34 വര്ഷങ്ങള്ക്ക് മുന്പുണ്ടായ കൊലപാതകം: പൂട്ടിക്കിടന്ന വീട്ടില് നിരന്തരം പൂജകള് നടക്കുന്നതിലെ സംശയം വഴിത്തിരിവായി
വര്ഷങ്ങള്ക്ക് മുന്പുണ്ടായ കൊലപാതകത്തിന്റെ ചുരുളഴിച്ച് അഹമ്മദാബാദ് ക്രൈംബ്രാഞ്ച്. അഹമ്മദാബാദിലെ വാട്വയിലെ ഒരു വീട്ടില് നിന്നാണ് സ്ത്രീയുടേതെന്ന് കരുതുന്ന അസ്ഥികൂടം പൊലീസ് കണ്ടെടുത്തത്. 34 വര്ഷങ്ങള്ക്ക് മുന്പ് 1992ല് സ്ത്രീയുടെ ഭര്ത്താവും ഭര്ത്തൃസഹോദരനും ചേര്ന്നാണ് കൊലപാതകം നടത്തിയതെന്നാണ് പൊലീസ് നിഗമനം.
വിവാഹേതര ബന്ധം ആരോപിച്ച് സ്ത്രീയെ കൊലപ്പെടുത്തി മൃതദേഹം വീട്ടിനകത്തെ കിണറില് നിക്ഷേപിക്കുകയായിരുന്നു. കൊല്ലപ്പെട്ടത് ഫര്സാന എന്ന ഷബ്നമാണ് എന്നാണ് പൊലീസ് സംശയിക്കുന്നത്. അസ്ഥികൂടത്തിന്റെ ഡിഎന്എ പരിശോധനയ്ക്ക് ശേഷമേ ഇതില് സ്ഥിരീകരണം ഉണ്ടാവുകയുള്ളൂ.
പ്രതികളുടെ കുടുംബാംഗങ്ങള് കൊല്ലപ്പെട്ട സ്ത്രീയെ സ്വപ്നം കാണുന്നത് പതിവായതോടെ പൂജകള് നടത്തിയിരുന്നു. പൂട്ടിക്കിടന്ന വീട്ടില് നിരന്തരം പൂജകള് നടക്കുന്നത് സംശയങ്ങള്ക്ക് ഇടയാക്കിയതോടെയാണ് 34 വര്ഷം ഒളിപ്പിച്ച കൊലപാതകരഹസ്യം പുറത്തായത്. അസ്ഥികൂടം കണ്ടെത്തിയതോടെ കൊല്ലപ്പെട്ട സ്ത്രീയുടെ ഭര്ത്താവിനെയും സഹോദരനെയും ചോദ്യം ചെയ്യാന് കസ്റ്റഡിയിലെടുത്തിട്ടുണ്ട്, മറ്റ് പ്രതികള് ജീവിച്ചിരിപ്പില്ലെന്നും അഹമ്മദാബാദ് എഎസ്പി ഭരത് പട്ടേല് പറഞ്ഞു.
ദോള്ക്ക സ്വദേശിയായ ഫര്സാന മുഖ്യപ്രതിയുമായുള്ള വിവാഹത്തിന് ശേഷമാണ് അഹമ്മദാബാദിലെത്തിയത്. ഭര്ത്താവുമായി വഴക്ക് പതിവായിരുന്നു. വിവാഹബന്ധം വേര്പെടുത്താന് വിസമ്മതിച്ചതോടെ ഫര്സാനയെ സഹോദരനും മറ്റ് ബന്ധുക്കള്ക്കുമൊപ്പം കൊലപ്പെടുത്തുകയായിരുന്നു. വീട്ടില് ഉറങ്ങിക്കിടക്കുകയായിരുന്ന ഫര്സാനയെ കൊലപ്പെടുത്തി മൃതദേഹം കിണറില് മറവുചെയ്തു. കൊലപാതകത്തിന് ശേഷം മറ്റൊരാള്ക്ക് വില്പന നടത്തിയെങ്കിലും ഏഴ് വര്ഷമായി വീട് അടഞ്ഞുകിടക്കുകയായിരുന്നു. കിണറില് നിന്നും പുറത്തെടുത്ത അസ്ഥികള് ഡിഎന്എ പരിശോധനയ്ക്കായി ഫോറന്സിക് സയന്സ് ലബോറട്ടറിയിലേക്ക് അയച്ചിട്ടുണ്ട്. താരതമ്യത്തിനായി ഡിഎന്എ സാമ്പിള് ശേഖരിക്കാന് സ്ത്രീയുടെ സഹോദരനെ പൊലീസ് കണ്ടെത്തിയതായും എസിപി പട്ടേല് പറഞ്ഞു.
https://www.facebook.com/Malayalivartha
