തമിഴ്‌നാട്ടില്‍ വീണ്ടും രാഷ്ട്രീയ പ്രതിസന്ധി രൂക്ഷമാകുന്നു; 19 എംഎല്‍എമാര്‍ ദിനകരനൊപ്പം
തമിഴ്‌നാട്ടില്‍ വീണ്ടും രാഷ്ട്രീയ പ്രതിസന്ധി രൂക്ഷമാക്കി അണ്ണാ ഡിഎംകെയിലെ ലയന ചര്‍ച്ചകള്‍ വഴിമുട്ടി. വി.കെ.ശശികല, ടി.ടി.വി.ദിനകരന്‍ എന്നിവര്‍ക്കെതിരെ കടുത്ത നടപടിയെടുത്താല്‍ മാത്രമേ ലയനം സാധ്യമാകൂവെന്ന് പനീര്‍സെല്‍വം വിഭാഗം വ്യക്തമാക്കിയതോടെയാണ് ലയനനീക്കം വീണ്ടും പ്രതിസന്ധിയിലായത്.
ചര്‍ച്ചകള്‍ വഴിമുട്ടിയതോടെ പനീര്‍സെല്‍വം അണ്ണാ ഡിഎംകെ ആസ്ഥാനത്ത് എത്തില്ലെന്ന് ഉറപ്പായി. മുഖ്യമന്ത്രി എടപ്പാടി കെ. പളനിസാമിയുടെ നേതൃത്വത്തിലുള്ള വിഭാഗവും പനീര്‍സെല്‍വം വിഭാഗവും ചെന്നൈയില്‍ പ്രത്യേകം യോഗം ചേര്‍ന്നിരുന്നു.
ഇതിനിടെ, ടി.ടി.വി. ദിനകരന്‍ വിളിച്ച യോഗത്തില്‍ 19 എംഎല്‍എമാര്‍ പരസ്യ പിന്തുണയുമായെത്തി. ഈ സാഹചര്യത്തില്‍ ശശികലയ്ക്കും ബന്ധുക്കള്‍ക്കുമെതിരെ കടുത്ത നടപടിയെടുക്കുന്നത് ഭരണ പ്രതിസന്ധിയുണ്ടാക്കുമെന്ന് പളനിസാമി വിഭാഗം ഒപിഎസ് വിഭാഗത്തെ അറിയിച്ചു.
മുഖ്യമന്ത്രി എടപ്പാടി കെ. പളനിസാമിയുടെ നേതൃത്വത്തിലുള്ള വിഭാഗം പാര്‍ട്ടി ആസ്ഥാനത്താണ് യോഗം ചേര്‍ന്നത്. ഗ്രീന്‍വെയ്‌സ് റോഡിലെ തന്റെ വീട്ടിലാണ് മുന്‍ മുഖ്യമന്ത്രി ഒ. പനീര്‍സെല്‍വം യോഗം വിളിച്ചത്. ഇപിഎസ് പക്ഷത്തുനിന്നു പച്ചക്കൊടി ലഭിച്ചാല്‍ പനീര്‍സെല്‍വവും നേതാക്കളും പാര്‍ട്ടി ആസ്ഥാനത്തെത്തുമെന്ന് റിപ്പോര്‍ട്ടുകളുണ്ടായിരുന്നു.
മുഖ്യമന്ത്രി സ്ഥാനത്തുനിന്നു രാജിവച്ചശേഷം ഫെബ്രുവരി അഞ്ചിനാണ് പനീര്‍സെല്‍വം അവസാനമായി എഐഎഡിഎംകെ ആസ്ഥാനത്തെത്തിയത്. അതേസമയം ലയനനീക്കം സജീവമായതിനിടെ ഗവര്‍ണര്‍ സി. വിദ്യാസാഗര്‍ റാവു ചെന്നൈയിലെത്തിയിരുന്നു. ലയനം സാധ്യമായാല്‍ മന്ത്രിസഭ വികസിപ്പിച്ചേക്കുമെന്നും പനീര്‍സെല്‍വം പക്ഷത്തുനിന്ന് ചിലര്‍ മന്ത്രിസഭയില്‍ എത്തുമെന്നും സൂചനകളുണ്ടായിരുന്നു. അതിനിടെ, ചൊവ്വാഴ്ച മുതല്‍ നടക്കേണ്ട അമിത് ഷായുടെ തമിഴ്‌നാട് സന്ദര്‍ശനം റദ്ദാക്കി.
https://www.facebook.com/Malayalivartha
