ഇന്ത്യയുടെ തദ്ദേശീയ ജിപിഎസ് സംവിധാനമായ നാവിക്കിനുള്ള ഉപഗ്രഹവുമായി കുതിച്ച പിഎസ്എല്വി സി39 വിക്ഷേപണം പരാജയപ്പെട്ടത് അമിതഭാരത്താല്
02 SEPTEMBER 2017 01:24 PM IST
മലയാളി വാര്ത്ത
അമിതഭാരം കാരണം വേഗം കുറഞ്ഞതാണ് ദൗത്യം പരാജയപ്പെടാന് ഇടയാക്കിയത്. വേഗം കുറഞ്ഞതോടെ പ്രതീക്ഷിച്ചിരുന്ന ഉയരത്തിലേക്കു റോക്കറ്റിന് എത്താനായില്ലെന്നും ശാസ്ത്രജ്ഞര് ചൂണ്ടിക്കാട്ടുന്നു.
ഐഎസ്ആര്ഒ ഉപഗ്രഹവിഭാഗം മേധാവി എസ്.കെ.ശിവകുമാര് ആണ് പരാജയകാരണത്തെ കുറിച്ചുള്ള വിശകലനം നടത്തിയത്. 'രൂപകല്പന ചെയ്തിരുന്നതിനേക്കാള് ഒരു ടണ് ഭാരം റോക്കറ്റിനു കൂടുതലുണ്ടായിരുന്നു. അതാണ് താപകവചം (ഹീറ്റ് ഷീല്ഡ്) വേര്പെടാത്തതിലേക്കു നയിച്ചത്. മാത്രമല്ല അമിതഭാരം വേഗതയെയും ബാധിച്ചു.
ഉദാഹരണത്തിന്, സെക്കന്ഡില് 9.5 കിലോമീറ്റര് വേഗത കൈവരിക്കേണ്ട റോക്കറ്റിന് 8.5 കിലോമീറ്ററേ എത്താനായുള്ളൂ. ഉദ്ദേശിച്ചിരുന്ന പാതയില് നിന്നു റോക്കറ്റിനു വ്യതിയാനവും സംഭവിച്ചിരുന്നു. സബ് ജിയോസിങ്ക്രോണസ് ട്രാന്സ്ഫര് ഓര്ബിറ്റിലേക്ക് എത്തുന്നതിനു പകരം അതിനു താഴെയുള്ള ഭ്രമണപഥത്തിലാണു റോക്കറ്റ് എത്തിയത്.
'വിക്ഷേപണ സമയത്തുണ്ടാകുന്ന വലിയ തോതിലുള്ള ചൂടില്നിന്ന് ഉപഗ്രഹത്തെ സംരക്ഷിക്കാനുള്ളതാണ് താപകവചം. ഭ്രമണപഥത്തിലേക്ക് ഉപഗ്രഹത്തെ എത്തിച്ചുകഴിഞ്ഞാല് താപകവചം തനിയെ വേര്പെടുകയാണ് ചെയ്യുക. നിര്ദേശങ്ങളും ക്രമീകരണങ്ങളും ഒരുക്കിയതിന് അനുസരിച്ച് പ്രവര്ത്തിച്ചെങ്കിലും പ്രായോഗികമായി ഇത് നടപ്പായില്ല. ഭാരം കൂടിയതിനാല്, പ്രതീക്ഷിത ഉയരമായ 20,650 കിലോമീറ്ററിലേക്ക് എത്തിയില്ല. ഈ ഘട്ടത്തില് 6000 കിലോമീറ്റര് ഉയരത്തിലേ വിക്ഷപണ വാഹനം എത്തിയുള്ളൂ'ശിവകുമാര് പറഞ്ഞു.
ഐആര്എന്എസ്എസ-വണ് എച്ച് എന്ന ഉപഗ്രഹം സതീഷ് ധവാന് സ്പേസ് സെന്ററില് നിന്നാണു വിക്ഷേപിച്ചത്. ആദ്യ മൂന്നു ഘട്ടങ്ങളും വിജയം കണ്ടെങ്കിലും നാലാം ഘട്ടത്തില് താപകവചം (ഹീറ്റ് ഷീല്ഡ്) വേര്പെടാതിരുന്നതോടെ ദൗത്യം പരാജയപ്പെട്ടതായി ഐഎസ്ആര്ഒ ചെയര്മാന് എ.എസ്.കിരണ്കുമാര് സ്ഥിരീകരിച്ചിരുന്നു. അതേസമയം, വിക്ഷേപണം പരാജയപ്പെട്ടതിനെക്കുറിച്ചുള്ള ഐഎസ്ആര്ഒ ശാസ്ത്രജ്ഞരുടെ പരിശോധനകള് പുരോഗമിക്കുകയാണ്.
അപ്പപ്പോഴുള്ള വാര്ത്തയറിയാന് ഞങ്ങളുടെ ഫേസ്ബുക്ക് പേജ് LIKE ചെയ്യുക
https://www.facebook.com/Malayalivartha
https://www.facebook.com/Malayalivartha
