകരണവുമായി കേന്ദ്ര ആഭ്യന്തരമന്ത്രി രാജ്‌നാഥ് സിംഗും രംഗത്തെത്തി. നായിഡുവിന്റെ പരാമര്‍ശം യോഗത്തിലെ രാഷ്ട്രീയ പ്രമേയത്തിന്റെ ഭാഗമല്ലെന്നായിരുന്നു സിംഗിന്റെ പ്രസ്താവന.
പ്രതിപക്ഷത്തിന്റെ അടിസ്ഥാന രഹിതമായ ആരോപണങ്ങളില്‍ സംഭ്രമിക്കേണ്ടതില്ലെന്ന് അണികള്‍ക്ക് മോഡി നല്‍കിയ സന്ദേശത്തോടെയാണ് രണ്ടു ദിവസം നീണ്ട നിര്‍വാഹക സമിതി യോഗം ഇന്നലെ സമാപിച്ചത്. സര്‍ക്കാരിന്റെ വികസന അജണ്ടയുമായി മുന്നോട്ടുപോകുന്നതിനാണ് പ്രാഥമിക പരിഗണന നല്‍കേണ്ടത്. പാവപ്പെട്ടവരുടെയും കര്‍ഷകരുടെയും പുരോഗതിക്ക് മുന്‍തൂക്കം നല്‍കി മുന്നോട്ടുപോകണമെന്ന നിര്‍ദേശത്തോടെയാണ് യോഗം സമാപിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha