ആസാമില്‍ 61 നിയമസഭാമണ്ഡലങ്ങളിലും പശ്ചിമബംഗാളില്‍ 31 മണ്ഡലങ്ങളിലും ഇന്നു വോട്ടെടുപ്പ്. ആസാമില്‍ നാലാംവട്ടം ഭരണത്തിലേറുമെന്ന പ്രതീക്ഷയുള്ള കോണ്‍ഗ്രസ് മുഖ്യമന്ത്രി തരുണ്‍ ഗോഗോയിക്ക് ബിജെപി-എജിപി-ബിപിഎഫ് സഖ്യത്തെയാണു പരാജയപ്പെടുത്തേണ്ടത്. ബംഗ്ലാദേശില്‍നിന്നുള്ള നുഴഞ്ഞുകയറ്റമാണ് ആസാം നേരിടുന്ന പ്രധാന പ്രശ്‌നം. ഇതാണു പ്രതിപക്ഷത്തിന്റെ ആയുധവും.രണ്ടാംഘട്ടത്തില്‍ 57 സീറ്റിലാണ് കോണ്‍ഗ്രസ് മത്സരിക്കുന്നത്. പ്രതിപക്ഷമായ എഐയുഡിഎഫ് 47സീറ്റിലും ബിജെപി 35 സീറ്റിലും മാറ്റുരയ്ക്കുന്നു. ബോഡോ പീപ്പിള്‍സ് ഫ്രണ്ട്, ആസാം ഗണപരിഷത് എന്നീ പാര്‍ട്ടികള്‍ യഥാക്രമം 10, 19സീറ്റുകളിലും സിപിഎം ഒമ്പത് സീറ്റിലും സിപിഐ അഞ്ചു സീറ്റിലും ജനവിധി തേടുന്നു. 214 സ്വതന്ത്രരാണു മത്സരംഗത്തുള്ളത്.കോണ്‍ഗ്രസ് മന്ത്രിമാരായ രകിബുല്‍ ഹുസൈന്‍, ചന്ദന്‍ സര്‍ക്കാര്‍, നസ്‌റുള്‍ ഇസ്‌ലാം എന്നിവരും എജിപിയുടെ മുന്‍ മുഖ്യമന്ത്രി പ്രഫുല്ല മഹന്ത, എഐയുഡിഎഫ് അധ്യക്ഷനും ധുബ്രി എംപിയുമായ ബദ്‌റുദീന്‍ അജ്മല്‍,മുഖ്യമന്ത്രിക്കെതിരേ കലാപമുയര്‍ത്തി ബിജെപിയില്‍ ചേര്‍ന്ന കോണ്‍ഗ്രസ് മുന്‍ മന്ത്രി ഹിമന്ത വിശ്വാസ ശര്‍മ എന്നിവരുമാണ് മത്സരരംഗത്തെ പ്രമുഖര്‍. ആക്രമണഭീഷണിയുടെ പശ്ചാത്തലത്തില്‍ നാലു ബോഡോലാന്‍ഡ് ടെറിട്ടോറിയല്‍ ജില്ലകളില്‍ കനത്ത സുരക്ഷയിലാണു പോളിംഗ് നടക്കുക.പശ്ചിമബംഗാളില്‍ വെസ്റ്റ് മിഡ്‌നാപുര്‍, ബന്‍കുര, ബര്‍ദ്വാന്‍ ജില്ലകളിലെ 163സ്ഥാനാര്‍ഥികളുടെ വിധി ഇന്നറിയാം. 21 വനിതകളും മത്സരരംഗത്തുണ്ട്. മുഖ്യമന്ത്രി മമതാ ബാനര്‍ജിയുടെ തൃണമൂല്‍ കോണ്‍ഗ്രസ്,ഇടത്-കോണ്‍ഗ്രസ് സംയുക്ത മുന്നണി, ബിജെപി എന്നിവര്‍ തമ്മിലാണു മത്സരം. 8,465 പോളിംഗ് ബൂത്തുകളിലെത്തുന്ന 70 ലക്ഷം വോട്ടര്‍മാരാണ് വിധി നിര്‍ണയിക്കുന്നത്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha