വിവിധ സംസ്ഥാനങ്ങളിലെ എ.ടി.എമ്മുകള്‍ കാലിയായതോടെ രാജ്യത്ത് ഉടലെടുത്ത കറന്‍സി ക്ഷാമം കൂടുതല്‍ സംസ്ഥാനങ്ങളിലേക്ക് വ്യാപിക്കുന്നു. വ്യവസായ നഗരമായ മുംബയ് ഉള്‍പ്പെടെയുള്ള നഗരങ്ങള്‍ കടുത്ത നോട്ട് ക്ഷാമം നേരിടുകയാണെന്ന് ദേശീയ മാദ്ധ്യമങ്ങള്‍ റിപ്പോര്‍ട്ട് ചെയ്യുന്നു. ഉടന്‍ തന്നെ ഈ പ്രതിസന്ധി മറ്റ് സംസ്ഥാനങ്ങളിലേക്കും വ്യാപിക്കുമെന്നും റിപ്പോര്‍ട്ടുകള്‍.ഡല്‍ഹിയിലും നിയമസഭാ തിരഞ്ഞെടുപ്പിന്റെ പടിവാതിലിലെത്തിയ കര്‍ണാടകയിലും ഉള്‍പ്പെടെ എട്ടോളം സംസ്ഥാനങ്ങളില്‍ മിക്ക എ.ടി.എമ്മുകളും പണമില്ലാത്തത് ജനത്തെ വലച്ചിരുന്നു. ആന്ധ്രപ്രദേശ്, തെലങ്കാന, രാജസ്ഥാന്‍, ഗുജറാത്ത്, ഉത്തര്‍പ്രദേശ്, മഹാരാഷ്ട്ര, ബീഹാര്‍ തുടങ്ങിയ സംസ്ഥാനങ്ങളിലാണ് എ.ടി.എം പ്രതിസന്ധി.

വിഷയം മാദ്ധ്യമങ്ങള്‍ ഏറ്റുപിടിക്കുകയും പ്രതിപക്ഷം കേന്ദ്രസര്‍ക്കാരിനെതിരെ രാഷ്ട്രീയ ആയുധമാക്കുകയും ചെയ്തതോടെ നടപടികളുമായി ധനമന്ത്രാലയവും റിസര്‍വ് ബാങ്കും രംഗത്തെത്തിയിരുന്നു.
അതേസമയം കേരളത്തിലെ എല്ലാബാങ്കുകളിലും എ.ടി.എമ്മുകളിലും ആവശ്യത്തിന് കറന്‍സിയുണ്ടെന്ന് അവകാശപ്പെടുന്നുണ്ടെങ്കിലും ജനങ്ങള്‍ ആശങ്കയിലാണ്.

ഏറ്റവും അധികം ശാഖകളുള്ള എസ്. ബി.ഐയിലും ലീഡ് ബാങ്കായ കനറാ ബാങ്കിലും മറ്റു ബാങ്കുകളിലും നോട്ടിന് ക്ഷാമമില്ലെന്നാണ് റിപ്പോര്‍ട്ട്. അല്പമെങ്കിലും കുറവ് അനുവഭവപ്പെടുന്നത് 500 രൂപ നോട്ടിനാണ്. അതും പ്രകടമല്ല. റിസര്‍വ് ബാങ്ക് പുതിയ 500 രൂപ നോട്ട് പ്രിന്റ് ചെയ്യുന്നുണ്ട്. അത് മൂന്നാഴ്ചക്കുള്ളില്‍ ബാങ്കുകളിലെത്തും.