ഇന്ത്യയിലെ ഏറ്റവും വലിയ പാലമായ അരുണാചല്‍ പ്രദേശിലെ ഭൂപന്‍ ഹസാരിക പാലത്തിന് ചൈനയുടെ മുന്നറിയിപ്പ്. അരുണാചല്‍പ്രദേശിലെ നിര്‍മാണങ്ങളില്‍ ഇന്ത്യ സൂക്ഷിക്കണമെന്നാണ് വിദേശകാര്യ മന്ത്രാലയത്തിന്റെ മുന്നറിയിപ്പ്.

തെക്കന്‍ ടിബറ്റിന്റെ ഭാഗമാണ് അരുണാചല്‍ പ്രദേശ് എന്നാണ് ചൈനയുടെ വാദം. എന്നാല്‍ ഇന്ത്യ ചൈനയുടെ ഈ വാദത്തിനെതിരെ നിരവധി തവണകളില്‍ രംഗത്തു വന്നിരുന്നു. ചൈനയുമായുള്ള അതിര്‍ത്തിതര്‍ക്കത്തില്‍ ഇന്ത്യ സൂക്ഷ്മതയോടെയും സംയമനത്തോടെയും തീരുമാനമെടുക്കുമെന്നാണ് പ്രതീക്ഷയെന്ന് ചൈനീസ് വിദേശകാര്യമന്ത്രാലയം അറിയിച്ചു. അതിര്‍ത്തിത്തര്‍ക്കം ഇരുരാജ്യങ്ങളും ചര്‍ച്ചകളിലൂടെ വേണം പരിഹരിക്കാനെന്ന് ചൈന ഓര്‍മിപ്പിച്ചു. കഴിഞ്ഞ ദിവസമാണ് പ്രധാനമന്ത്രി നരേന്ദ്രമോഡി പാലത്തിന്റെ ഉദ്ഘാടനം നിര്‍വഹിച്ചത്.

കിഴക്കന്‍ സംസ്ഥാനങ്ങളായ അസം അരുണാചല്‍ പ്രദേശ് എന്നീ സംസ്ഥാനങ്ങളെ ബന്ധിപ്പിക്കുന്ന ഈ പാലം സൈനിക നീക്കത്തിനാണ് മുന്‍തൂക്കം നല്‍കുന്നത്. അടിയന്തര സാഹചര്യത്തില്‍ അസമില്‍നിന്ന് സൈന്യത്തിന് കരമാര്‍ഗം അരുണാചല്‍പ്രദേശിലേക്ക് എത്താന്‍ സഹായിക്കുന്നതാണ് പാലം. ടാങ്ക് അടക്കമുള്ള സൈനിക വാഹനങ്ങളുടെ നീക്കത്തിന് അനുയോജ്യമാണ് അതിര്‍ത്തിയില്‍ ബ്രഹ്മപുത്രയുടെ പോഷകനദിയായ ലോഹിത്തിനുകുറുകെ നിര്‍മിച്ച ഈ പാലം. 9.2 കിലോ മീറ്റര്‍ ദൂരമുള്ള ഈപാലം അസമില്‍ നിന്നും അരുണാചലിലേക്കുള്ള അഞ്ചുമണിക്കൂര്‍ ദൈര്‍ഖ്യമുള്ള 165 കിലോമീറ്റര്‍ യാത്രയ്ക്കാണ് അറുതി വരുത്തിയിരിക്കുന്നത്.

നേരത്തെ ദലൈലാമയുടെ അരുണാചല്‍ സന്ദര്‍ശനത്തേയും ചൈന എതിര്‍ത്തിരുന്നു. ഇതേത്തുടര്‍ന്ന് ചൈനയുമായുള്ള ഉച്ചകോടിയില്‍ നിന്നും ഇന്ത്യ വിട്ടുനിന്നിരുന്നു. ചൈന 1959ല്‍ ദലൈലാമയെ ടിബറ്റില്‍ നിന്നും പുറത്താക്കുകയായിരുന്നു. ഇന്ത്യയാണ് അദ്ദേഹത്തിന് അഭയം നല്‍കിയത്.