സിയാച്ചിനിലുണ്ടായ ഹിമപാതത്തില്‍ കാണാതായ രണ്ടാമത്തെ സൈനികനും മരിച്ചു. കാണാതായ റൈഫിള്‍മാന്‍ സുനില്‍ റായ് യുടെ മൃതദേഹം സൈന്യം കണ്ടെത്തി. മാര്‍ച്ച് 25നുണ്ടായ ഹിമപാതത്തില്‍ സുനില്‍ റായും ലാന്‍സ് ഹവില്‍ധാര്‍ ഭവന്‍ തമാങും മഞ്ഞില്‍ അകപ്പെടുകയായിരുന്നു.

വെള്ളിയാഴ്ച രാവിലെ ജമ്മു കാശ്മീരിലെ സിയാചിന്‍ മലനിരകളിലെ തുര്‍തുക്കില്‍ ഉണ്ടായ ഹിമപാതത്തിലാണ് റൈഫിള്‍മാന്‍ സുനില്‍ റായ് യും ലാന്‍സ് ഹവില്‍ധാര്‍ ഭവന്‍ തമാങും അപകടത്തില്‍ പെടുന്നത്. സംഭവസമയം ഇരുവരും പ്രദേശത്ത് പട്രോളിങ് നടത്തുകയായിരുന്നു. ഉടനെ ആരംഭിച്ച രക്ഷാപ്രവര്‍ത്തനത്തിനിടെ ലാന്‍സ് ഹവില്‍ധാര്‍ ഭവന്‍ തമാങ്‌നെ പുറത്തെടുത്തിരുന്നു. ഗുരുതരമായി പരിക്കേറ്റ ഇദ്ദേഹത്തെ ഉടനെ സൈനിക ആശുപത്രിയിലെത്തിച്ചെങ്കിലും മരിച്ചു.
സുനില്‍ റായിക്കുവേണ്ടിയുള്ള തിരച്ചില്‍ തുടരുന്നതിനിടെയാണ് ജവാന്റെ മൃതദേഹം സൈന്യം കണ്ടെടുത്തത്. മഞ്ഞുകൂനയ്ക്കകത്തു നിന്നു പുറത്തെടുക്കും മുന്‍പേ സുനില്‍ റായ് മരിച്ചിരുന്നു. ആശുപത്രിയില്‍ മരിച്ച സൈനികന്റെ മൃതദേഹം പൂര്‍ണ സൈനിക ബഹുമതികളോടെ സംസ്‌കരിച്ചു. ഉത്തരേന്ത്യയിലെ പര്‍വ്വത പ്രദേശങ്ങളില്‍ തുടരുന്ന മോശം കാലാവസ്ഥയാണ് തുടര്‍ച്ചയായുള്ള അപകടങ്ങള്‍ക്ക് കാരണം. ജമ്മു കാശ്മീരിലെ ഉയര്‍ന്ന മേഖലകളില്‍ ഹിമപാതമുണ്ടാകാനുള്ള സാധ്യതയുണ്ടെന്ന മുന്നറിയിപ്പിനെ തുടര്‍ന്ന് വെള്ളിയാഴ്ച്ച രാവിലെ 5 മണി മുതല്‍ പ്രദേശത്ത് അപകട സൂചന നല്‍കിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha