ബെംഗളൂരു സിറ്റിചെന്നൈ സെന്‍ട്രല്‍ മെയിലില്‍ വന്‍ കവര്‍ച്ച. ഞായറാഴ്ച പുലര്‍ച്ചെ 1.15നു ജോലാര്‍പേട്ട പൊലീസ് സ്‌റ്റേഷന്‍ പരിധിയിലുള്ള പരയൂര്‍ ഗ്രാമത്തിലൂടെ കടന്നുപോകുമ്പോള്‍ അപായ ചങ്ങല വലിച്ചു ട്രെയിന്‍ നിര്‍ത്തിയ ശേഷമാണു കവര്‍ച്ച നടത്തിയത്. 26 പവന്‍ സ്വര്‍ണവും പണവും മൊബൈല്‍ ഫോണുകളും മറ്റ് വിലപിടിപ്പുള്ള വസ്തുക്കളും കവര്‍ന്നതായി യാത്രക്കാര്‍ പറഞ്ഞു. എട്ടു പേരടങ്ങുന്ന സംഘമാണു കവര്‍ച്ച നടത്തിയതെന്നു പൊലീസ് പറയുന്നു. ട്രെയിനില്‍ യാത്ര ചെയ്തിരുന്ന കവര്‍ച്ചാ സംഘത്തിലെ ഒരാള്‍ അപായച്ചങ്ങല വലിച്ചു. ട്രെയിന്‍ നിര്‍ത്തി.
ഈ സമയം മറ്റ് മോഷ്ടാക്കള്‍ ട്രെയിനിനുള്ളില്‍ കയറി. എസ് ഒന്നു മുതല്‍ എസ് എട്ടു വരെയുള്ള കോച്ചുകളിലുള്ള യാത്രക്കാരുടെ സാധനങ്ങളാണു കവര്‍ച്ച ചെയ്യപ്പെട്ടത്. സ്ത്രീകള്‍ ഉള്‍പ്പെടെയുള്ളവര്‍ ബഹളം ഉണ്ടാക്കിയതിനെ തുടര്‍ന്ന് ഉറക്കത്തിലായിരുന്ന മറ്റ് യാത്രക്കാര്‍ ഉണര്‍ന്നു. മോഷ്ടാക്കളെ കീഴ്‌പ്പെടുത്താന്‍ യാത്രക്കാര്‍ ശ്രമിച്ചെങ്കിലും ഫലമുണ്ടായില്ല. ട്രെയിനു പുറത്തു കടന്ന മോഷ്ടാക്കള്‍, സമീപത്തുതന്നെ നിര്‍ത്തിയിട്ടിരുന്ന കാറില്‍ കടന്നുകളയുകയും ചെയ്തു. ആര്‍പിഎഫ് ഉദ്യോഗസ്ഥര്‍ സ്ഥലത്ത് എത്തി വിശദമായ പരിശോധന നടത്തി.
ഡിഎസ്പി കുമാരേശന്റെ നേതൃത്വത്തില്‍ നാലു പ്രത്യേക സംഘങ്ങളെ പ്രതികളെ പിടിക്കാന്‍ നിയോഗിച്ചിട്ടുണ്ട്. കവര്‍ച്ചയെ തുടര്‍ന്നു മുപ്പതു മിനിറ്റു വൈകിയാണു ട്രെയിന്‍ വീണ്ടും യാത്ര തുടര്‍ന്നത്. ഇന്നലെ പുലര്‍ച്ചെ 4.45നാണ് ട്രെയിന്‍ ചെന്നൈ സെന്‍ട്രല്‍ സ്‌റ്റേഷനില്‍ എത്തിയത്. തിരുവനന്തപുരം–ന്യൂഡല്‍ഹി കേരള എക്‌സ്പ്രസ്, മേട്ടുപ്പാളയം–ചെന്നൈ നീലഗിരി എക്‌സ്പ്രസ്, മൈസൂര്‍–ചെന്നൈ കാവേരി എക്‌സ്പ്രസ് തുടങ്ങിയ ട്രെയിനുകളില്‍ അടുത്തിടെ കവര്‍ച്ച നടന്നിരുന്നു. കേരള എക്‌സ്പ്രസിന്റെ സിഗ്‌നല്‍ സംവിധാനത്തില്‍ തകരാര്‍ വരുത്തിയ ശേഷമാണു മോഷ്ടാക്കള്‍ ട്രെയിനില്‍ കടന്നു കൊള്ളയടിച്ചത്.