ഗുഡ്ഗാവില്‍ സ്വര്‍ണാഭരണങ്ങള്‍ കവരുന്നതിനായി വീട്ടുജോലിക്കാര്‍ വൃദ്ധയായ വീട്ടമ്മയുടെ ചെവി അറത്തെടുത്തു. വൃദ്ധയുടെ കൈവിരലുകളും ഇവര്‍ ഒടിച്ചു. കമ്മലും മോതിരവും കവരുന്നതിനായാണ് വീട്ടുജോലിക്കാര്‍ 61 കാരിയായ വൃദ്ധയോട് ഈ ക്രൂരത കാണിച്ചത്. വീട്ടില്‍ സൂക്ഷിച്ചിരുന്ന 25 ലക്ഷംരൂപയുടെ ആഭരണങ്ങളും ഇവര്‍ കവര്‍ന്നു.
തിങ്കളാഴ്ച്ചയാണ് സംഭവം നടന്നത്. കമലേഷ് ബന്‍സാല്‍ എന്ന വീട്ടമ്മയുടെ ആഭരണങ്ങളാണ് മോഷ്ടാക്കള്‍ കവര്‍ന്നത്. കമലേഷിന്റെ ഭര്‍ത്താവ് രോഗത്തെ തുടര്‍ന്ന് കിടപ്പിലാണ്. കവര്‍ച്ച നടന്ന സമയത്ത് മരുമകള്‍ രണ്ടാം നിലയിലായിരുന്നു.
ഉച്ചയോടെയാണ് സംഭവം. ബാത്ത് റൂം വരെയൊന്ന് വന്നുനോക്കു എന്ന് പറഞ്ഞാണ് ജോലിക്കാര്‍ വീട്ടമ്മയായ കമലേഷ് ബന്‍സാലിനെ വിളിച്ചത്. ബാത്ത്‌റൂമിന്റെ മുമ്പില്‍ എത്തിയതോടെ ഇവര്‍ വീട്ടമ്മയെ അകത്തേക്ക് തള്ളിയ ശേഷം വായില്‍ തുണി കുത്തിക്കയറ്റി. കയ്യുംകാലും തുണി ഉപയോഗിച്ച് വരിഞ്ഞുകെട്ടി. അതിനുശേഷം കമ്മല്‍ കവരുന്നതിനായി ചെവി അറുത്തെടുക്കുകയായിരുന്നു. മോതിരം കവരുന്നതിനായി ഇവര്‍ കൈ വിരലുകള്‍ ഒടിക്കുകയും ചെയ്തു.
ബന്‍സാലിന് ഡല്‍ഹി ഗ്രീന്‍ പാര്‍ക്കില്‍ ജ്വല്ലറി ഷോപ്പുണ്ട്. ഇത് ഇവരുടെ മകനായ ദ്രുവ് ആണ് നോക്കി നടത്തുന്നത്. ദ്രുവ് ജ്വല്ലറിയിലേക്ക് പോയ സമയത്താണ് കവര്‍ച്ച നടന്നത്. ബന്‍സാലിനെ ശുശ്രൂഷിക്കുന്നതിനായി അടുത്തിടെയാണ് രണ്ട് ജോലിക്കാരെ നിയമിച്ചത്. നേരത്തെ വീട്ടുജോലിക്ക് ഉണ്ടായിരുന്നയാള്‍ ശുപാര്‍ശ ചെയ്തതിനെ തുടര്‍ന്നാണ് പുതിയ വീട്ടുജോലിക്കരെ എടുത്തതെന്ന് മകന്‍ ദ്രുവ് പറയുന്നു. സാഗര്‍, ശങ്കര്‍ എന്നീ പേരുകളാണ് ഇവര്‍ വീട്ടുകാരോട് പറഞ്ഞിരുന്നത്. ബീഹാര്‍ സ്വദേശികളാണ് ഇരുവരും. എന്നാല്‍ അവര്‍ നല്‍കിയ വിവരങ്ങളില്‍ സംശയമുള്ളതായി ദ്രുവ് പറയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha