നെയ്യാറ്റിൻകര എംഎൽഎ ആയിരുന്ന ആർ. ശെൽവരാജിനെ യുഡിഎഫിലെത്തിച്ചതു സംബന്ധിച്ച്‌ നിർണായക വെളിപ്പെടുത്തലുമായി പി.സി. ജോർജ്ജ് എംഎൽഎ. സംഭവത്തിൽ എനിക്ക് ബ്രോക്കറുടെ റോൾ ആയിരുന്നു. കമ്യൂണിസ്റ്റ് പാർട്ടി വഞ്ചിക്കുകയാണ് ഇനി പാർട്ടിയിൽ തുടരാൻ പറ്റില്ല എന്നൊക്കെ സെൽവരാജ് തന്നോട് പറയുമായിരുന്നുവെന്നും അദ്ദേഹം പറഞ്ഞു.

ഈ അവസരത്തിലാണ് മൂന്ന് യുഡിഎഫ് നേതാക്കൾ എന്നെ വിളിച്ചത് ഞങ്ങൾ സംസാരിക്കുകയും ചെയ്തു. ഞാൻ തന്നെ ഇത് കൈകാര്യം ചെയ്യണമെന്നും അവർ ആവശ്യപ്പെട്ടു. ഉമ്മൻ ചാണ്ടി, കുഞ്ഞാലിക്കുട്ടി, രമേശ് ചെന്നിത്തല എന്നിവരാണ് ആ നേതാക്കളെന്നും പി.സി വെളിപ്പെടുത്തി. എന്നാൽ സിപിഎം വിചാരിക്കുന്നത് പോലെ ശെൽവരാജിന് പണം ഒന്നും നൽകിയിട്ടില്ലെന്നും നെയ്യാറ്റിൻകരയിൽ ശെൽവരാജ് പത്രസമ്മേളനം നടത്തുമ്പോഴാണ് സിപിഎം പോലും ഈ വിവരം അറിഞ്ഞതെന്നും അദ്ദേഹം വ്യക്തമാക്കി.

സിപിഎം പോലുള്ള ഒരു പാർട്ടിയിൽ നിന്ന് ഒരാളെ ഇങ്ങനെ ചെയ്യിക്കാൻ സാധിച്ചത് നിസ്സാര കാര്യമല്ല. അവരുടെ ചരിത്രത്തിൽ തന്നെ ഏറ്റവും വലിയ സങ്കടകരമായ കാര്യമാണ് നടന്നതെന്നും പിസി ജോർജ്ജ് പറഞ്ഞു.