ഹൈദരാബാദില് കനയ്യയ്ക്ക് വിദ്യാര്ത്ഥികള് ഉജ്വല വരവേല്പ്പ് നല്കി
രാജ്യദ്രോഹക്കുറ്റം ആരോപിച്ച് ജയിലില് അടയ്ക്കപ്പെട്ട് മോചിതനായശേഷം ആദ്യമായി ഹൈദരാബാദില് എത്തിയ കനയ്യയെ വിദ്യാര്ഥികള് ആവേശപൂര്വം വരവേറ്റു. രോഹിത് വെമുലയുടെ ആത്മഹത്യക്ക് കാരണക്കാരാവയരെ അറസ്റ്റ് ചെയ്യണമെന്നാവശ്യപ്പെട്ട് സമരം നടത്തുന്ന വിദ്യാര്ഥികള്ക്ക് ഐക്യദാര്ഢ്യവുമായാണ് ജെഎന്യു വിദ്യാര്ഥി യൂണിയന് പ്രസിഡന്റ് കനയ്യകുമാര് എത്തിയത്. എന്നാല്, സര്വകലാശാലാ അധികൃര് വിലക്കിയതിനെ തുടര്ന്ന് കനയ്യക്ക് സമരപ്പന്തലില് എത്തി അഭിവാദ്യം ചെയ്യാനായില്ല. കനയ്യയെ ക്യാമ്പസിനകത്ത് പ്രവേശിപ്പിക്കില്ലെന്ന് അധികൃതര് നേരത്തെ വ്യക്തമാക്കിയിരുന്നു.
ക്യാമ്പസിനകത്ത് പ്രവേശിക്കാന് അനുമതി ലഭിച്ചാല്, സമരപ്പന്തലില് എത്തി സംസാരിക്കുമെന്നും അല്ലെങ്കില് ക്യാമ്പസിന് വെളിയില് വിദ്യാര്ഥികളെ അഭിസംബോധന ചെയ്യുമെന്നും വിമാനത്താവളത്തില് മാധ്യമപ്രവര്ത്തകരോട് സംസാരിക്കവെ കനയ്യ വ്യക്തമാക്കിയിരുന്നു. സര്വകലാശാലാ ഗേറ്റില് സുരക്ഷാവിഭാഗം കനയ്യയെ തടഞ്ഞു. വിദ്യാര്ഥികള് ക്ഷണിച്ചിട്ടാണ് താന് എത്തിയതെന്ന് കനയ്യ വിശദീകരിച്ചു. വിസി പ്രവേശന അനുമതി നിഷേധിച്ചതിനാല് അകത്ത് പ്രവേശിപ്പിക്കാനാകില്ലെന്ന് സുരക്ഷാജീവനക്കാര് അറിയിച്ചു. തുടര്ന്ന് ഗേറ്റിന് സമീപം അഭിവാദ്യങ്ങളുമായെത്തിയ വിദ്യാര്ഥികളോട് കനയ്യ സംസാരിച്ചു.
സാമൂഹ്യനീതി ഉറപ്പാക്കാനുള്ള പോരാട്ടമാണ് ഹൈദരാബാദ് സര്വകലാശാലയില് നടക്കുന്നതെന്ന് കനയ്യ പറഞ്ഞു. എത്ര രോഹിതുമാരെയാണ് ഭരണവര്ഗം കൊന്നതെന്നും കനയ്യ ഹ്രസ്വമായ പ്രസംഗത്തില് ചോദിച്ചു. പിന്നീട് രോഹിത് വെമുലയുടെ അമ്മ രാധിക വെമുലയുമായും സഹോദരനുമായും കനയ്യ കൂടിക്കാഴ്ച നടത്തി. കനയ്യ ക്യാമ്പസില് എത്തുന്ന സാഹചര്യത്തില് സര്വകലാശാലയുടെ മുഴുവന് ഗേറ്റുകളും സര്വകലാശാല അടച്ചിട്ടു. കഴിഞ്ഞദിവസം അവധി കഴിഞ്ഞെത്തിയ വിസി അപ്പാവാറുവിന്റെ വസതിക്ക് മുന്നില് വിദ്യാര്ഥികള് സമരം നടത്തിയിരുന്നു.
സമാധാനപൂര്ണമായി നടന്ന സമരത്തെ പൊലീസ് തല്ലിച്ചതയ്ക്കുകയായിരുന്നു. ഈ സാഹചര്യത്തിലാണ് എല്ലാ ഗേറ്റുകളും അടച്ചിടാന് വിസിയുടെ ഓഫീസ് ഉത്തരവിറക്കിയത്. കഴിഞ്ഞദിവസത്തെ ലാത്തിച്ചാര്ജില് പരിക്കേറ്റ 44 വിദ്യാര്ഥികളെ ആശുപത്രിയില് പ്രവേശിപ്പിച്ചു. ഗുരുതരമായി പരിക്കേറ്റ 10 വിദ്യാര്ഥികളെ സ്വകാര്യ ആശുപത്രികളിലും പ്രവേശിപ്പിച്ചു. സമാധാനപരമായി പ്രതിഷേധിച്ച വിദ്യാര്ഥികളെ തല്ലിച്ചതച്ച അധികൃതരുടെയും സര്ക്കാരിന്റെയും നിലപാടില് വിദ്യാര്ഥി യൂണിയന് പ്രതിഷേധിച്ചു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
