നമിക്കാം ഇദ്ദേഹത്തെ ഇങ്ങനെയും ആളുകള്...അന്ന് രഘുറാം രാജനെ പഠിപ്പിച്ച ഐഐടി പ്രൊഫസര്; ഇന്ന് ആദിവാസികള്ക്ക് താങ്ങും തണലും; മൂന്ന് പതിറ്റാണ്ടായി അധസ്ഥിതര്ക്കായി ഉഴിഞ്ഞിട്ട ജിവിതം
വര്ഷങ്ങളോളം ഐഐടി വിദ്യാര്ത്ഥികള്ക്ക് അറിവ് പകര്ന്ന അധ്യാപകനാണ് അലോക് സാഗര് എന്ന ഡല്ഹി സ്വദേശി. അലോക് പകര്ന്ന അറിവ് കരുത്താക്കി നിരവധി പേര് ഉയരങ്ങളിലേക്ക് ചിറകടിച്ച് പറന്നു. മുന് ആര്ബിഎ ഗവര്ണര് രഘുറാം രാജനും അവരില് പെടുന്നു. 1982ല് ജോലി രാജിവെച്ച അലോക് സമൂഹത്തിലെ അരികുവല്ക്കരിക്കപ്പെട്ടവരുടെ ഉന്നമനത്തിനായി വീടുവിട്ടിറങ്ങി. കഴിഞ്ഞ മൂന്ന് പതിറ്റാണ്ടായി മധ്യപ്രദേശിലെ ബേതുല്, ഹൊസ്ഹങ്ങാബാദ് ജില്ലകളിലെ ആദിവാസി വിഭാഗങ്ങളുടെ താങ്ങും തണലുമാണ് ഇദ്ദേഹം. കഴിഞ്ഞ 26 വര്ഷമായി 750 ഓളം ആദിവാസികള് താമസിക്കുന്ന കൊച്ചാമു എന്ന ഗ്രാമത്തിലെ ചെറിയ കുടിലിലാണ് താമസം.
വൈദ്യുതിയോ, റോഡുകളോ ഈ ഗ്രാമത്തിലേക്ക് എത്തിയിട്ടില്ല. എടുത്തുപറയാന് ആകെയുള്ളത് ഒരു െ്രെപമറി സ്കൂള് മാത്രം. ആദിവാസികള്ക്ക് കൈത്താങ്ങ് നല്കുന്നതിനൊപ്പം പ്രദേശത്തെ പ്രകൃതിസംരക്ഷിക്കുന്നതിനും അലോക് മുന്നിരയിലുണ്ട്. ഇതിനകം മേഖലയില് അരലക്ഷം വൃക്ഷത്തൈകള് അദ്ദേഹം നട്ടു. ആദിവാസികളുടെ ഉന്നമനത്തിനായി പ്രവര്ത്തിക്കുന്ന ശര്മ്മിക് ആദിവാസി സംഗതന് എന്ന സംഘടനയും അലോകിന്റെ പ്രവര്ത്തനങ്ങള്ക്ക് പിന്തുണ നല്കുന്നു. ആദിവാസി ഗ്രാമങ്ങളിലൂടെ ഒറ്റമുണ്ടുത്ത് സൈക്കിളിലാണ് അലോകിന്റെ യാത്ര. അതിനൊപ്പം വൃക്ഷത്തൈകളും ആളുകള്ക്ക് നല്കുന്നു.
ഏറ്റവും താഴെതട്ടില് നിന്നാല് ഒരാള്ക്ക് രാജ്യത്തെ മികച്ച രീതിയില് സേവിക്കാമെന്നാണ് അലോകിന്റെ വിശ്വാസം. ജനങ്ങളെ സേവിക്കാന് തനിക്ക് ഒരു ഡിഗ്രിയും വേണ്ടെന്നും മനശക്തി മതിയെന്നുമാണ് അലോകിന്റെ പക്ഷം.
രാജ്യത്തെ ജനങ്ങള് നിരവധി പ്രശ്നങ്ങള് നേരിടുന്നുണ്ട്. എന്നാല് അത്തരക്കാരെ സഹായിക്കാതെ ഡിഗ്രികള് കാണിച്ച് തങ്ങളുടെ ബുദ്ധിവൈഭവം കാണിക്കാനുള്ള തിടുക്കമാണ് ആളുകള്ക്ക്.
അലോക് സാഗര് 
ഐഐടി ഡല്ഹിയില് നിന്നും ഇലക്ട്രിക്കല് എഞ്ചിനീയറിങ് ബിരുദം, 1973ല് മാസ്റ്റേഴ്സ് ഡിഗ്രി, അമേരിക്കയിലെ ടെക്സാസിലുള്ള ഹൂസ്റ്റണ് സര്വ്വകലാശാലയില് നിന്നും പിഎച്ച്ഡി...അങ്ങനെ അലോകിന്റെ പേരിനൊപ്പം ചേര്ക്കാന് വിദ്യാഭ്യാസ യോഗ്യതകളേറെ. എന്നാല് അതൊന്നും ആര്ക്കും മുമ്പില് നിരത്താന് അദ്ദേഹം ഇഷ്ടപ്പെടുന്നില്ല.
അടുത്തിടെ ബേതുലില് നടന്ന ജില്ലാ തെരഞ്ഞെടുപ്പില് അലോകിന്റെ പ്രവര്ത്തനങ്ങളില് സംശയം തോന്നി അധികൃതര് മേഖലയില് നിന്നും പോകാന് അദ്ദേഹത്തോട് ആവശ്യപ്പെടുകയുണ്ടായി. സുരക്ഷാ പ്രശ്നങ്ങള് മുന്നിര്ത്തിയായിരുന്നു ഇത്. അപ്പോള് മാത്രമാണ് അലോക് തന്റെ വിദ്യാഭ്യാസ യോഗ്യതകള് പുറത്തെടുത്തത്. അലോകിനെ കുറിച്ച് അറിഞ്ഞപ്പോള് ജില്ലാ അധികൃതര് ആശ്ചര്യപ്പെട്ടുപോയെന്ന് പ്രാദേശിക മാധ്യമങ്ങള് റിപ്പോര്ട്ട് ചെയ്യുന്നു.
https://www.facebook.com/Malayalivartha
