സമാധാനത്തിന്റെ പാതയാണ് ഇന്ത്യ ആഗ്രഹിക്കുന്നതെങ്കിലും അതിനു വിരുദ്ധമായ പ്രവര്‍ത്തനങ്ങള്‍ ഇന്ത്യക്കെതിരേ ഉണ്ടായാല്‍ ചുട്ട മറുപടി കൊടുക്കാന്‍ സൈന്യം സുസജ്ജമാണെന്നു പ്രധാനമന്ത്രി നരേന്ദ്ര മോദിയുടെ താക്കീത്. ശ്രീനഗറിനു സമീപം പാംപോറില്‍ എട്ടു ജവാന്മാര്‍ ഭീകരരുടെ വെടിയേറ്റു വീരമൃത്യുവരിച്ച സാഹചര്യത്തിലാണ് പ്രധാനമന്ത്രിയുടെ കര്‍ശന നിലപാട്. 

''പാക്കിസ്ഥാനില്‍ നിരവധി അധികാരസ്ഥാന്ങ്ങളുണ്ട്. എന്നാല്‍ ഇന്ത്യക്കുള്ളത് ജനാധിപത്യപരമായി തെരഞ്ഞെടുക്കപ്പെട്ട സംവിധാനമാണ്. പാക്കിസ്ഥാനുള്‍പ്പെടെയുള്ള അയല്‍രാജ്യങ്ങളുമായി എപ്പോഴും സൗഹൃദം നിലനില്‍ക്കണമെന്നാണ് ഇന്ത്യ ആഗ്രഹിക്കുന്നത്.

മേശയ്ക്കു ചുറ്റുമിരുന്നുള്ള ചര്‍ച്ചകള്‍ അങ്ങനെതന്നെ തുടരും. എന്നാല്‍, ഇന്ത്യയുടെ അതിര്‍ത്തി സംരക്ഷിക്കേണ്ടവര്‍ അവരുടെ കരുത്ത് എന്താണെന്ന് അറിയിക്കേണ്ടിവന്നാല്‍ അത് അങ്ങനെതന്നെ ചെയ്യും. അതിനുള്ള പരിപൂര്‍ണ സ്വാതന്ത്ര്യം സൈന്യത്തിനുണ്ട്. ഓരോരുത്തരും അവരവരുടെ ചുമതല ഭംഗിയായി ചെയ്യുക എന്നതാണ് അഭിലഷണീയം. ഇന്ത്യന്‍ സേന അവരുടെ ഉത്തരവാദിത്വം വളരെ ഫലപ്രദമായി ചെയ്യുന്നതിനാല്‍ അതിര്‍ത്തി കടക്കാനൊരുങ്ങുന്ന ഭീകരര്‍ അങ്കലാപ്പിലാണ്. പലപ്പോഴും അവരുടെ ലക്ഷ്യങ്ങള്‍ വിഫലമാകുന്നു. ഈ നിരാശയാണു ഭീകരരെ വന്‍ ആക്രമണത്തിനു പ്രേരിപ്പിക്കുന്നത്. 

എന്നാല്‍, പ്രതികൂല സാഹചര്യങ്ങളെ തൃണവല്‍ഗണിച്ച് അതിര്‍ത്തി കാക്കുന്ന ധീരരായ ജവാന്മാരെക്കുറിച്ചു രാജ്യത്തിന് എപ്പോഴും പൂര്‍ണ വിശ്വാസവും തികഞ്ഞ അഭിമാനവുമാണ്''- പ്രധാനമന്ത്രി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha