പ്രാണവായു ലഭിക്കാതെ ഉത്തര്‍ പ്രദേശില്‍ വീണ്ടും ശിശുമരണം. ഫറൂഖാബാദിലെ സര്‍ക്കാര്‍ ആശുപത്രിയില്‍ ഒരു മാസത്തിനിടെ 49 നവജാത ശിശുക്കളാണ് ഓക്‌സിജന്‍ ലഭിക്കാതെ മരിച്ചത്. ജൂലൈ 21നും ഓഗസ്റ്റ് 20നും ഇടയിലെ ഞെട്ടിപ്പിക്കുന്ന കണക്കാണിത്. ഡോ. റാം മനോഹര്‍ ലോഹ്യ ആശുപത്രിയിലെ ശിശുമരണത്തില്‍ ജില്ലാ മജിസ്‌ട്രേറ്റ് അന്വേഷണത്തിന് ഉത്തരവിട്ടു. കഴിഞ്ഞമാസം ഗോരഖ്പുര്‍ ജില്ലയിലെ ബാബാ രാഘവ് ദാസ് മെഡിക്കല്‍ കോളജ് ആശുപത്രിയില്‍ 300ല്‍ അധികം കുട്ടികള്‍ ഓക്‌സിജന്‍ ലഭിക്കാതെ മരിച്ചിരുന്നു.

അതേസമയം, നവജാതശിശുക്കളുടെ തൂക്കക്കുറവും, ഗുരുതരാവസ്ഥയിലായ കുട്ടികളെ ആശുപത്രിയില്‍ എത്തിക്കാന്‍ വൈകുന്നതുമാണ് മരണകാരണമെന്നാണ് ആശുപത്രി അധികൃതരുടെ വിശദീകരണം. ആശുപത്രിയിലെ നവജാതശിശുക്കളുടെ ഇന്റന്‍സീവ് കെയര്‍ യൂണിറ്റില്‍ (എസ്എന്‍സിയു) 30 കുട്ടികള്‍ മരിച്ചു. മറ്റു 19 പേര്‍ പ്രസവത്തോടെയോ പ്രസവിച്ചയുടനെയോ ആണ് മരിച്ചത്. അമ്മമാരുടെ അറിവില്ലായ്മയും കുട്ടികളുടെ മരണത്തിനു പിന്നിലുണ്ടെന്നും ഡോക്ടര്‍മാര്‍ പറയുന്നു. അടിയന്തരമായി ശസ്ത്രക്രിയ നടത്തേണ്ടതാണെങ്കിലും തീരുമാനമെടുക്കാതെ കുടുംബാംഗങ്ങള്‍ അതു വൈകിപ്പിക്കാറുണ്ട്. പലപ്പോഴും അതീവ ഗുരുതാവസ്ഥയിലായ ശേഷമേ കുട്ടികളെ ആശുപത്രിയിലെത്തിക്കാറുള്ളെന്നും ഇവര്‍ അറിയിച്ചു.

ഈ കാലയളവില്‍ 211 കുട്ടികളാണ് എസ്എന്‍സിയുവില്‍ അഡ്മിറ്റ് ആയിരിക്കുന്നത്. ഇതില്‍ 30 പേര്‍ മരിച്ചു. ഇതില്‍ 24 പേര്‍ സ്വകാര്യ ആശുപത്രിയിലോ മറ്റിടങ്ങളിലോ ആണ് ജനിച്ചത്. അവരെ ഇവിടെ എത്തിച്ചപ്പോള്‍ മോശം അവസ്ഥയിലായിരുന്നുവെന്ന് മെഡിക്കല്‍ സൂപ്രണ്ട് ഡോ. അഖിലേഷ് അഗര്‍വാള്‍ അറിയിച്ചു. 461 കുട്ടികളാണ് ഈ കാലയളവില്‍ ഇവിടെ ജനിച്ചത്. ഇതില്‍ 19 പേര്‍ മരിച്ചു. എന്നാല്‍ ഈ കുട്ടികളുടെ മരണകാരണത്തെക്കുറിച്ചുള്ള ചോദ്യങ്ങള്‍ക്ക് ആശുപത്രി അധികൃതര്‍ മറുപടി നല്‍കിയില്ല.

അതേസമയം, ശിശുക്കളുടെ മരണത്തില്‍ വിശദീകരണം നല്‍കാതെ ആശുപത്രി അധികൃതര്‍ക്ക് രക്ഷപ്പെടാനാകില്ലെന്ന് ജില്ലാ ഭരണകൂടം അറിയിച്ചു. ജില്ലാ മജിസ്‌ട്രേറ്റ് രവീന്ദ്രകുമാര്‍ അയച്ച 19 നോട്ടിസുകള്‍ക്കു ആശുപത്രി അധികൃതര്‍ ഇതുവരെ മറുപടി നല്‍കിയിട്ടില്ല. രണ്ടു ദിവസത്തിനുള്ളില്‍ റിപ്പോര്‍ട്ട് നല്‍കുമെന്നും എല്ലാ വശങ്ങളും അന്വേഷിക്കുമെന്നും അധികൃതര്‍ അറിയിച്ചു.