അശാന്തിയുടെ താഴ്‌വര വീണ്ടും പ്രക്ഷുബന്ധം. ഹിസ്ബുള്‍ മുജാഹിദ്ദീന്‍ കമാന്‍ഡര്‍ ബുര്‍ഹാന്‍ വാണിയുടെ കൊലപാതകത്തെ തുടര്‍ന്നുണ്ടായ അശാന്തി വിട്ടൊഴിയാത്ത കശ്മീരില്‍ വീണ്ടും ഭീകരാക്രമണം. ജമ്മു കശ്മീരിലെ പൂഞ്ചിലാണ് ഇന്നു രാവിലെ ഭീകരാക്രമണം ഉണ്ടായത്. പൂഞ്ച് സിറ്റിയിലെ ആര്‍മി ബ്രിഗേഡിന്റെ ആസ്ഥാനത്തിനു സമീപമുളള നിര്‍മാണത്തിലിരിക്കുന്ന സര്‍ക്കാര്‍ കെട്ടിടത്തില്‍ ഭീകരര്‍ പ്രദേശത്ത് ഒളിച്ചിരിപ്പുണ്ടെന്ന വിവരത്തെ തുടര്‍ന്ന് നടത്തിയ തെരച്ചിലിലാണ് വെടിവെപ്പുണ്ടായത്.
ഭീകരരും സുരക്ഷാസേനയും തമ്മിലുണ്ടായ ഏറ്റുമുട്ടലില്‍ ഒരു പൊലീസ് കോണ്‍സ്റ്റബിള്‍ കൊല്ലപ്പെടുകയും എസ്‌ഐക്ക് ഗുരുതരമായി പരുക്കേല്‍ക്കുകയും ചെയ്തു. ഭീകരര്‍ പുറത്തുകടക്കാന്‍ സാധ്യതയുളള എല്ലാ വഴികളും അടച്ചെന്നും ഏറ്റുമുട്ടല്‍ തുടരുകയാണെന്നുമാണ് ലഭിച്ചിരിക്കുന്ന വിവരം. കശ്മീരില്‍ കഴിഞ്ഞ 65 ദിവസങ്ങളായി തുടരുന്ന സംഘര്‍ഷങ്ങളിലും ജനങ്ങളുടെ പ്രതിഷേധങ്ങളിലും ഇതുവരെ 78 പേരാണ് കൊല്ലപ്പെട്ടത്‌