വിവാദങ്ങള്‍ കെട്ടടങ്ങിയെന്ന്‌ വിചാരിച്ചിരിക്കുന്ന സമയത്ത്‌ രാജ്യത്തെ ഞെട്ടിപ്പിച്ച ആ വാര്‍ത്ത വന്നു. കേന്ദ്ര മാനവ വിഭവ ശേഷി സഹമന്ത്രി ശശി തരൂറിന്റെ ഭാര്യ സുനന്ദ പുഷ്‌കറെ (52) ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തി. ഡല്‍ഹിയിലെ ലീലാ പാലസ് ഹോട്ടലിലെ 345 മുറിയിലാണ് മരിച്ച നിലയില്‍ കണ്ടെത്തിയത്. മരണകാരണത്തെ കുറിച്ച് വ്യക്തമല്ല. ആത്മഹത്യ ചെയ്തതാണെന്നാണ് പ്രാഥമിക നിഗമനം. പാക് മാധ്യമപ്രവര്‍ത്തകരായ മെഹര്‍ തരാരിനെ ചൊല്ലിയുണ്ടായ വിവാദം ഒരു ദിവസം പിന്നിടുമ്പോഴാണ് സുനന്ദ മരിച്ചെന്ന നടുക്കുന്ന വിവരം പുറത്തെത്തുന്നത്.

എഐസിസി സമ്മേളനം കഴിഞ്ഞ് മടങ്ങിയെത്തിയ ശശി തരൂറാണ് മരണ വിവരം പൊലീസിനെ അറിയിച്ചത്. തരൂര്‍ എത്തിയപ്പോള്‍ അടച്ചിട്ട നിലയിലായിരുന്നു മുറി. തുടര്‍ന്ന് വാതില്‍ തകര്‍ത്ത് അകത്തു കയറിയപ്പോഴാണ് മരിച്ച നിലയില്‍ കണ്ടെത്തിയത്. ഹോട്ടലിലെ മുറി സീല്‍ ചെയ്തിരിക്കുകയാണ്. കട്ടിലില്‍ കിടക്കുന്ന നിലയിലാണ് മൃതദേഹം കണ്ടെത്തിയത്. മരണ കാരണം വ്യക്തമല്ലെന്ന് ശശീ തരൂരിന്റെ പ്രൈവറ്റ് സെക്രട്ടറി മാധ്യമങ്ങളോട് പറഞ്ഞു. മാധ്യമങ്ങള്‍ക്കടക്കം ഹോട്ടല്‍ മുറിയില്‍ പ്രവേശനത്തിന് അനുമതി നിഷേധിച്ചിട്ടുണ്ട്. ഉച്ച തിരിഞ്ഞ് മൂന്നിന് ഹോട്ടല്‍ ലോബിയില്‍ സുനന്ദ പുഷ്‌കറെ ഹോട്ടലിലുള്ളവര്‍ കണ്ടിരുന്നു. എന്നാല്‍ വൈകീട്ട് ഏഴരയോടെ ഹോട്ടല്‍ ജീവനക്കാര്‍ വാതില്‍ മുട്ടിയെങ്കിലും പ്രതികരണമൊന്നും ലഭിച്ചില്ല. ഇതിന്റെ അടിസ്ഥാനത്തില്‍ ഹോട്ടലധികൃതര്‍ തരൂരിനെ വിവരമറിയിക്കുകയായിരുന്നെന്നും തരൂരിന്റെ പിഎസ് കൂട്ടിച്ചേര്‍ത്തു.

സംഭവം ഇങ്ങനെ

തരൂരിന്റെ ട്വിറ്റര്‍ അക്കൗണ്ടില്‍ തരാറിന്റേതായി വന്ന ചില ട്വീറ്റുകളാണു വിവാദങ്ങള്‍ക്കു തുടക്കമിട്ടത്‌. തരൂരും തരാറുമായുള്ള അടുപ്പം വ്യക്‌തമാക്കുന്ന ട്വീറ്റുകള്‍ പുറത്തുവന്നതോടെ വിവാദം കൊഴുത്തു. തന്റെ ട്വിറ്റര്‍ അക്കൗണ്ട്‌ ഹാക്ക്‌ ചെയ്‌തതായും തല്‍കാലം ട്വിറ്റര്‍ ഉപയോഗം നിര്‍ത്തുകയാണെന്നും തരൂര്‍ വ്യക്‌തമാക്കിയെങ്കിലും ബുധനാഴ്‌ച രാത്രി സുനന്ദ പുഷ്‌കര്‍ മാധ്യമങ്ങള്‍ക്കു മുമ്പാകെ നല്‍കിയ വിശദീകരണത്തോടെ കാര്യങ്ങള്‍ കീഴ്‌മേല്‍ മറിഞ്ഞു.

തരൂരിന്റെ അക്കൗണ്ട്‌ ഹാക്ക്‌ ചെയ്‌തിട്ടില്ലെന്നും ബ്ലാക്ക്‌ബെറി മെസഞ്ചര്‍ വഴി തരൂരും തരാറും കൈമാറിയ വിവരങ്ങള്‍ താനാണു ഭര്‍ത്താവിന്റെ ട്വിറ്റര്‍ അക്കൗണ്ടില്‍ പോസ്‌റ്റ്‌ ചെയ്‌തതെന്നും സുനന്ദ വെളിപ്പെടുത്തി. തങ്ങളുടെ ദാമ്പത്യം തകര്‍ക്കാന്‍ ശ്രമിക്കുന്ന തരാര്‍ ഐ.എസ്‌.ഐ. ഏജന്റാണ്‌. ഭര്‍ത്താവിനെ തന്നില്‍നിന്ന്‌ അകറ്റാന്‍ അവര്‍ പിന്നാലെ നടന്നു ശല്യപ്പെടുത്തുകയാണെന്നും സുനന്ദ കുറ്റപ്പെടുത്തി.

ഇതോടെ തരാര്‍ തിരിച്ചടിച്ചു. താന്‍ ഐ.എസ്‌.ഐ. ഏജന്റല്ലെന്നും സുനന്ദയ്‌ക്കു നല്ല സുഖമില്ലാത്തതിനാലാണ്‌ ഇത്തരത്തില്‍ പ്രതികരിക്കുന്നതെന്നും അവര്‍ ആരോപിച്ചു. എന്നാല്‍, ഇന്നലെ രാവിലെ ഒരു ദൃശ്യമാധ്യമത്തിനു നല്‍കിയ അഭിമുഖത്തിലും സുനന്ദ ആരോപണം ആവര്‍ത്തിച്ചു. തുടര്‍ന്ന്‌ നിലപാടു വിശദീകരിച്ച്‌ മെഹര്‍ തരാര്‍ ഇന്ത്യയിലെ വിവിധ മാധ്യമങ്ങളോടു പ്രതികരിച്ചു. ജീവിതത്തില്‍ ഇന്നുവരെ ഒരു ഐ.എസ്‌.ഐ. ഏജന്റിനെ കണ്ടിട്ടില്ല. ഐ.എസ്‌.ഐയെ വിമര്‍ശിക്കുന്നതിന്റെ പേരില്‍ പാകിസ്‌താനില്‍ തനിക്കു ശത്രുക്കളുമുണ്ട്‌.

ഇതിനിടെയാണു തരൂരിന്റെയും ഭാര്യയുടെയും സംയുക്‌തപ്രസ്‌താവന ഫേസ്‌ ബുക്കില്‍ പ്രത്യക്ഷപ്പെട്ടത്‌. പാക്‌ മാധ്യമപ്രവര്‍ത്തകയുമായി ബന്ധപ്പെട്ട ട്വീറ്റുകള്‍ തങ്ങളുടെ അറിവോടെയല്ല. തങ്ങളുടെ അനുവാദമില്ലാതെ വന്ന ട്വീറ്റുകള്‍ ഏറെ അസ്വസ്‌ഥതയുണ്ടാക്കുന്നതാണ്‌. ഇതോടെ അയഞ്ഞ മെഹര്‍ തരാര്‍ ഇരുവര്‍ക്കും ആശംസനേര്‍ന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha