വീട്ടുകാര്‍ നിശ്ചയിച്ച വിവാഹത്തില്‍ നിന്നു തന്നെ രക്ഷിച്ച്, പഠനം തുടരാന്‍ സഹായിക്കണമെന്ന് പതിനേഴുകാരിയുടെ അഭ്യര്‍ഥന. ഗാന്ധിനഗറില്‍ നിന്ന് 10 കിലോമീറ്റര്‍ അകലെ കോലാവഡ ഗ്രാമത്തില്‍ നിന്നുള്ള പതിനേഴുകാരിയാണ് സ്ത്രീകള്‍ക്കുവേണ്ടിയുള്ള അഭയം ഹെല്‍പ്‌ലൈനായ 181ല്‍ വിളിച്ച് പഠനം തുടരാന്‍ തന്നെ സഹായിക്കണമെന്ന് ആവശ്യപ്പെട്ടത്. പത്താം ക്ലാസില്‍ 88.11% വിജയം നേടിയ പെണ്‍കുട്ടിയെ തുടര്‍ന്നു പഠിക്കാന്‍ വീട്ടുകാര്‍ അനുവദിച്ചിരുന്നില്ല. എതിര്‍പ്പുകള്‍ക്കിടയിലും സ്വപ്രയത്‌നത്തിലൂടെ 2017ലെ പന്ത്രണ്ടാം ക്ലാസ് പരീക്ഷയ്ക്കു തയാറെടുക്കവെയാണ് വീട്ടുകാര്‍ പെണ്‍കുട്ടിയുടെ വിവാഹം നിശ്ചയിച്ചത്. ഇതില്‍ നിന്ന് രക്ഷിച്ച് പഠനം പൂര്‍ത്തീകരിക്കാന്‍ തന്നെ സഹായിക്കണമെന്നാണ് പെണ്‍കുട്ടിയുടെ അഭ്യര്‍ഥന.

1999 ജൂണില്‍ ജനിച്ച പെണ്‍കുട്ടിക്ക് പ്രായപൂര്‍ത്തിയാകുന്നതിനു മുന്‍പ് ഏപ്രില്‍ 18ന് വിവാഹം നടത്താനായിരുന്നു വീട്ടുകാരുടെ പദ്ധതി. എന്നാല്‍ പെണ്‍കുട്ടി അതിനു തയ്യാറായില്ല. ക്ഷണക്കത്ത് അടിച്ച് വീട്ടുകാര്‍ കല്യാണത്തിനുള്ള ഒരുക്കങ്ങളും തുടങ്ങി. തുടര്‍ന്നു പഠിക്കണമെന്ന് വാശിപിടിച്ച കുട്ടിയുടെ ആവശ്യം വീട്ടുകാര്‍ നിഷേധിച്ചതോടെ അവസാന ശ്രമമെന്ന നിലയിലാണ് പെണ്‍കുട്ടി അഭയത്തിലേക്കു വിളിച്ചത്. തനിക്ക് വീട്ടുകാര്‍ക്കൊപ്പം താമസിക്കേണ്ടെന്നും പെണ്‍കുട്ടി നിലപാട് എടുത്തു.

അഭയത്തില്‍ നിന്നുള്ള കൗണ്‍സിലര്‍മാരും വനിതാ പൊലീസുകാരും വീട്ടിലെത്തി അന്വേഷിച്ചപ്പോള്‍ കുടുംബാംഗങ്ങള്‍ സംഭവം നിഷേധിച്ചു. എന്നാല്‍ പെണ്‍കുട്ടിയെ ഒറ്റയ്ക്കു മാറ്റിനിര്‍ത്തി ചോദിച്ചപ്പോള്‍ അവള്‍ കരഞ്ഞുകൊണ്ട് പത്താം ക്ലാസിലെ സര്‍ട്ടിഫിക്കറ്റ് കാട്ടുകയായിരുന്നു. തുടര്‍ന്ന് പൊലീസ് ശൈശവ വിവാഹം നടത്തിയാലുണ്ടാകുന്ന ഭവിഷ്യത്തുകളെക്കുറിച്ച് പെണ്‍കുട്ടിയുടെ കുടുംബാംഗങ്ങളെ പറഞ്ഞു മനസിലാക്കി. എന്നാല്‍ മാതാപിതാക്കള്‍ക്കൊപ്പം താമസിക്കില്ലെന്നു വ്യക്തമാക്കിയ പെണ്‍കുട്ടി അമ്മാവനൊപ്പം താമസിക്കാമെന്നു സമ്മതിച്ചു. കൂടാതെ, മകളെ അവളുടെ താല്‍പര്യത്തിനു വിരുദ്ധമായി വിവാഹം കഴിപ്പിച്ച് അയയ്ക്കില്ലെന്ന് സ്റ്റാംപ് പേപ്പറില്‍ മാതാപിതാക്കള്‍ ഒപ്പിട്ടു നല്‍കുകയും ചെയ്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha