ഇന്ത്യക്കാരുടെ കരണത്തടിക്കുന്ന തീരുമാനവുമായി ഒമാന്‍. പ്രവേശനവിലക്ക് ഒമാന്‍ അനിശ്ചിതകാലത്തേക്ക് നീട്ടിയിരിക്കുകയാണ്. പുതിയൊരു അറിയിപ്പുണ്ടാകുന്നതുവരെ വിലക്ക് തുടരുമെന്ന് സുപ്രീം കമ്മിറ്റി ബുധനാഴ്ച അറിയിച്ചു.

ഇന്ത്യക്ക് പുറമെ പാകിസ്താന്‍, ബംഗ്ലാദേശ്, ഈജിപ്ത്, സുഡാന്‍, ലെബനന്‍, സൗത്ത് ആഫ്രിക്ക, ടാന്‍സാനിയ എന്നീ രാജ്യങ്ങളില്‍നിന്നുള്ളവര്‍ക്കും പ്രവേശനവിലക്ക് തുടരും. തായ്ലാന്‍ഡ്, മലേഷ്യ, വിയറ്റ്നാം എന്നിവിടങ്ങളില്‍നിന്നുള്ളവര്‍ക്ക് ജൂണ്‍ അഞ്ചുമുതല്‍ പ്രവേശനവിലക്ക് പ്രാബല്യത്തില്‍ വരും.

രാജ്യത്തെ താമസക്കാര്‍ക്കും സ്വദേശികള്‍ക്കും കോവിഡ് നിയന്ത്രണങ്ങളില്‍ കൂടുതല്‍ ഇളവുകള്‍ പ്രഖ്യാപിച്ചിട്ടുണ്ട്.


ഒമാനില്‍ കോവിഡ് നിയന്ത്രണങ്ങളില്‍ കൂടുതല്‍ ഇളവുകള്‍ പ്രഖ്യാപിച്ചു. 12 വയസ്സിന് താഴെയുള്ള കുട്ടികള്‍ക്ക് ഇനിമുതല്‍ ഷോപ്പിങ് മാളുകളില്‍ പ്രവേശിക്കാം. കൂടാതെ പള്ളികളില്‍ 100 പേര്‍ക്കുവരെ ഒരേസമയം പ്രവേശിക്കാന്‍ അനുവദിക്കും. അഞ്ച് നേരത്തെ നിസ്‌കാര സമയങ്ങളിലായിരിക്കും പ്രവേശനം അനുവദിക്കുക. എന്നാല്‍ ജുമുഅക്ക് അനുമതിയുണ്ടാവില്ല.

വാണിജ്യസ്ഥാപനങ്ങളില്‍ രാത്രികാലങ്ങളില്‍ ഏര്‍പ്പെടുത്തിയിരുന്ന പ്രവേശനവിലക്കും നീക്കി. കഫേ, ഹോട്ടല്‍ എന്നിവിടങ്ങളില്‍ 50 ശതമാനംപേര്‍ക്ക് പ്രവേശിക്കാം. കര അതിര്‍ത്തിവഴി സ്വദേശികള്‍ക്കും താമസക്കാരായ വിദേശികള്‍ക്കും തൊഴില്‍സംബന്ധിയായ കാര്യങ്ങള്‍ക്കായി ദിവസവും യാത്രചെയ്യാം.

ജിമ്മുകള്‍ 50 ശതമാനം ശേഷിയില്‍ തുറക്കാം. വിവിധതരം എക്‌സിബിഷനുകള്‍, വിവാഹഹാളുകള്‍ എന്നിവ 30 ശതമാനം ശേഷിയില്‍ പ്രവര്‍ത്തിക്കാം. പൊതുബീച്ചുകളും പാര്‍ക്കുകളും പൊതുജനങ്ങള്‍ക്കായി തുറക്കാനും സുപ്രീം കമ്മിറ്റി അനുമതി നല്‍കി.