തമിഴ്നാട്ടിലെ കര്ഷകര് ഡല്ഹിയിലെ ജന്തര് മന്ദിറില് നടത്തി വന്നിരുന്ന സമരം പിന്വലിച്ചു, ടിക്കറ്റ് ലഭിച്ചാല് ഇന്ന് തന്നെ തമിഴ്നാട്ടിലേക്ക് മടങ്ങും
തമിഴ്നാട്ടിലെ കര്ഷകര് ഡല്ഹിയിലെ ജന്തര് മന്ദിറില് നടത്തി വന്നിരുന്ന സമരം പിന്വലിച്ചു. മുഖ്യമന്ത്രി എടപ്പാടി പളനിസ്വാമിയുമായി നടത്തിയ കൂടിക്കാഴ്ചയ്ക്ക് ശേഷമാണ് കര്ഷകര് സമരം പിന്വലിച്ചത്. ആവശ്യങ്ങള് അംഗീകരിച്ചില്ലെങ്കില് മെയ് 25ന് ശേഷം സമരം പുനരാരംഭിക്കുമെന്ന് കര്ഷകരുടെ നേതാവ് അയ്യാക്കണ്ണ് പറഞ്ഞു. ടിക്കറ്റ് ലഭിച്ചാല് ഇന്ന് തന്നെ തമിഴ്നാട്ടിലേക്ക് മടങ്ങുമെന്നും അയ്യാക്കണ്ണ് വ്യക്തമാക്കി.
നീതി ആയോഗ് യോഗത്തിനെത്തിയപ്പോഴാണ് പളനിസ്വാമി തമിഴ്നാട് കര്ഷകരുമായി കൂടിക്കാഴ്ച നടത്തിയത്. കര്ഷകരുടെ ആവശ്യങ്ങള് പ്രധാനമന്ത്രി നരേന്ദ്ര മോഡിയുടെ ശ്രദ്ധയില്പ്പെടുത്തിയിട്ടുണ്ടെന്ന് പളനിസ്വാമി പ്രതികരിച്ചു. ദേശസാല്കൃത ബാങ്കുകളില് നിന്നുമെടുത്ത കാര്ഷിക വായ്പകള് എഴുതിത്തള്ളണമെന്നും വരള്ച്ചാ ദുരിതാശ്വാസ പാക്കേജ് പുനപരിശോധിക്കണമെന്നും ആവശ്യപ്പെട്ടാണ് കര്ഷകര് സമരം തുടങ്ങിയത്. 40 ദിവസം നീണ്ട സമരമാണ് കര്ഷകര് പിന്വലിച്ചത്.
വ്യത്യസ്തമായ മാര്ഗങ്ങളിലൂടെയാണ് തമിഴ്നാട് കര്ഷകരുടെ സമരം രാജ്യശ്രദ്ധയാകര്ഷിച്ചത്. എലിയെ കടിച്ചും പാമ്പിനെ കടിച്ചുമാണ് കര്ഷകര് സമരം ചെയ്തത്. തങ്ങളുടെ ആവശ്യങ്ങള് അംഗീകരിച്ചില്ലെങ്കില് മൂത്രം കുടിക്കുമെന്നും മലം ഭക്ഷിക്കുമെന്നും കര്ഷകര് ഭീഷണി മുഴക്കിയിരുന്നു.
https://www.facebook.com/Malayalivartha
