ശശികലയും പനീര്സെല്വവും ഗവര്ണറെ കണ്ടു... സര്ക്കാര് രൂപീകരിക്കാന് ക്ഷണിക്കണമെന്ന് ശശികലയും രാജി പിന്വലിക്കണമെന്ന് പനീര്ശെല്വവും
സര്ക്കാര് രൂപീകരിക്കാന് അവകാശവാദമുന്നയിച്ച് വി.കെ ശശികല ഗവര്ണര് സി. വിദ്യാസാഗര് റാവുവുമായി കൂടിക്കാഴ്ച നടത്തി. വൈകിട്ട് എഴരയ്ക്കായിരുന്നു കൂടിക്കാഴ്ച. എട്ട് മണിക്ക് കൂടിക്കാഴ്ച അവസാനിച്ചു. 130 എം.എല്.എമാരുടെ പിന്തുണ അറിയിക്കുന്ന കത്ത് ശശികല ഗവര്ണര്ക്ക് കൈമാറി. ജയലളിതയുടെ ശവകുടീരം സന്ദര്ശിച്ച ശേഷമാണ് ശശികല രാജ്ഭവനിലേക്ക് തിരിച്ചത്.
കാവല് മുഖ്യമന്ത്രി ഒ. പനീര്സെല്വവും ഗവര്ണറുമായി കൂടിക്കാഴ്ച നടത്തി. വൈകിട്ട് അഞ്ച് മണിക്കായിരുന്നു പനീര്സെല്വംഗവര്ണര് കൂടിക്കാഴ്ച. താന് സമ്മര്ദ്ദത്തിന് വഴങ്ങിയാണ് രാജിവച്ചതെന്ന് പനീര്സെല്വം ഗവര്ണറെ അറിയിച്ചു. തന്റെ രാജി പിന്വലിക്കുകയാണെന്നും അദ്ദേഹം വ്യക്തമാക്കി. മുംബൈയിലായിരുന്ന ഗവര്ണര് വിദ്യാസാഗര് റാവു വൈകുന്നേരം മൂന്ന് മണിക്കാണ് ചെന്നൈയില് തിരിച്ചെത്തിയത്.
ഇരു നേതാക്കളും ഗവര്ണറുമായി കൂടിക്കാഴ്ച നടത്തി അവകാശവാദം ഉന്നയിച്ച സാഹചര്യത്തില് ഇനി തീരുമാനം ഗവര്ണറുടേതാണ്. നല്കിയ രാജി പിന്വലിക്കാന് വ്യവസ്ഥയില്ലെന്നാണ് ഭരണഘടനാ വിദഗ്ധര് പറയുന്നത്. ഈ സാഹചര്യത്തില് രാജി പിന്വലിക്കുന്നത് പരിഗണിക്കണമെന്ന പനീര്സെല്വത്തിന്റെ അഭ്യര്ത്ഥന പരിഗണിക്കപ്പെടാനിടയില്ല. സത്യം വിജയിക്കുമെന്ന് കൂടിക്കാഴ്ചയ്ക്ക ശേഷം പനീര്സെല്വം പ്രതികരിച്ചു.
അതേസമയം മന്ത്രിസഭ രൂപകീരിക്കാനുള്ള ശശികലയുടെ അവകാശവാദവും ഗവര്ണര് ഉടന് സ്വീകരിക്കാനിടയില്ല. അനധികൃത സ്വത്ത് കേസില് ശശികലയ്ക്കെതിരായ സുപ്രീം കോടതി വിധി വരുന്നത് വരെ ഗവര്ണര് തീരുമാനം വൈകിപ്പിച്ചേക്കുമെന്നാണ് സൂചന. ഇരു വിഭാഗത്തിനും ഗവര്ണര് ഉറപ്പുകളൊന്നും നല്കിയിട്ടില്ല. കേന്ദ്രസര്ക്കാര് നിലപാടും നിര്ണ്ണായകമാണ്.
https://www.facebook.com/Malayalivartha
