പ്രവാസികള്ക്ക് അഭിമാനമായി ജീവകാരുണ്യപ്രവര്ത്തകനായ നാസ് വക്കം; പ്രവാസ സമൂഹത്തില് നിന്ന് അംഗീകാരം ലഭിക്കുന്ന ഒരേ ഒരു വ്യക്തി, ജാതി മത വര്ഗ ലിംഗ വ്യത്യാസമില്ലാതെ ദിവസവും ഇരുപതും മുപ്പതും മൃതദേഹങ്ങളാണ് മാറ്റിയത്
പ്രവാസികള്ക്ക് അഭിമാനമായി മാറി ജീവകാരുണ്യപ്രവര്ത്തകനായ നാസ് വക്കം. കോവിഡ് കാലത്തെ സേവന പ്രവര്ത്തനങ്ങള്ക്കാണ് സാമൂഹ്യ പ്രവര്ത്തകനും ലോക കേരളസഭ അംഗവുമായ നാസ് വക്കം എന്ന മനുഷ്യ സ്നേഹിയെ സൗദി ആരോഗ്യ മേഖല കോവിഡ് ക്ലസ്റ്റര് സെല് അഭിനന്ദിച്ചത്. കിഴക്കന് പ്രവിശ്യ കോവിഡ് ക്ലസ്റ്റര് സെല്ലിന്റെ തലവന് അബ്ദുള് അസീസ് അല് ഗാംദിയുടെ ഒപ്പോടുകൂടിയ സര്ട്ട് ഫിക്കറ്റ് കിഴക്കന് പ്രവിശ്യയിലെ മോര്ച്ചറി വിഭാഗം തലവന് ഫഹദ് അല് ഹാരിസി നാസിന് സമ്മാനിച്ചു.
കോവിഡിനെ ഭയന്ന് ആരും പുറത്തിറങ്ങാതിരുന്ന സമയം, ജാതി മത വര്ഗ ലിംഗ വ്യത്യാസമില്ലാതെ ദിവസവും ഇരുപതും മുപ്പതും മൃതദേഹങ്ങളാണ് മാറ്റിയിരുന്നത്. മോര്ച്ചറിയുടെ കീഴിലുള്ള 96 സ്റ്റോറേജുകളില് പകുതി കോവിഡിന്റെ ആദ്യ കാലങ്ങളില് തന്നെ രോഗം ബാധിച്ച് മരിച്ചവര്ക്കായി മാറ്റി വെച്ചിരുന്നു. ഇതിനായി ഇതില് സൂക്ഷിച്ചിരുന്ന മൃതദേഹങ്ങള് പ്രവിശ്യയിലെ വിവിധ ആശുപത്രികളിലേക്കും മാറ്റി. ഇതിന് വേണ്ടി ചുക്കാന് പിടിച്ചത് നാസ് വക്കമാണ്. നേപ്പാള്, ശ്രീലങ്ക, ബംഗ്ലാദേശ്, പാകിസ്ഥാന്, ഫിലിപ്പീന്സ്, തുടങ്ങിയ രാജ്യക്കാര്ക്ക് വേണ്ടിയും ഈ കാലത്ത് നാസ് പ്രവര്ത്തിച്ചിരുന്നു.
സൗദിയുടെ കിഴക്കന് പ്രവിശ്യയിലെ പ്രവാസികള്ക്ക് ഇദ്ദേഹത്തെ പരിചയപ്പെടുത്തേണ്ട ആവശ്യമില്ല. തന്റെ പതിനേഴാം വയസ്സില് താഴെത്തട്ടില് നിന്നും പ്രവാസ ജീവിതം ആരംഭിച്ച നാസ് ഇതിനോടകം തന്നെ നിരവധി ജീവകാരുണ്യ പ്രവര്ത്തനങ്ങള്ക്കും സാമൂഹിക പ്രവര്ത്തനങ്ങള്ക്കുമാണ് നേതൃത്വം നല്കിയത്. മൂന്നര പതിറ്റാണ്ട് കാലം ദമാം കേന്ദ്രീകരിച്ച് പ്രവര്ത്തിക്കുന്ന നാസിന്റെ ജീവകാരുണ്യ മേഖല അതിവിപുലമാണ്.
ഈ കാലയളവിനകത്ത് ആയിരക്കണക്കിന് പ്രവാസികളുടെ മൃതദേഹങ്ങളാണ് നാസ് വക്കം എന്ന മനുഷ്യസ്നേഹിയുടെ കൈകളിലൂടെ മറവു ചെയ്യപ്പെട്ടിട്ടുള്ളത്. ഇന്ത്യക്കാര്ക്ക് മാത്രമല്ല ലോകത്തെ വിവിധ രാജ്യങ്ങളില് ഉള്ളവര്ക്ക് ഇദ്ദേഹത്തിന്റെ സേവനം ലഭിച്ചിട്ടുണ്ട്. മതിയായ രേഖകളില്ലാത്ത നിരവധി പേര് ഇദ്ദേഹത്തിന്റെ കാരുണ്യത്താല് എക്സിറ്റ് അടിച്ചു നാടണഞ്ഞു. നാസിന്റെ പ്രവര്ത്തനങ്ങള് തിരിച്ചറിഞ്ഞ അധികാരികളും പൂര്ണ്ണ പിന്തുണയേകി നാസിനൊപ്പമുണ്ട്. ഏറെ കുരുക്കു പിടിച്ച പല കേസുകളും റിയാദിലെ ഇന്ത്യന് എംബസിയിലെത്തിയാല് അത് നേരെ ദമാമിലേയ്ക്ക് അയയ്ക്കുകയും ശേഷം നാസ് വക്കത്തിനെ ചുമതലപ്പെടുത്തുകയും ചെയ്യുന്ന ഉദ്യോഗസ്ഥരുണ്ട്.
പ്രവാസികള്ക്കിടയില് 'മയ്യിത്തുക്കളുടെ മിത്രം' എന്നാണ് നാസ് അറിയപ്പെടുന്നത്. പലരും തമാശ രൂപേണ അങ്ങനെ വിളക്കുമ്പോഴും അതില് പരിഭവം ഒന്നുമില്ലാതെ തന്നെ തന്റെ കര്മ്മം ഭംഗിയായി നിര്വഹിക്കുകയാണ് നാസ്.
https://www.facebook.com/Malayalivartha
