ഇന്ത്യയില്‍ ഇപ്പോള്‍ വിതരണം ചെയ്യുന്ന കോവിഷീല്‍ഡ് വാക്‌സിന് സൗദി ആരോഗ്യ മന്ത്രാലയം അംഗീകാരം നല്‍കിയിരിക്കുകയാണ്.

സൗദി അംഗീകാരമുള്ള വാക്‌സിനുകളിലൊന്നായ അസ്ട്രസെനക്ക വാക്‌സിന് സമാനമാണ് കോവിഷീല്‍ഡ് വാക്‌സിനെന്ന് സൗദി അധികൃതര്‍ ചൂണ്ടിക്കാണിക്കുന്നു. സൗദിയിലെ ഇന്ത്യന്‍ എംബസിയാണ് ഇക്കാര്യം അറിയിച്ചത്. പ്രവാസികള്‍ക്ക് ഏറെ ആശ്വാസകരമാകുന്ന ഈ തീരുമാനത്തോടെ കോവിഷീല്‍ഡ് വാക്‌സിനെടുത്ത് സൗദിയിലെത്തുന്ന ഇന്ത്യന്‍ പ്രവാസികള്‍ക്ക് ക്വാറന്റീനില്ലാതെ രാജ്യത്ത് പ്രവേശിക്കാന്‍ സാധിക്കും എന്നത് മറ്റൊരു നേട്ടമാണ്.

ഇന്ത്യയുള്‍പ്പെടെയുള്ള രാജ്യങ്ങളില്‍നിന്ന് സൗദിയിലേക്ക് നേരിട്ടുള്ള പ്രവേശനം ഇപ്പോള്‍ സാധ്യമല്ല. പക്ഷേ മറ്റ് രാജ്യങ്ങളിലൂടെ ഇന്ത്യക്കാര്‍ സൗദിയിലെത്തുന്നുണ്ട്. ആരോഗ്യമന്ത്രാലയം അംഗീകരിച്ച വാക്‌സിനുകളില്‍ ഏതെങ്കിലും സ്വീകരിച്ചവര്‍ക്ക് ക്വാറന്റീന്‍ വേണ്ടെന്ന് സൗദി അറിയിച്ചിരുന്നു.

എന്നാല്‍ ഇന്ത്യയിലെ സിറം ഇന്‍സ്റ്റിറ്റ്യൂട്ട് അസ്ട്രസെനക്കയുമായി ചേര്‍ന്ന് നിര്‍മിക്കുന്ന വാക്‌സിന് കോവിഷീല്‍ഡ് എന്ന് പേരായത് സൗദി അംഗീകരിച്ചിരുന്നില്ല. ഇന്ത്യന്‍ എംബസി അധികൃതര്‍ ഇടപെട്ടാണ് രണ്ട് വാക്‌സിനുകളും അംഗീകരിക്കപ്പെടുന്നത്. അസ്ട്രസെനക്ക കൂടാതെ ഫൈസര്‍, മൊഡേണ, ജോണ്‍സണ്‍ ആന്‍ഡ് ജോണ്‍സണ്‍ എന്നിവയാണ് സൗദി അംഗീകരിച്ച മറ്റു വാക്‌സിനുകള്‍.

അതേസമയം സൗദി അറേബ്യയിലെ 98 ശതമാനം ആരോഗ്യ പ്രവര്‍ത്തകര്‍ക്കും കോവിഡ് -19 വാക്‌സിനുകള്‍ ലഭിച്ചതായി സൗദി ആരോഗ്യ മന്ത്രാലയം അറിയിച്ചു. തത്തമ്മന്‍ ക്ലിനിക്കുകളിലെയും താക്കദ് സെന്ററുകളിലെയും 93 ശതമാനം ആരോഗ്യ പ്രവര്‍ത്തകര്‍ക്ക് പ്രതിരോധ കുത്തിവെയ്പ് നല്‍കിയതായും മന്ത്രാലയം അറിയിച്ചു.

കോവിഡ് -19 പാന്‍ഡെമിക്കിനെ പ്രതിരോധിക്കാനുള്ള ശ്രമങ്ങളിലാണ് സൗദി അറേബ്യ. ആരോഗ്യസംരക്ഷണ സംവിധാനത്തെ പരിരക്ഷിക്കുന്നതിനും മെച്ചപ്പെടുത്തുന്നതിനുമുള്ള ശ്രമങ്ങളുടെ പ്രതിഫലമായാണ് ആരോഗ്യസംരക്ഷണ തൊഴിലാളികള്‍ക്ക് പ്രതിരോധ കുത്തിവയ്പ്പ് നല്‍കുന്നതെന്നും മന്ത്രാലയം അറിയിച്ചു.




കൊറോണ വൈറസ് വാക്‌സിനുകള്‍ ലഭിച്ച ആരോഗ്യസംരക്ഷണ ഉദ്യോഗസ്ഥരുടെ എണ്ണം മൊത്തം 82% കവിഞ്ഞതായി മന്ത്രാലയം കൂട്ടിച്ചേര്‍ത്തു.

സൗദി അറേബ്യയിലുടനീളം 590 ലധികം വാക്‌സിനേഷന്‍ കേന്ദ്രങ്ങളിലൂടെ 14 ദശലക്ഷത്തിലധികം പൗരന്മാര്‍ക്കും പ്രവാസികള്‍ക്കും കൊറോണ വൈറസ് വാക്‌സിനേഷന്‍ ലഭിച്ചുവെന്നും സൗദി ആരോഗ്യ മന്ത്രാലയം അറിയിച്ചു.