തമിഴ്‌നാട്ടില്‍ പനീര്‍സെല്‍വം വിഭാഗവും പളനിസാമി വിഭാഗവും തമ്മില്‍ ലയിച്ചു: പനീര്‍സെല്‍വം ഉപമുഖ്യമന്ത്രി, ശശികല പുറത്ത്
തമിഴ്‌നാട്ടില്‍ പനീര്‍സെല്‍വം വിഭാഗവും പളനിസാമി വിഭാഗവും തമ്മില്‍ ലയിച്ചു. അണ്ണാ ഡിഎംകെ ആസ്ഥാനത്തു ചേര്‍ന്ന യോഗത്തിനുശേഷം നടത്തിയ വാര്‍ത്താസമ്മേളനത്തിലാണ് ലയനപ്രഖ്യാപനം നടത്തിയത്. പനീര്‍സെല്‍വത്തിനു ഉപമുഖ്യമന്ത്രി സ്ഥാനവും പാര്‍ട്ടി അധ്യക്ഷ സ്ഥാനവും നല്‍കിക്കൊണ്ടുള്ള ഒത്തുതീര്‍പ്പാണ് നിലവില്‍ ഉരുത്തിരിഞ്ഞിരിക്കുന്നത്.
കൂടാതെ ഒപിഎസ് വിഭാഗത്തിലെ രണ്ട് എംഎല്‍എമാരെ മന്ത്രിമാരാക്കുകയും ചെയ്യും. വൈകിട്ട് 4.30 ഓടെ സത്യപ്രതിജ്ഞ നടക്കുമെന്നാണ് സൂചന. ഗവര്‍ണര്‍ വിദ്യാസാഗര്‍ റാവു അടിയന്തിരമായി മുംബൈയില്‍ നിന്നു ചെന്നൈയിലെത്തിയിട്ടുണ്ട്.
മുഖ്യമന്ത്രി സ്ഥാനത്തുനിന്നു രാജിവച്ചശേഷം ഫെബ്രുവരി അഞ്ചിനാണ് പനീര്‍സെല്‍വം അവസാനമായി എഐഎഡിഎംകെ ആസ്ഥാനത്തെത്തിയത്. ഒരുഘട്ടത്തില്‍ ചര്‍ച്ചകള്‍ വഴിമുട്ടിയ ലയനചര്‍ച്ചകളാണ് നാടകീയ നീക്കങ്ങളുമായി തിങ്കളാഴ്ച വീണ്ടും സജീവമായത്.
രണ്ടുവിഭാഗങ്ങളും തമ്മില്‍ ലയിക്കണമെങ്കില്‍ ശശികലയ്ക്കും ദിനകരനുമെതിരെ കടുത്ത നടപടി സ്വീകരിക്കണമെന്നായിരുന്നു പനീര്‍സെല്‍വത്തിന്റെ പ്രധാന ആവശ്യം. നാടകീയ നീക്കങ്ങള്‍ക്കൊടുവില്‍ പളനിസാമി പക്ഷം ഇത് അംഗീകരിക്കുകയായിരുന്നു. മുഖ്യമന്ത്രി എടപ്പാടി കെ. പളനിസാമിയുടെ നേതൃത്വത്തിലുള്ള വിഭാഗവും പനീര്‍സെല്‍വം വിഭാഗവും ചെന്നൈയില്‍ പ്രത്യേകം യോഗം ചേര്‍ന്നിരുന്നു.
ഇതിനിടെ, ടി.ടി.വി. ദിനകരന്‍ വിളിച്ച യോഗത്തില്‍ 19 എംഎല്‍എമാര്‍ പരസ്യ പിന്തുണയുമായെത്തി. ഈ സാഹചര്യത്തില്‍ ശശികലയ്ക്കും ബന്ധുക്കള്‍ക്കുമെതിരെ കടുത്ത നടപടിയെടുക്കുന്നതു ഭരണപ്രതിസന്ധിയുണ്ടാക്കുമെന്ന് പളനിസാമി വിഭാഗത്തില്‍ അഭിപ്രായമുയര്‍ന്നിരുന്നു. മുഖ്യമന്ത്രി എടപ്പാടി കെ. പളനിസാമിയുടെ നേതൃത്വത്തിലുള്ള വിഭാഗം പാര്‍ട്ടി ആസ്ഥാനത്താണ് യോഗം ചേര്‍ന്നത്. ഗീന്‍വെയ്‌സ് റോഡിലെ തന്റെ വീട്ടിലാണ് മുന്‍ മുഖ്യമന്ത്രി ഒ. പനീര്‍സെല്‍വം യോഗം വിളിച്ചത്.
https://www.facebook.com/Malayalivartha
