ഡല്‍ഹിയില്‍ വിവാഹത്തില്‍ പങ്കെടുത്തു തിരികെ വീട്ടിലെത്തിയ അഞ്ചംഗ കുടുംബത്തിലെ അഞ്ച് വയസ്സുകാരന്‍ ടാക്‌സിയില്‍ നിന്നിറങ്ങി വീട്ടിലേക്കോടുമ്പോള്‍ പുലി പിടിച്ചുകൊണ്ട് പോയി. ശനിയാഴ്ച രാത്രിയാണ് പുലിയുടെ ആക്രമണമുണ്ടായത്. ഞായറാഴ്ച രാവിലെ കുട്ടിയുടെ ശരീരം സമീപത്തുള്ള കുറ്റിക്കാട്ടില്‍ നിന്ന് കണ്ടെത്തി. ഉത്തരാഖണ്ഡില്‍ അടുത്തിടെയായി തുടരുന്ന പുലികളുടെ ആക്രമണങ്ങളില്‍ ഒടുവിലത്തേതാണിത്.

കാര്‍ത്തിക് എന്ന കുട്ടിയെയാണ് അച്ഛനും അമ്മയും നോക്കി നില്‍ക്കെ പുലി പിടികൂടിയത്. ഇവര്‍ കാറില്‍ നിന്നിറങ്ങുന്നതിനിടെയില്‍ കാര്‍ത്തിക് ആദ്യം വീട്ടിലേക്കെത്തുന്നതിനായി ഓടിയപ്പോഴാണ് സംഭവം. പുലി സമീപത്തുള്ള ചെടികള്‍ക്കിടയില്‍ മറഞ്ഞിരിക്കുകയായിരുന്നുവെന്നാണ് കരുതുന്നത്. രാത്രി മുഴുവന്‍ നാട്ടുകാര്‍ തിരച്ചില്‍ നടത്തിയെങ്കിലും കാര്‍ത്തിക്കിനെ കണ്ടെത്താനായില്ല. ഞായറാഴ്ച രാവിലെ പാതി തിന്ന നിലയില്‍ ശരീരം കണ്ടെത്തുകയായിരുന്നു.

പുലിക്കു വേണ്ടിയുള്ള തിരച്ചില്‍ തുടര്‍ന്നുവെങ്കിലും കണ്ടെത്താന്‍ സാധിച്ചില്ല. ഈ പുലിയെ നരഭോജിയായി പ്രഖ്യാപിക്കണമെന്ന് നാട്ടുകാര്‍ ഇതോടെ ആവശ്യപ്പെട്ടു കഴിഞ്ഞു. അതേസമയം ഇത് വനമേഖലയായതിനാല്‍ ഒന്നിലധികം പുലികളുണ്ടാകാം എന്നാണ് അധികൃതരുടെ കണക്കുകൂട്ടല്‍. അതിനാല്‍ തന്നെ ഏത് പുലിയാണ് മനുഷ്യരെ ആക്രമിക്കുന്നതെന്ന് തിരിച്ചറിഞ്ഞ ശേഷം മാത്രമെ നരഭോജിയായി പ്രഖ്യാപിച്ച് വെടിവച്ചു കൊല്ലാനാകൂ എന്നാണ് ഇവരുടെ നിലപാട്.

ഉത്തരാഖണ്ഡില്‍ ഈ വര്‍ഷം പുലിയുടെ ആക്രമണത്തില്‍ കൊല്ലപ്പെടുന്ന നാലാമത്തെ ആളാണിത്. നേരത്തെ പുലി കൊന്നവരിലും രണ്ട് കുട്ടികളാണ് ഉള്‍പ്പെട്ടിരുന്നത്. ഉത്തരാഖണ്ഡിലെ തന്നെ ബാഗേഷ്വര്‍ ജില്ലയിലാണ് ഒരേ പുലി തന്നെ മാര്‍ച്ചില്‍ നാല് വയസ്സുകാരനേയും ഈ മാസം ആദ്യം ഏഴ് വയസ്സുകാരനെയും പിടികൂടി കൊന്നത്. ഈ പുലിയെ നരഭോജിയായി പ്രഖ്യാപിച്ച് രണ്ടാഴ്ച മുന്‍പ് വെടിവച്ചു കൊന്നിരുന്നു.