യുഎസില്‍ ഇന്ത്യന്‍ വിദ്യാര്‍ത്ഥിയെ അജ്ഞാതന്‍ വെടിവച്ച് കൊലപ്പെടുത്തി
യുഎസില്‍ ഇന്ത്യന്‍ വിദ്യാര്‍ത്ഥി അജ്ഞാതന്റെ വെടിയേറ്റു മരിച്ചു. ഹൈദരാബാദ് സ്വദേശിയായ ചന്ദ്രശേഖര്‍ പോള്‍ (26) ആണ് കൊല്ലപ്പെട്ടത്. യുഎസിലെ ഡാലസിലെ ഒരു പെട്രോള്‍ പമ്പില്‍ പാര്‍ട്‌ടൈമായി ജോലി ചെയ്തു വരികയായിരുന്നു ചന്ദ്രശേഖര്‍. വെള്ളിയാഴ്ച രാത്രി പമ്പില്‍ ജോലി ചെയ്യുന്നതിനിടെയാണ് അജ്ഞാതന്‍ പോളിനെ വെടിവച്ച് കൊലപ്പെടുത്തിയത്.
പോള്‍ ഹൈദരാബാദില്‍ ഡെന്റല്‍ സര്‍ജറിയില്‍ ബിരുദം നേടിയിരുന്നു. 2023ലാണ് ഉപരിപഠനത്തിനായി യുഎസിലേക്ക് എത്തിയത്. ആറ് മാസം മുമ്പ് ബിരുദാനന്തര ബിരുദവും നേടി. ഒരു സ്ഥിരജോലിയ്ക്കായുള്ള അന്വേഷണത്തിലായിരുന്നു പോള്‍. പോളിന്റെ മൃതദേഹം എത്രയും വേഗം നാട്ടിലെത്തിക്കാന്‍ സര്‍ക്കാരിന്റെ സഹായം തേടിയിരിക്കുകയാണ് കുടുംബം.
ബിആര്‍എസ് എംഎല്‍എ സുധീര്‍ റെഡ്ഡിയും മുന്‍ മന്ത്രി ടി.ഹരീഷ് റാവുവും ഹൈദരാബാദിലെ വീട് സന്ദര്‍ശിക്കുകയും കുടുംബാംഗങ്ങളോട് സംസാരിക്കുകയും ചെയ്തു. വലിയ ഉയരങ്ങളില്‍ എത്തുമെന്ന് അവര്‍ വിശ്വസിച്ചിരുന്ന മകന്‍ ഇനി ഇല്ലെന്ന് അറിയുമ്പോള്‍ മാതാപിതാക്കള്‍ അനുഭവിക്കുന്ന വേദന ഹൃദയം തകര്‍ക്കുന്നതാണെന്ന് റാവു പറഞ്ഞു. ചന്ദ്രശേഖറിന്റെ ഭൗതിക ശരീരം എത്രയും വേഗം ജന്മനാട്ടില്‍ എത്തിക്കാന്‍ സംസ്ഥാന സര്‍ക്കാര്‍ മുന്‍കൈയെടുക്കണമെന്ന് അദ്ദേഹം ആവശ്യപ്പെട്ടു.
https://www.facebook.com/Malayalivartha
