കര്‍ണാടക നിയമസഭയില്‍ മുഖ്യമന്ത്രി എച്ച് ഡി കുമാരസ്വാമി വിശ്വാസം നേടി. മുഖ്യമന്ത്രി അവതരിപ്പിച്ച വിശ്വാസപ്രമേയം ശബ്ദ വോട്ടോടെയാണ് പാസായത്. തുടര്‍ന്ന്, വിശ്വാസ വോട്ടെടുപ്പ് നടപടികള്‍ പൂര്‍ത്തിയാക്കി നിയമസഭ പിരിഞ്ഞു. എന്നാല്‍, ബി ജെപി നിയമസഭ ബഹിഷ്‌കരിച്ചു. ബി ജെ പി എംഎല്‍എമാര്‍ സഭയില്‍ നിന്ന് ഇറങ്ങിപ്പോയി.

അതേസമയം, നിയമസഭയില്‍ വിശ്വാസപ്രമേയം അവതരിപ്പിക്കുന്നതിനിടെ എച്ച് ഡി കുമാരസ്വാമി പിതാവും മുതിര്‍ന്ന ജെ ഡി എസ് നേതാവുമായ എച്ച് ഡി ദേവഗൗഡയോട് മാപ്പു പറഞ്ഞു. ബിജെപിയുമായി മുമ്പ് സഖ്യം ഉണ്ടാക്കിയതിനാണ് മാപ്പു പറഞ്ഞത്. അന്നത്തെ തന്റെ നിലപാട് ദേവഗൗഡയെ വേദനിപ്പിച്ചെന്നും കുമാരസ്വാമി പറഞ്ഞു.

കുമാരസ്വാമിയെ ആക്രമിച്ചും മുന്‍ മുഖ്യമന്ത്രിയും കോണ്‍ഗ്രസ് നേതാവുമായ സിദ്ദരാമയ്യയോട് സഹതപിച്ചുമായിരുന്നു ബിജെപി നേതാവ് ബി എസ് യെദ്യൂരപ്പയുടെ പ്രസംഗം. കുമാരസ്വാമിയെ മുമ്പ് പിന്തുണച്ചതില്‍ ഖേദമുണ്ടെന്ന് യെദ്യൂരപ്പ പറഞ്ഞു. തന്റെ പോരാട്ടം ജനതാദളിന് എതിരെയാണ്. ഡി കെ ശിവകുമാര്‍ ഭാവിയില്‍ ദുഃഖിക്കേണ്ടി വരുമെന്നും ബി എസ് യെദ്യൂരപ്പ പറഞ്ഞു. കാര്‍ഷികവായ്പ എഴുതി തള്ളിയില്ലെങ്കില്‍ 28ന് കര്‍ണാടകയില്‍ ബന്ദ് പ്രഖ്യാപിക്കുമെന്ന് വ്യക്തമാക്കിയ യെദ്യൂരപ്പ കടങ്ങള്‍ എഴുതി തള്ളാന്‍ കുമാരസ്വാമിക്ക് കഴിയില്ലെന്നും പറഞ്ഞു.

നിയമസഭയില്‍ നിലവില്‍ കോണ്‍ഗ്രസിന് 78 എം എല്‍ എമാരും ജെ ഡി എസിന് 36 എം എല്‍ എമാരും ബി എസ് പിക്ക് ഒരു എം എല്‍ എയുമാണുള്ളത്. എന്നാല്‍, 104 എം എല്‍ എമാരാണ് ബിജെപിക്കുള്ളത്. ഇതിനിടെ, ബിജെപി നേതാവ് ബി എസ് യെദ്യൂരപ്പയെ നിയമസഭാ പ്രതിപക്ഷനേതാവായി സ്പീക്കര്‍ കെ ആര്‍ രമേശ് കുമാര്‍ പ്രഖ്യാപിച്ചു. ഗോവിന്ദ് കര്‍ജോള്‍ ആയിരിക്കും പ്രതിപക്ഷ ഉപനേതാവ്.

അതേസമയം കര്‍ണാടകയില്‍ അടുത്ത അഞ്ച് വര്‍ഷവും കുമാരസ്വാമി തന്നെ മുഖ്യമന്ത്രിയായി തുടരുമെന്ന് ഉറപ്പില്ലെന്ന് ഉപമുഖ്യമന്ത്രി ജി പരമേശ്വര. അഞ്ചു വര്‍ഷം എന്തൊക്കെ ചെയ്യണം എന്നതടക്കം എല്ലാ നടപടിക്രമങ്ങളും ഇനി ചര്‍ച്ച ചെയ്യേണ്ടതുണ്ടെന്നും അദ്ദേഹം അറിയിച്ചു. മുഖ്യമന്ത്രി ആരാകണമെന്നതിലുപരി നല്ലഭരണം കാഴ്ച വയ്ക്കുകയാണ് പ്രധാന ലക്ഷ്യം.

പാര്‍ട്ടിയിലെ സ്ഥാനങ്ങളുടെ പേരില്‍ പ്രവര്‍ത്തകര്‍ക്ക് അതൃപ്തിയുണ്ടെന്ന കാര്യത്തില്‍ മാധ്യമ റിപ്പോര്‍ട്ടുകള്‍ വഴിയുള്ള അറിവ് മാത്രമെയുള്ളൂവെന്നും സ്ഥാനങ്ങള്‍ക്കു വേണ്ടി ആരും തന്നോടോ രാഹുല്‍ ഗാന്ധിയോടെ സംസാരിച്ചിട്ടില്ലെന്നും പരമേശ്വര അറിയിച്ചിട്ടുണ്ട്. എന്നാല്‍ സ്ഥാനമാനങ്ങള്‍ ചോദിച്ചു വാങ്ങുന്നതില്‍ തെറ്റില്ലെന്നും അദ്ദേഹം കൂട്ടിച്ചേര്‍ത്തു.

വകുപ്പുകളുടെ കാര്യത്തിലും ധാരണയായിട്ടില്ല. ഏതൊക്കെ വകുപ്പുകളാണ് ജെഡിഎസിന് ഏതൊക്കെ വകുപ്പുകളാണ് കോണ്‍ഗ്രസിന് എന്ന കാര്യം ഇതുവരെ ചര്‍ച്ച ചെയ്തിട്ടില്ലെന്നും സഖ്യസര്‍ക്കാര്‍ ആയതിനാല്‍ ആര്‍ക്കാണ് സ്ഥാനം നല്‍കേണ്ടതെന്നു തീരുമാനിക്കുന്നത് കോണ്‍ഗ്രസ് ഹൈക്കമാന്‍ഡാണെന്നും ഉപമുഖ്യമന്ത്രി വ്യക്തമാക്കി.

മുഖ്യമന്ത്രിയോ ഉപമുഖ്യമന്ത്രിയോ ആകുന്നതിന് കഴിവുള്ള ധാരാളം പേര്‍ കോണ്‍ഗ്രസിലുണ്ട്. അത് തന്നെയാണ് പാര്‍ട്ടിയുടെ വിലയേറിയ സ്വത്തും. കൂടിക്കാഴ്ചകളും ചര്‍ച്ചകളും നടത്തിയില്ലെങ്കിലും പാര്‍ട്ടിയില്‍ എല്ലാവരും ഒറ്റക്കെട്ടാണെന്നും കോണ്‍ഗ്രസില്‍ നിന്നുള്ള ഉപമുഖ്യമന്ത്രി അറിയിച്ചിട്ടുണ്ട്. വിശ്വാസ വോട്ടെടുപ്പിന് മുമ്പായിരുന്നു പരമേശ്വരയുടെ ഇത്തരമൊരു പ്രതികരണം നടത്തിയത്.

കോണ്‍ഗ്രസ് നേതാവ് രാമലിംഗ റെഡ്ഡിയും പരമേശ്വരയുടെ വാക്കുകളെ പിന്തുണച്ചെത്തിയിട്ടുണ്ട്. അഞ്ച് വര്‍ഷവും കുമാരസ്വാമി തന്നെ തുടരുമെന്ന കാര്യം ഉറപ്പായിട്ടില്ലെന്നും പാര്‍ട്ടി ഹൈക്കമാന്‍ഡാണ് ഇക്കാര്യത്തില്‍ തീരുമാനമെടുക്കേണ്ടതെന്നുമായിരുന്നു അദ്ദേഹത്തിന്റെ പ്രതികരണം.