പത്താന്കോട് ആക്രമണം നടത്തിയ നാലു ഭീകരരുടെ പേരുകള് പാക് സംഘത്തിനു കൈമാറി
പത്താന്കോട് വ്യോമസേന താവളത്തില് ആക്രമണം നടത്തിയ നാലു ഭീകരരുടെ പേരുകള് എന്ഐഎ പാക്കിസ്ഥാന് അന്വേഷണ സംഘത്തിനു കൈമാറി. പാക് പൗരന്മാരായ നസീര് ഹുസൈന്, ഫാഫിസ് അബൂബക്കര്, ഉമര് ഫാറൂഖ്, അബ്ദുള് ഖയാം എന്നിവരുടെ പേരുകളാണ് കൈമാറിയത്. പാക്കിസ്ഥാനിലെ പഞ്ചാബ്, സിന്ധ് പ്രവിശ്യകളില് നിന്നുള്ളവരാണ് ഇവര്. ഡിഎന്എ പരിശോധനയ്ക്കായി ഇവരുടെ ബന്ധുക്കളുടെ വിവരങ്ങള് കൈമാറണമെന്നും എന്ഐഎ ആവശ്യപ്പെട്ടു.
ജയ്ഷ്-ഇ- മുഹമ്മദ് തലവന് മസൂദ് അസ്ഹറിനെ ചോദ്യം ചെയ്യാന് അവസരം ഒരുക്കണമെന്നും ഇന്ത്യ ആവശ്യമുന്നയിച്ചു. പഞ്ചാബ് പ്രവിശ്യയില് നിന്നുള്ള കാശിഷ് ജാന്, ശഹീദ് ലത്തീഫ് എന്നിവരാണ് ആക്രമണം നടത്തിയ സംഘത്തെ നയിച്ചതെന്നും ഇന്ത്യ അറിയിച്ചു. കൊല്ലപ്പെട്ട ഭീകരരില് നിന്നും ലഭിച്ച തെളിവുകളുടെ അടിസ്ഥാനത്തിലാണ് ഇന്ത്യ ഇക്കാര്യം സ്ഥിരീകരിച്ചത്. ഡല്ഹിയില് പാക് അന്വേഷണ സംഘവുമായി ചര്ച്ച നടത്തിയ എന്ഐഎ പത്താന് കോട് ആക്രമണത്തില് ഭീകരസംഘടന ജയ്ഷ്-ഇ- മുഹമ്മദിന്റെ പങ്ക് തെളിയിക്കുന്ന വിവരങ്ങളും കൈമാറിയിരുന്നു
പത്താന്കോട് വ്യോമസേനാ താവളത്തിലെ ഭീകരാക്രമണത്തെക്കുറിച്ച് കഴിഞ്ഞ മൂന്നു ദിവസമായി പാക് അന്വേഷണ സംഘം തെളിവെടുപ്പ് നടത്തിവരികയാണ്. പഞ്ചാബ് പോലീസ് എസ്.പി സല്വീന്ദര് സിംഗിനെയും സാക്ഷികളേയും അഞ്ചംഗ പാക് സംഘം ഇന്നു ചോദ്യം ചെയ്തേക്കും. സല്വീന്ദര് സിംഗിന്റെ ഔദ്യോഗിക വാഹനം തട്ടിയെടുത്താണു തീവ്രവാദികള് പത്താന്കോട്ട് എത്തിയത്.
പത്താന്കോട് വ്യോമസേനാ താവളത്തില് ഭീകരാക്രമണം നടന്ന സ്ഥലങ്ങള് കഴിഞ്ഞ ദിവസം പാക് സംഘം സന്ദര്ശിച്ചിരുന്നു. വ്യോമസേനാ താവളത്തിന്റെ പിന്വശത്തുകൂടിയാണ് ഇവരെ സ്ഥലത്തെത്തിച്ചത്. വ്യോമതാവളത്തിലെ എല്ലായിടത്തും പരിശോധന നടത്താന് പാക് സംഘത്തിന് അനുമതി നല്കില്ലെന്ന് പ്രതിരോധമന്ത്രി മനോഹര് പരീക്കര് വ്യക്തമാക്കിയിരുന്നു. തെരഞ്ഞെടുത്ത സ്ഥലങ്ങളില് എന്ഐഎ ഉദ്യോഗസ്ഥരുടെ സാന്നിധ്യത്തിലാണ് പാക്കിസ്ഥാനില് നിന്നെത്തിയ ഐഎസ്ഐ ഉദ്യോഗസ്ഥന് അടക്കമുള്ള സംഘം പരിശോധന നടത്തിയത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
