ഛത്തിസ്ഗഡില്‍ മാവോയിസ്റ്റ് ആക്രമണത്തില്‍ മരിച്ച സിആര്‍പിഎഫ് ജവാന്മാരുടെ എണ്ണം 26 ആയി. ഇന്ന് ഉച്ചയ്ക്ക് 12.25നാണ് ഏറ്റുമുട്ടലുണ്ടായത്. മാവോയിസ്റ്റ് ബാധിത മേഖലയായ ദക്ഷിണ ബസ്തര്‍ ജില്ലയിലാണ് ആക്രമണമുണ്ടായത്. റോഡ് നിര്‍മ്മാണത്തിന് കാവല്‍ നിന്ന സൈനികരാണ് കൊല്ലപ്പെട്ടത്. മുന്നുറോളം മാവോയിസ്റ്റുകളാണ് ജവാന്‍മാരെ ആക്രമിച്ചത്. സുക്മ ജില്ലയിലെ ബുര്‍കപല്‍ചിന്താഗുഭ മേഖലയിലാണ് ഏറ്റുമുട്ടലുണ്ടായത്. ബസ്തറില്‍ മാവോയിസ്റ്റ് ആധിപത്യം ഏറ്റവും രൂക്ഷമായ പ്രദേശമാണിത്.

സിആര്‍പിഎഫ് 74ാം ബറ്റാലിയനിലെ ജവാന്‍മാരാണ് കൊല്ലപ്പെട്ടതെന്നാണ് റിപ്പോര്‍ട്ട്. ഇന്‍സ്‌പെക്ടര്‍ റാങ്കിലുള്ള ഓഫീസറും കൊല്ലപ്പെട്ടവരില്‍ ഉള്‍പ്പെടുന്നു. ഏറ്റുമുട്ടലില്‍ പരിക്കേറ്റവരെ ഹെലികോപ്റ്ററില്‍ ആശുപത്രിയിലേക്കു മാറ്റി. പ്രദേശത്തേക്ക് കൂടുതല്‍ സിആര്‍പിഎഫ് സംഘത്തെ അയയ്ക്കാന്‍ തീരുമാനിച്ചതായി മുതിര്‍ന്ന പൊലീസ് ഓഫീസര്‍ അറിയിച്ചു. ആക്രമണത്തെ അപലപിച്ച് പ്രധാനമന്ത്രി നരേന്ദ്ര മോഡി ട്വീറ്റ് ചെയ്തു. ആക്രമണം ഭീരുത്വമാണെന്ന് പ്രധാനമന്ത്രി വിമര്‍ശിച്ചു. സ്ഥിഗതികള്‍ നിരീക്ഷിച്ച് വരികയാണെന്നും അദ്ദേഹം ട്വീറ്ററില്‍ കുറിച്ചു.