സോണിയയെ വധിക്കാന്‍ ഖാലിസ്‌ഥാന്‍ പദ്ധതിയിട്ടിരുന്നുവെന്ന്‌ നട്‌വര്‍ സിങ്‌
കേരളത്തില്‍ വച്ച്‌ സോണിയാ ഗാന്ധിയെ വധിക്കാന്‍ ഖാലിസ്‌ഥാന്‍ തീവ്രവാദികള്‍ പദ്ധതിയിട്ടിരുന്നുവെന്ന്‌ മുന്‍ കേന്ദ്ര മന്ത്രി നട്‌വര്‍ സിങ്ങിന്റെ വെളിപ്പെടുത്തല്‍. നട്‌വര്‍ സിങ്ങിന്റെ വിവാദ പുസ്‌തകമായ വണ്‍ ലൈഫ്‌ ഈസ്‌ നോട്ട്‌ ഇനഫിലാണ്‌ ഇതിനെ കുറിച്ച്‌ പറഞ്ഞിരിക്കുന്നത്‌.
1995 ല്‍ നരസിംഹ റാവു പ്രധാനമന്ത്രിയായിരിക്കുമ്പോഴാണ്‌ സംഭവം നടന്നത്‌. കേരളത്തില്‍ ഒരു സമ്മേളനത്തിനെത്തുമ്പോള്‍ വധിക്കാനായിരുന്നു പദ്ധതിയിട്ടിരുന്നതെന്ന്‌ പുസ്‌തകത്തില്‍ പറയുന്നു. സംഭവത്തെ കുറിച്ചറിഞ്ഞ റാവു സോണിയയുടെ സുരക്ഷയ്‌ക്ക്‌ പ്രത്യേക കമാന്‍ഡോകളെ നിയോഗിച്ചെന്നും നട്‌വര്‍ വെളിപ്പെടുത്തിയിരിക്കുന്നു. സോണിയാ ഗാന്ധിയും നരസിംഹ റാവുവും തമ്മില്‍ അകല്‍ച്ചയിലായിരുന്നുവെന്നും പുസ്‌കത്തില്‍ പറയുന്നു. ഇക്കാര്യങ്ങള്‍ വ്യക്‌തമാക്കുന്ന ഭാഗത്താണ്‌ വധഗൂഡാലോചനയെക്കുറിച്ച്‌ വ്യക്‌തമാക്കിയിരിക്കുന്നത്‌. അതേസമയം ഇരുവരും തമ്മിലുള്ള അകല്‍ച്ച എന്തിന്റെ പേരിലായിരുന്നുവെന്നു മാത്രം നട്‌വര്‍ പുസ്‌തകത്തില്‍ വെളിപ്പെടുത്തുന്നില്ല.
ഖാലിസ്‌ഥാന്‍ തീവ്രവാദികളുടെ ഗൂഡാലോചനയെക്കുറിച്ച്‌ നരസിംഹ റാവു തന്നോടാണ്‌ പറഞ്ഞിരുന്നതെന്നും താന്‍ ഇക്കാര്യം സോണിയാ ഗാന്ധിയെ അറിയിച്ചിരുന്നുവെന്നും നട്‌വര്‍ വെളിപ്പെടുത്തിയിരിക്കുന്നു. എന്നാല്‍ ഭീഷണിയൊന്നും വകവയ്‌ക്കാതെ സോണിയാ ഗാന്ധി കേരളത്തില്‍ എത്തിയെന്നും സമ്മേളനത്തില്‍ പങ്കെടുത്തുവെന്നും നട്‌വര്‍ പുസ്‌തകത്തില്‍ രേഖപ്പെടുത്തിയിട്ടുണ്ട്‌.
https://www.facebook.com/Malayalivartha
