ചൈനയ്‌ക്കെതിരെ കരുതലോടെ ഇന്ത്യ. ചൈനീസ് അധിനിവേശത്തെയും അതിര്‍ത്തിയിലെ പ്രകോപനപരമായ നീക്കത്തെയും പ്രതിരോധിച്ച് മേഖലയില്‍ മേല്‍ക്കൈ നേടാനാണ് ഇന്ത്യയുടെ ശ്രമം. ഇതിനായി ഇന്ത്യ സൈനികമായി സജ്ജമാകുന്നു. ചൈനീസ് അതിര്‍ത്തി കാക്കാനുള്ള ശ്രമം ആരംഭിച്ചു. നിലവില്‍ ചൈനീസ് അതിര്‍ത്തിയിലേക്കു വേണ്ടി 17 മൗണ്ടന്‍ സ്‌െ്രെടക് കോര്‍ വിഭാഗത്തെ രൂപീകരിച്ചിട്ടുണ്ട്. അടുത്ത ഘട്ടമായാണ് മറ്റൊരു ഡിവിഷന്‍ കൂടി ഉണ്ടാക്കുന്നത്.

പാക്കിസ്ഥാനുമായുള്ള 778 കിലോമീറ്റര്‍ നീളമുള്ള നിയന്ത്രണരേഖയിലാണ് ഇപ്പോള്‍ ഇന്ത്യന്‍ സൈന്യം ശ്രദ്ധയേറെ നല്‍കുന്നതെങ്കിലും ചൈനയുമായുള്ള 4,057 കിലോമീറ്റര്‍ ലൈന്‍ ഓഫ് ആക്ച്വല്‍ കണ്‍ട്രോള്‍ രേഖയില്‍, പതിയെ ആണെങ്കിലും ശക്തി നേടാനാണു ഇതിലൂടെ ലക്ഷ്യമിടുന്നത്. പഞ്ചാബിലെ പഠാന്‍കോട്ട് ആസ്ഥാനമാക്കിയുള്ള പുതിയ 72–ാം ഇന്‍ഫന്‍ട്രി ഡിവിഷന്‍ മൂന്നു വര്‍ഷത്തിനുള്ളില്‍ പൂര്‍ണമായി സജ്ജമാകും. ആദ്യം ഒരു ബ്രിഗേഡായിരിക്കും ഡിവിഷനു കീഴില്‍ ഉണ്ടാകുക. എന്നാല്‍ പൂര്‍ണ സജ്ജമാകുമ്പോഴേക്കും മൂന്നു ബ്രിഗേഡുകള്‍ ഉണ്ടാകുമെന്ന് പ്രതിരോധ വൃത്തങ്ങള്‍ അറിയിച്ചു.

2014 ജനുവരിയിലാണ് 17 മൗണ്ടന്‍ സ്‌ട്രൈക്ക് കോര്‍ വിഭാഗത്തിന്റെ പ്രവര്‍ത്തനം തുടങ്ങിയത്. അന്ന്, നിലവിലുണ്ടായിരുന്ന മൂന്ന് സ്‌ട്രൈക്ക് കോര്‍ ഡിവിഷനുകളും പാക്കിസ്ഥാനില്‍നിന്നുള്ള ആക്രമണത്തെ ചെറുക്കുന്നതിനാണു പ്രവര്‍ത്തിച്ചിരുന്നത്. 2021ല്‍ സേനാ വിഭാഗം പൂര്‍ണ സജ്ജമാകുമ്പോള്‍ കശ്മീരിലെ ലഡാക്കില്‍നിന്ന് അരുണാചല്‍ പ്രദേശ് വരെ ചൈനീസ് അതിര്‍ത്തിയില്‍, വന്‍ ആയുധശേഖരവും സമുദ്രനിരപ്പില്‍ നിന്ന് ഉയര്‍ന്ന സ്ഥലത്ത് പ്രവര്‍ത്തിക്കാന്‍ പരിശീലനം ലഭിച്ച രണ്ട് പുതിയ ഇന്‍ഫന്‍ട്രി ഡിവിഷനുകളും കര, വ്യോമ പ്രതിരോധ സംവിധാനങ്ങളും സഹിതം 90,274 സൈനികരുണ്ടാകും. പദ്ധതിക്ക് ആകെ 64,678 കോടി രൂപ ചെലവു വരുമെന്നാണു പ്രതീക്ഷിക്കുന്നത്.

ആണവ പോര്‍മുന വഹിക്കാന്‍ ശേഷിയുള്ള അഗ്‌നി പരമ്പരയിലെ ബാലിസ്റ്റിക് മിസൈലുകള്‍, യുദ്ധവിമാനങ്ങള്‍, ടാങ്കുകള്‍, ബ്രഹ്മോസ് സൂപ്പര്‍സോണിക് മിസൈലുകള്‍ തുടങ്ങിയവ ചൈനീസ് സൈനിക നീക്കത്തെ പ്രതിരോധിക്കാന്‍ പാകത്തില്‍ 17 കോര്‍ വിഭാഗത്തിനുണ്ടാകും. ബംഗാളിലെ പനാഗഢിലാണ് 17 കോറിലെ 59–ാം ഇന്‍ഫന്‍ട്രി ഡിവിഷന്‍ രൂപീകരിച്ചത്. ഇത് പൂര്‍ണസജ്ജമായിക്കൊണ്ടിരിക്കുകയാണ്. ഇനി 72–ാം ഡിവിഷന്‍ രൂപീകരിക്കുകയാണ് ലക്ഷ്യം. 17 കോര്‍ വിഭാഗത്തിന്റെ ആദ്യ സൈനിക അഭ്യാസം ഓഗസ്റ്റ് – സെപ്റ്റംബര്‍ മാസങ്ങളില്‍ ലഡാക്കില്‍ ഉണ്ടായേക്കുമെന്നും സൈനിക വൃത്തങ്ങള്‍ അറിയിച്ചു.