പ്രതിഷേധങ്ങളും യുവജനപ്രക്ഷോഭവുമൊന്നും വകവെക്കാതെ വിരമിച്ച ജീവനക്കാരെ നിയമിക്കാനുള്ള നീക്കവുമായി റെയില്‍വേ. തിരുവനന്തപുരം ഡിവിഷനില്‍ സുപ്രധാന സ്‌റ്റേഷന്‍ മാസ്റ്റര്‍ തസ്തികയില്‍ മാത്രം എട്ട് പേര്‍ക്കാണ് നിയമനം നല്‍കിയത്. ബാക്കിയുള്ള 32 പേരെ കണ്ടെത്താന്‍ ഊര്‍ജിതനീക്കം നടക്കുകയാണ്.
ലോക്കോ പൈലറ്റുമാര്‍ക്ക് പുറമേ ഇലക്ട്രിക്കല്‍, മെക്കാനിക്കല്‍, എന്‍ജിനീയറിങ് വിഭാഗങ്ങളിലെല്ലാം കരാര്‍ നിയമനം സജീവമായി നടക്കുകയാണ്. പതിനായിരക്കണക്കിന് ഉദ്യോഗാര്‍ഥികള്‍ ജോലി കാത്തുനില്‍ക്കേയാണ് റെയില്‍വേയുടെ ഈ നടപടി. പരോക്ഷ നിയമന നിരോധനത്തിന് പുറമേ വിരമിക്കല്‍ പ്രായം ദീര്‍ഘിപ്പിച്ചതിന് സമാനമായ സാഹചര്യമാണ് റെയില്‍വേയില്‍ ഉണ്ടായിരിക്കുന്നത്.

മെക്കാനിക്കല്‍ വിഭാഗത്തില്‍ 300 ട്രാക്ക്മാന്‍മാരെയാണ് നിയമിക്കുന്നത്. നിയമനങ്ങള്‍ കരാര്‍ സ്വഭാവത്തിലേക്ക് മാറ്റുന്നതോടെ പുതിയ റിക്രൂട്ട്‌മെന്റ് സാധ്യതകള്‍ നിലയ്ക്കുമെന്നാണ് ഉദ്യോഗാര്‍ഥികള്‍ പറയുന്നത്. റെയില്‍വേ റിക്രൂട്ട്മന്റെ് സെല്ലാണ് (ആര്‍.ആര്‍.സി)റെയില്‍വേ നിയമനങ്ങള്‍ നടത്തുന്നത്. വര്‍ഷത്തില്‍ രണ്ട് തവണ നോട്ടിഫിക്കേഷന്‍ പുറപ്പെടുവിച്ചാണ് റിക്രൂട്ട്‌മെന്റ്. കൃത്യമായ ആസൂത്രണത്തോടെ നിയമനങ്ങളെല്ലാം കരാര്‍ സ്വഭാവത്തിലാക്കാനുള്ള നീക്കത്തിന്റെ ഭാഗമാണ് വിരമിച്ചവര്‍ക്കുള്ള പുനര്‍നിയമനമെന്നാണ് വിലയിരുത്തല്‍. തിരുവനന്തപുരം ഡിവിഷനില്‍ ആകെ 763 തസ്തികകളാണ് വിരമിച്ച ജീവനക്കാര്‍ക്കായി നീക്കിവെച്ചിരിക്കുന്നത്. 62 വയസ്സാണ് കരാര്‍ അടിസ്ഥാനത്തിലുള്ള പുനര്‍നിയമനത്തിന് യോഗ്യത.
വിരമിക്കുമ്പോള്‍ ലഭിച്ച ശമ്പളത്തിന്റെ നേര്‍പകുതിയാണ് പുതിയ നിയമനങ്ങള്‍ക്ക് വേതനമായി നല്‍കുന്നത്. പെന്‍ഷനും നേര്‍പകുതിയാകും. 65 വയസ്സുവരെയാണ് പുനര്‍നിയമനം. നിലവില്‍ 60 വയസ്സാണ് റെയില്‍വേയില്‍ വിരമിക്കല്‍ പ്രായം. പുതിയ വിജ്ഞാപനത്തോടെ ഇപ്പോള്‍ വിരമിച്ചവര്‍ക്ക് അഞ്ച് വര്‍ഷത്തെ പുനര്‍നിയമനമാണ് ലഭിക്കുക. എല്ലാ വര്‍ഷവും ഇത്തരം നിയമനം നടക്കുന്നതോടെ സമീപഭാവിയിലും വിദൂരഭാവിയിലും പുതിയ നിയമനങ്ങളൊന്നും നടക്കില്ല.