അമ്മയുടെ പെരിയ മനസ് പനീര്ശെല്വത്തോടൊപ്പം; വേലക്കാരി വേലക്കാരിയുടെ പണി ചെയ്യട്ടെ; തിരുപ്പൂര് എംപിയും പനീര്സെല്വത്തിനൊപ്പം
തമിഴ്നാട് മുഖ്യമന്ത്രി ഒ.പനീര്സെല്വത്തിനെതിരായ അധികാര വടംവലി ശക്തമായി തുടരുന്നതിനിടെ, ശശികല പക്ഷത്തുനിന്നും കൂടുതല് ആളുകള് കൊഴിയുന്നു. തിരുപ്പൂര് എംപി സത്യഭാമയും പനീര്സെല്വം ക്യാംപില് എത്തി. പനീര്സെല്വുമായി കൂടിക്കാഴ്ച നടത്തിയ സത്യഭാമ പനീര്സെല്വത്തിന് പിന്തുണയും അറിയിച്ചു. അണ്ണാ ഡിഎംകെ ജനറല് സെക്രട്ടറി കൂടിയായ വി.കെ. ശശികലയ്ക്കൊപ്പം നിലയുറപ്പിച്ചിരുന്ന രണ്ടു മന്ത്രിമാര്ക്കു പിന്നാലെ ശശികലയുടെ വിശ്വസ്തന് സി. പൊന്നയ്യനും പനീര്സെല്വത്തിന് പിന്തുണ അറിയിച്ചിരുന്നു.
പാര്ട്ടിയുടെ സ്ഥാപക നേതാക്കളിലൊരാളാണ് പൊന്നയ്യന്. വിദ്യാഭ്യാസ മന്ത്രി കെ.പണ്ഡ്യരാജന്, ഫിഷറീസ് മന്ത്രി ഡി. ജയകുമാര് എന്നിവരാണ് പനീര്സെല്വത്തിന് പിന്തുണ പ്രഖ്യാപിച്ചെത്തിയ മന്ത്രിമാര്. നാമക്കല് എംപി പി.ആര്. സുന്ദരം, കൃഷ്ണഗിരി എംപി കെ.അശോക് കുമാര് എന്നിവരും ശശികലയെ വിട്ട് പനീര്സെല്വത്തിന് പിന്തുണ പ്രഖ്യാപിച്ചു. നടന് ശരത് കുമാറും പനീര്സെല്വത്തിന് പിന്തുണ അറിയിച്ച് രംഗത്തെത്തി.
സര്ക്കാര് രൂപീകരണത്തിന് അവകാശവാദമുന്നയിച്ച് ഗവര്ണര് സി.വിദ്യാസാഗര് റാവുവുമായി കഴിഞ്ഞ ദിവസം കൂടിക്കാഴ്ച നടത്തിയ ശശികല സംഘത്തില്പ്പെട്ടയാളാണ് മന്ത്രി പാണ്ഡ്യരാജന്. പനീര്സെല്വത്തിന്റെ വീട്ടിലെത്തിയാണ് പാണ്ഡ്യരാജന് അദ്ദേഹത്തിനുള്ള പിന്തുണ അറിയിച്ചത്. വോട്ടര്മാരുടെ അഭിപ്രായം പരിഗണിക്കും, ജയലളിതയുടെ അന്തസും പാര്ട്ടിയുടെ ഐക്യവും നിലനിര്ത്തും... പാണ്ഡ്യരാജന് ട്വിറ്ററില് കുറിച്ചു.
അതിനിടെ, അണ്ണാ ഡിഎംകെയുടെ പുതുച്ചേരി ഘടകവും പനീര്സെല്വത്തിന് പിന്തുണ പ്രഖ്യാപിച്ചേക്കുമെന്നാണ് വിവരം. ഇക്കാര്യം തീരുമാനിക്കാന് നാല് എംഎല്എമാര് യോഗം ചേര്ന്നു. അന്തിമ തീരുമാനം ഇനിയും പുറത്തുവിട്ടിട്ടില്ല. അതേസമയം, ജയലളിതയുടെ മരണശേഷം ശശികലയുടെ ഔദ്യോഗിക വസതിയായി മാറിയ പോയസ് ഗാര്ഡനു മുന്നിലെ പൊലീസ് സുരക്ഷ പൂര്ണമായും പിന്വലിക്കുമെന്നും റിപ്പോര്ട്ടുണ്ട്. പ്രതിപക്ഷ നേതാവ് എം.കെ. സ്റ്റാലിന്റെ ആവശ്യപ്രകാരം ഇവിടുത്തെ സുരക്ഷ ഭാഗികമായി പിന്വലിച്ചിരുന്നു.
അതേസമയം, തന്നെ പിന്തുണയ്ക്കുന്നവരോട് ചെന്നൈയിലെ മറീന ബീച്ചിലെത്താന് കാവല് മുഖ്യമന്ത്രി പനീര്സെല്വം സമൂഹമാധ്യമങ്ങളിലൂടെ ആഹ്വാനം ചെയ്തു. പനീര്സെല്വം അനുകൂലികളുടെ അടിയന്തര യോഗവും വിളിച്ചിട്ടുണ്ട്. ഗ്രീന്വെയ്സ് റോഡിലെ വസതിയിലാണു യോഗം ചേരുന്നത്.
https://www.facebook.com/Malayalivartha
