ഒമ്പത് വയസുള്ള പെണ്‍കുട്ടിയെയും സഹോദരിയെയും ചേര്‍ത്ത് പിടിച്ച് ആ അമ്മ തല്ലരുതേ എന്നു പറഞ്ഞു കരഞ്ഞു വിളിച്ചിട്ടും അവര്‍ ഇരുമ്പുദണ്ഡുമായി ക്രൂരമര്‍ദനം തുടര്‍ന്നു. കൈകൂപ്പി കരഞ്ഞിട്ടും അസുഖബാധിതനായ 75 കാരനെയും തല്ലി അവശനിലയിലാക്കി. 10 വയസുകാരന്‍ ഇരുട്ടിലെവിടെയോ ഓടി മറഞ്ഞു. ജമ്മു കാശ്മീരിലെ രീസി ജില്ലിയിലാണ് ഗോരക്ഷയുടെ പേരില്‍ ഒരു കുടുംബത്തിലെ അഞ്ച് പേരെ നിഷ്‌കരുണം തല്ലിച്ചതച്ചത്. മൃഗങ്ങളെ കൊണ്ട് നടന്ന് കച്ചവടം നടത്തുന്ന നാടോടി കുടുംബം വെള്ളിയാഴ്ച യാത്ര ചെയ്യുന്നതിനിടെ വിശ്രമിക്കുമ്പോഴാണ് ആക്രമണത്തിന് ഇരയായത്.

ആക്രമണത്തിനിരയായ ഒമ്പത് വയസുകാരിക്ക് ശരീരത്തില്‍ ഗുരുതരമായ ഒടിവുകളും ചതവുകളുമുണ്ട്. തങ്ങളുടെ കുടുംബത്തിലെ 10 വയസുകാരനെ തല്ലി ഓടിച്ചെന്നും അവന്‍ ജീവിച്ചിരിപ്പുണ്ടോ മരിച്ചോ എന്ന് അറിയില്ല എന്നും മര്‍ദനമേറ്റ കുടുംബത്തിലെ നസീമ ബീഗം എന്ന സ്ത്രീ പറയുന്നു. നാടോടി കുംബത്തെ തല്ലിചതച്ച കേസില്‍ പതിനൊന്ന് ഗോരക്ഷകരെ പൊലീസ് അറസ്റ്റ് ചെയ്തു. നാടോടി കുടുംബത്തിന് നേരെ ആക്രമണവുമായെത്തുന്ന ഗോരക്ഷകരുടെ വീഡിയോ സമൂഹമാധ്യമങ്ങളില്‍ ചര്‍ച്ചയായിരിക്കുകയാണ്. 

ഗോരക്ഷകര്‍ രാത്രിയില്‍ മുദ്രാവാക്യങ്ങള്‍ മുഴക്കി നാടോടി കുടുംബം തങ്ങിയ ഷെഡ് ആക്രമിക്കുകയായിരുന്നു. ഷെഡ്ഡുകള്‍ തല്ലിതകര്‍ക്കുകയും കത്തിക്കുകയും ചെയ്തു. അനുമതിയില്ലാതെ കന്നുകാലികളെ കടത്തുകയായിരുന്നെന്നാണ് അക്രമികള്‍ ഉന്നയിക്കുന്നത്. ആക്രമണം അഴിച്ച് വിട്ടതിന് 11 പേരെ അറസ്റ്റ് ചെയ്തിട്ടുണ്ട്. മേഖലയിലെ സ്ഥിതിഗതികള്‍ ഇപ്പോള്‍ പൊലീസ് നിയന്ത്രണത്തിലാണ്. ഡെപ്യൂട്ടി കമ്മീഷണറില്‍ നിന്നും മുന്‍കൂര്‍ അനുമതിയില്ലാതെ കന്നുകാലികളെ കടത്തിയതിന് നാടോടി കുടുംബത്തിലെ നാല് പേര്‍ക്കെതിരേയും പൊലീസ് കേസെടുത്തിട്ടുണ്ട്.