ബലാല്‍സംഗ വിരുദ്ധ ബില്‍ മധുരപ്പതിനെട്ടില്‍ തട്ടി നില്‍ക്കുമോ? എല്ലാകക്ഷികളുടേയും പിന്തുണ തേടിക്കൊണ്ട്‌ ഇന്ന് സര്‍വകക്ഷി യോഗം
സ്‌ത്രീകള്‍ക്കെതിരായ അതിക്രമങ്ങള്‍ക്ക്‌ കടുത്ത ശിക്ഷ നല്‍കണം എന്ന്‌ നിര്‍ദേശിക്കുന്ന ബലാല്‍സംഗ വിരുദ്ധ ബില്‍ ഇന്ന് സര്‍വകക്ഷി യോഗത്തില്‍ ചര്‍ച്ചചെയ്യും. എല്ലാ കക്ഷികളുടേയും പിന്തുണ നേടിയെടുക്കുക എന്നതാണ്‌ കേന്ദ്ര സര്‍ക്കാരിന്റെ ലക്ഷ്യം. എന്നാല്‍ സമ്മതത്തോടെയുള്ള ലൈംഗിക ബന്ധത്തിന്റെ പ്രായ പരിധി 18 ല്‍ നിന്ന് 16 ആക്കുക എന്ന ഭേദഗതിയോട്‌ യു.പി.എ സര്‍ക്കാരിനെ പുറത്തു നിന്ന് പിന്തുണക്കുന്ന സമാജ്‌ വാദി പാര്‍ട്ടി പോലും പിന്തുണക്കുന്നില്ല. മുഖ്യ പ്രതിപക്ഷമായ ബി.ജെ.പിക്കും ബില്ലിലെ ഈ വ്യവസ്ഥയോട്‌ യോജിപ്പില്ല. പ്രായം പതിനെട്ടില്‍ തന്നെ നിലനിര്‍ത്തി ബില്ല്‌ ഉടന്‍ പാസാക്കണം എന്നതാണ്‌ ബി.ജെ.പി നിലപാട്‌.
ഡല്‍ഹി പീഡനത്തിന്റെ പശ്ചാത്തലത്തില്‍ സ്‌ത്രീകള്‍ക്കെതിരെയുള്ള അതിക്രമങ്ങളെകുറിച്ച്‌ പഠിക്കാന്‍ നിയോഗിച്ച ജസ്‌റ്റിസ്‌ വര്‍മ കമ്മീഷന് നിര്‍ദേശിച്ച ശുപാര്‍ശകള്‍ ഉള്‍പെടുത്തി കൊണ്ടുള്ളതാണ്‌ ബില്ല്‌. കഴിഞ്ഞ വ്യാഴാഴ്‌ചയാണ്‌ ബില്ലിന്‌ കേന്ദ്രമന്ത്രിസഭായോഗം അംഗീകാരം നല്‍കിയത്‌. വരുന്ന വെള്ളിയാഴ്‌ച ബില്ലിന്റെ കാലാവധി അവസാനിക്കാനിരിക്കെ വ്യാഴാഴ്‌ച പാര്‍ലമെന്റില്‍ അവതരിപ്പിച്ച്‌ പാസാക്കാനാണ്‌ കേന്ദ്രസര്‍ക്കാര്‍ ലക്ഷ്യമിടുന്നത്‌. ഇതിന്റെ ഭാഗമായി എല്ലാ കക്ഷികളുടേയും പിന്തുണ നേടുന്നതിനായി ബില്ലില്‍ സമവായമുണ്ടാക്കാനാണ്‌ ഇന്ന് സര്‍വക്ഷിയോഗം വിളിച്ചിരിക്കുന്നത്‌.
ബലാല്‍സംഗം എന്ന വാക്ക്‌ ലൈംഗിക പീഡനത്തിന്‌ പകരമായി ഉപയോഗിക്കണം എന്നാണ്‌ പുതിയ നിയമത്തില്‍ പറയുന്നത്‌. കൂടാതെ ബലാല്‍സംഗത്തിനിടയില്‍ ഇരകള്‍ കൊല്ലപ്പെടുകയാണെങ്കില്‍ പ്രതികള്‍ക്ക്‌ വധശിക്ഷ നല്‍കാനും ബില്ലില്‍ വ്യവസ്ഥ ചെയ്യുന്നു.
https://www.facebook.com/Malayalivartha
