ഒളിച്ചിരിക്കുന്ന എം.എല്.എമാര്ക്ക് സുഖവാസം
തമിഴകത്ത് ഓരോ ദിവസവും പുതിയ രാഷ്ട്രീയ നാടകങ്ങള് അരങ്ങേറിക്കൊണ്ടിരിക്കുകയാണ്. ഏതു വഴിയിലൂടെയും രാഷ്ട്രീയ പിന്തുണ ഉറപ്പുവരുത്താനുള്ള മത്സരത്തിലാണ് വി.കെ. ശശികലയും ഒ. പനീര് ശെല്വവും. തനിക്കൊപ്പമുള്ള 131എം.എല്.എ മാരെ എന്തു വിലകൊടുത്തും കൂടെ നിര്ത്താനുള്ള പതിനെട്ട് അടവും പയറ്റുകയാണ് ശശികല. ഭരണപക്ഷ എം.എല്.എമാര് രണ്ടു പക്ഷത്തായി വേര്തിരിഞ്ഞപ്പോള് പനീര് ശെല്വത്തിനൊപ്പം മൂന്ന് എം.എല്. എമാര് ഉള്ളുവെങ്കിലും വരും ദിവസങ്ങളില് തനിക്ക് അണി ചേരാന് കൂടുതല് പേര് വരുമെന്നാണ് പ്രതീക്ഷ. അതുകൊണ്ടുതന്നെ ഒപ്പമുള്ളവര് വിട്ടുപോകാതിരിക്കാന് വലിയ വില കൊടുത്ത തന്നെ അവരെ സംരക്ഷിക്കുകയാണ് ശശികല.
ചെന്നൈ നഗരത്തിലെ വിവിധ ആഡംബര ഹോട്ടലുകളിലും റിസോട്ടുകളിലുമായി സുഖവാസത്തില് ഒളിച്ച് താമസിപ്പിച്ചിരിക്കുകയാണ് അവരെ. ചെന്നൈയില് നിന്ന് 80 കിലോമീറ്റര് അകലെ മഹാബലിപുരത്തെ ഒരു ആഡംബര ഹോട്ടലില് ഒരു വിഭാഗം എം.എല്.എമാര് താമസിക്കുന്നു എന്നാണ് അറിയാന് കഴിയുന്നത്. കടല് ത്തീരത്തും മസാജ് പാര്ലറുകളിലും വാട്ടര് സ്കീയിംഗ് കേന്ദ്രങ്ങളിലുമായി പല എം.എല്.എമാരും ആഘോഷിക്കുകയാണ്.
പനീര് ശെല്വത്തിന്റെ പ്രലോഭനങ്ങള് തടയാനായി ഇവരുടെ മൊബൈല് ഫോണുകളല് പിടിച്ചു വയ്ക്കുകയും ടെലഫോണ് ഇന്റര് നെറ്റ് സൗകര്യങ്ങള് നിഷേധിക്കുകയും ചെയ്തു. കാലുമാറിയേക്കുമെന്ന് സംശയമുള്ള ചില എം.എല്എ.മാരെ മുംബൈ, ഡല്ഹി എന്നിവിടങ്ങളിലേയ്ക്ക് മാറ്റിയതായും സൂചനയുണ്ട്.
എന്നാല് എം.എല്.എ മാരില് ഒരാളായ എസ്.പി. ഷണ്മുഖാനന്ദന് ആഡംബര ഹോട്ടലിലെ സുഖസൗകര്യങ്ങളില് നിന്ന് കൂടെയുണ്ടായിരുന്നവരുടെ കണ്ണുവെട്ടിച്ച് രക്ഷപ്പെട്ട് പനീര്ശെല്വത്തിന്റെ അടുക്കല് എത്തിയതായാണ് സൂചന. ശശികലക്ക് ഒപ്പമുള്ള നിരവധി എം.എല്.എമാര് തങ്ങളുടെ പക്ഷത്തേയ്ക്ക് വരാന് തയ്യാറാണെന്നും പിന്തുണ ഉറപ്പുനല്കിയിട്ടുണ്ടെന്നും പനീര് ശെല്വവും വി. മൈത്രേയനും വ്യക്തമാക്കിയിട്ടുണ്ട്. കൂടുതല് പേരെ തങ്ങളുടെ ഭാഗത്തേയ്ക്ക് എത്തിക്കാന് ശ്രമങ്ങള് നടക്കുന്നുണ്ട്. അതുകൊണ്ട് തന്നെ ശശികല തന്റെ കൂട്ടാളികളെ സന്തോഷിപ്പിച്ചുകൂടെ ചേര്ത്തിരിക്കുകയാണ്.
ജയലളിതയുടെ വലംകൈയായിരുന്ന ശശികലയ്ക്കയ്ക്ക് മുഖ്യമന്ത്രി സ്ഥാനം കൈമാറുന്നതിനായി കഴിഞ്ഞ ആഴ്ച പനീര്ശെല്വം രാജി സമര്പ്പിച്ചിരുന്നു. എന്നാല് അനധികൃത സ്വത്ത് സമ്പാദന കേസില് വിധി വരാനിരിക്കെ ശശികലയുടെ സ്ഥാനാരോഹണം ഗവര്ണ്ണര് തടഞ്ഞതോടെയാണ് കാര്യങ്ങള്ക്ക്താമസം ഉണ്ടായത്.
ചൊവ്വാഴ്ച രാത്രി ജയലളിതയുടെ സമാധി മണ്ഡപത്തിലെത്തി ഏറെനേരം ധ്യാനത്തിലിരുന്ന ശേഷം താന് മുഖ്യമന്ത്രി സ്ഥാനം ഉപേക്ഷിക്കാന് തയ്യാറല്ലെന്ന് പനീര് ശെല്വം പ്രഖ്യാപിച്ചു. ജയലളിതയുടെ മരണത്തില് ദുരൂഹത ആരോപിച്ച് ശശികലയെ സംശയത്തിന്റെ നിഴലിലാക്കുകയും ചെയ്തു. പനീര്ശെല്വം വഞ്ചകനാണെന്നും അദ്ദേഹത്തിന്റെ നിയമസഭയിലെ പ്രവര്ത്തനങ്ങള് സംശയാസ്പദമായിരുന്നെന്നും ശശികല കഴിഞ്ഞ ദിവസം ആരോപിച്ചിരുന്നു.
https://www.facebook.com/Malayalivartha
