ഗ്രൗണ്ട് ജീവനക്കാരന് മൊബൈല് ഫോണ് മറന്നുവച്ചു...വിമാനം പുറപ്പെടാന് രണ്ടു മണിക്കൂര് വൈകി
വിമാനം പുറപ്പെടുന്നതിന് മുമ്പ് സെക്കന്ഡുകള്ക്ക് മുമ്പ് ഗ്രൗണ്ട് ജീവനക്കാരന് മൊബൈല് ഫോണ് മറന്നുവച്ചതിനെ തുടര്ന്ന് വിമാനം രണ്ട് മണിക്കൂര് വൈകി. ലണ്ടനിലെ ഹീത്രൂ വിമാനത്താവളത്തില് നിന്ന് അഹമ്മദാബാദിലേക്ക് പോയ എയര്ഇന്ത്യയുടെ ഡ്രീംലൈനര് വിമാനത്തില് മാര്ച്ച് 18നാണ് സംഭവം നടന്നത്. എയര്ഇന്ത്യയുടെ ബോയിംഗ് 787 വിമാനം പുറപ്പെടുന്നതിനായി ഉച്ചയ്ക്ക് രണ്ട് മണിയോടെ വിമാനത്താവളത്തിലെ ടാക്സി ബേയിലേക്ക് എത്താന് തുടങ്ങുന്നതിനിടെയാണ് സംഭവം. വിമാനത്തില് പരിശോധന നടത്തിയ മെയിന്റനന്സ് എന്ജിനീയറാണ് മൊബൈല് മറന്നുവച്ചത്. ഉടന് തന്നെ എന്ജിനീയറോട് എത്തി മൊബൈല് ഫോണ് കൈപ്പറ്റാന് കമാന്ഡര് അറിയിച്ചു. വിമാനത്തിന്റെ ചുമതലുണ്ടായിരുന്ന കാബിന് ക്രൂവിനോട് വാതില് തുറന്ന് തലയണയില് പൊതിഞ്ഞ് ഭദ്രമായി വച്ചിരുന്ന ഫോണ് താഴേക്ക് എറിഞ്ഞു കൊടുക്കാന് കമാന്ഡര് നിര്ദ്ദേശിച്ചു. ഇതിനായി വാതില് റീസൈക്കിള് ചെയ്യാനും നിര്ദ്ദേശിച്ചു.
വാതില് റീസൈക്കിള് എന്നത് അടിയന്തരഘട്ടങ്ങളില് മാത്രം ചെയ്യുന്നതാണ്. സധാരണ വിമാനത്തിന്റെ വാതിലുകള് സ്വയം പ്രവര്ത്തിക്കുന്ന തരത്തിലോ അല്ലാതെയോ പ്രവര്ത്തിക്കുന്ന തരത്തിലായിരിക്കും സംവിധാനം ചെയ്തിരിക്കുക. വിമാനം പുറപ്പെടുന്നതിന് മുമ്പ് മാനുവല് മോഡിലോ അല്ലെങ്കില് സ്വയം അടയുന്ന സംവിധാനം (ഓട്ടോമറ്റിക് അല്ലെങ്കില് ആംഡ് മോഡ്) പ്രവര്ത്തിപ്പിക്കാനോ ആണ് കമാന്ഡര് നിര്ദ്ദേശം നല്കുക.
എന്നാല്, കമാന്ഡറുടെ നിര്ദ്ദേശം എത്തിയപ്പോള് പരിഭ്രാന്തയായ കാബിന് ക്രൂ വാതില്, മാനുവല് മോഡിലേക്ക് മാറ്റാന് മറന്നുപോയി. ഇതോടെ ആംഡ് മോഡില് നിന്ന് തന്നെ വിമാനത്തിന്റെ വാതില് തുറന്നു. അടിയന്തര ഒഴിപ്പിക്കല് ഘട്ടങ്ങളില് മാത്രമാണ് ഇത്തരത്തില് വാതില് തുറക്കാറുള്ളത്.
വിമാനത്തിന്റെ വാതില് തുറന്നതോടെ യാത്രക്കാര്ക്ക് നിരങ്ങി താഴേക്കിറങ്ങി രക്ഷപ്പെടുന്നതിനുള്ള പ്ളാറ്റ്ഫോമും തയ്യാറായി. ആറ് സെക്കന്ഡിനുള്ളില് തന്നെ ഈ പ്രക്രിയ പൂര്ത്തിയായി.
എന്നാല്, തലയണയില് പൊതിഞ്ഞ മൊബൈല് ഫോണും പിടിച്ച് കാബിന് ക്രൂ മാത്രമാണ് വാതില്ക്കല് ഉണ്ടായിരുന്നത്. മാനുവല് മോഡിലേക്ക് മാറ്റിയിരുന്നെങ്കില് ഈ പ്രശ്നങ്ങളൊന്നും തന്നെ ഉണ്ടാവുമായിരുന്നില്ല. ഇങ്ങനെ പുറത്തേക്ക് വരുന്ന പ്ളാറ്റ്ഫോം കാര്ഗോ കംപാര്ട്ട്മെന്റില് പൂര്വാവസ്ഥയില് എത്തിക്കണമെങ്കില് എന്ജിനീയറിംഗ് വിഭാഗം തന്നെ വേണം. തുടര്ന്ന് ഉദ്യോഗസ്ഥരെത്തിയാണ് പ്ളാറ്റ്ഫോം പൂര്വാവസ്ഥയില് എത്തിച്ചത്, നടപടിക്രമങ്ങളെല്ലാം പൂര്ത്തിയാക്കി വിമാനം പുറപ്പെട്ടപ്പോള് സമയം ഉച്ചയ്ക്ക് 3.46 ആയിരുന്നു.
https://www.facebook.com/Malayalivartha
