രാജ്യത്ത് ചൂട് കനക്കുന്നു. മിക്ക സംസ്ഥാനങ്ങളിലും ചൂട് താങ്ങാവുന്നതിനും അപ്പുറമാണ്. കഴിഞ്ഞ അഞ്ചു വര്‍ഷത്തിനിടയിലെ ഏറ്റവും കനത്ത ചൂട് അനുഭവപ്പെട്ട ഏപ്രില്‍ മാസമാണിതെന്ന് കാലാവസ്ഥാ നിരീക്ഷണ കേന്ദ്രം വിലയിരുത്തുന്നു. ചൂട് കൂടിയതോടെ ഒഡിഷയില്‍ കഴിഞ്ഞ ഒരാഴ്ചയ്ക്കിടെ മാത്രം 30 പേര്‍ മരിച്ചു. കനത്ത ചൂടില്‍ സൂര്യതാപമേറ്റ് ചികിത്സ തേടിയവരും കുറവല്ല.
ഒഡിഷയില്‍ ഏറ്റവും അധികം ചൂട് അനുഭവപ്പെടുന്നത് പടിഞ്ഞാറന്‍ ജില്ലയായ ബോലഗിറിലെ ടിടിലാഗഡിലാണ്. 45 ഡിഗ്രി സെല്‍ഷ്യസ് ചൂടാണ് ഇന്നലെ ഇവിടെ രേഖപ്പെടുത്തിയത്. ഭവാനിപട്‌ന(43.5), മാല്‍ക്കഗിരി(43.3), താല്‍ചര്‍(43.6), ബോലഗിര്‍(43) എന്നിവിടങ്ങളില്‍ രേഖപ്പെടുത്തിയ താപനിലയും കുറവല്ല. തലസ്ഥാന നഗരിയായ ഭുവനേശ്വറില്‍ റെക്കോര്‍ഡ് താപനിലയായ 45 ഡിഗ്രി സെല്‍ഷ്യസ് കഴിഞ്ഞ ദിവസം രേഖപ്പെടുത്തിയിരുന്നു. 42.2 ഡിഗ്രി സെല്‍ഷ്യസ് താപനിലയാണ് ഇന്നലെ ഇവിടെ രേഖപ്പെടുത്തിയത്.
ഏറ്റവും അധികം മരണം രേഖപ്പെടുത്തിയത് ഖോര്‍ദ മേഖലയിലാണ്. അഞ്ചിലധികം ആളുകള്‍ കഴിഞ്ഞ ഒരാഴ്ചയ്ക്കിടെ ഇവിടെ മരിച്ചു. കുറ്റക് ജില്ലയില്‍ നാലും അന്‍ഗുല്‍ ജില്ലയില്‍ മൂന്നും ആളുകള്‍ കഴിഞ്ഞ ദിവസങ്ങളിലായി മരിച്ചു. ബാലസോര്‍, ഗഞ്ചം, നയാഗ്ര എന്നിവിടങ്ങളില്‍ രണ്ടു മരണങ്ങളും റിപ്പോര്‍ട്ട് ചെയ്തു. കനത്ത ചൂട് മൂലം സംസ്ഥാനത്തെ സ്‌കൂളുകള്‍ ഏപ്രില്‍ ഇരുപതോടെ പൂട്ടാന്‍ സര്‍ക്കാര്‍ ഉത്തരവിട്ടു. കുടിവെള്ളം കിട്ടാക്കനിയായിട്ടുള്ള പ്രദേശങ്ങളില്‍ വെള്ളമെത്തിക്കാന്‍ സര്‍ക്കാരിന്റെ ഭാഗത്തു നിന്നും കാര്യക്ഷമമായ പ്രവര്‍ത്തനങ്ങള്‍ ഉണ്ടായിരിക്കുമെന്നും സര്‍ക്കാര്‍ വൃത്തങ്ങള്‍ അറിയിച്ചു.
കടുത്ത ജലക്ഷാമത്തെ തുടര്‍ന്ന് ഏപ്രില്‍ കഴിഞ്ഞാല്‍ മഹാരാഷ്ട്രയില്‍ ഒറ്റ ഐ.പി.എല്‍.എല്‍ മത്സരം പോലും നടത്തരുതെന്ന് ബോംബെ ഹൈക്കോടതിയുടെ ഉത്തരവ് ഇറക്കി. മുംബൈ, പൂനെ, നാഗ്പൂര്‍ എന്നിവിടങ്ങളില്‍ നടത്തേണ്ട മത്സരം മറ്റു സംസ്ഥാനങ്ങളിലേക്ക് മാറ്റാനാണ് കോടതിയുടെ ഉത്തരവ്. ഇതോടെ മെയ് 29ന് നടക്കേണ്ട ഫൈനല്‍ ഉള്‍പ്പടെ 13 മത്സരങ്ങള്‍ മഹാരാഷ്ട്രയില്‍ നിന്നും മാറ്റേണ്ടി വരും. സംസ്ഥാനത്ത് കടുത്ത വരള്‍ച്ച തുടരുന്നതിനിടയിലാണ് കോടതിയുടെ നടപടി.
മത്സരങ്ങള്‍ മാറ്റുന്നത് ഒഴിവാക്കി കിട്ടാന്‍ പൂനെ, മുംബൈ ടീമുകള്‍ 5 കോടി രൂപ വീതം മുഖ്യമന്ത്രിയുടെ ദുരിതാശ്വാസ ഫണ്ടിലേക്ക് നല്‍കാമെന്നും മുംബൈ ക്രിക്കറ്റ് അസോസിയേഷന്‍ 60 ലക്ഷം ലിറ്റര്‍ വെള്ളം വിതരണം ചെയ്യാമെന്നും കോടതിയെ അറിയിച്ചിരുന്നു.
ഐ.പി.എല്‍ വേദി മഹാരാഷ്ട്രയില്‍ നിന്നും മാറ്റുന്നത് വന്‍ സാമ്പത്തിക നഷ്ടമുണ്ടാക്കുമെന്നും ടീമുകളുടെ ബ്രാന്‍ഡ് വാല്യു തകരുമെന്നും ബി.സി.സി.ഐ കോടതിയെ അറിയിച്ചിരുന്നു. കോടതി വിധി മുംബൈ, പൂനെ ടീമുകളെ മാത്രമല്ല നാഗ്പൂര്‍ സ്‌റ്റേഡിയത്തെ സെക്കന്‍ഡ് ഹോം ഗ്രൗണ്ടാക്കിയ പഞ്ചാബ് ടീമിനും തിരിച്ചടിയാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha