അധികാരത്തിന്റെ പ്രൗഢിയേക്കാൾ വലിയത് സ്നേഹത്തിന്റെ ലളിതമായ തലോടലാണെന്ന് ഒരിക്കൽ കൂടി തെളിയിച്ച് ദുബായ് ഭരണാധികാരി ഷെയ്ഖ് മുഹമ്മദ് ബിൻ റാഷിദ് അൽ മക്തൂം. സമൂഹമാധ്യമത്തിൽ വൈറലായ ഒരു ഹ്രസ്വവിഡിയോയിലൂടെ ലോകത്തിന്റെയാകെ ഹൃദയം കവരുകയാണ് അദ്ദേഹം ഒരു കൊച്ചുബാലികയോട് കാണിച്ച ഈ വാത്സല്യം.

ദുബായിലെ ഒരു കഫേയിൽ അപ്രതീക്ഷിതമായാണ് ലബനീസ് ടെലിവിഷൻ അവതാരകൻ വിസാം ബ്രെയ്ദിയുടെ മകൾ ബെല്ല മരിയയെ ഷെയ്ഖ് മുഹമ്മദ് കണ്ടുമുട്ടിയത്. നിഷ്കളങ്കമായ ചിരിയോടെ കുഞ്ഞിനോട് പേര് ചോദിച്ച അദ്ദേഹം തന്നെയറിയാമോ എന്ന സ്നേഹാന്വേഷണത്തിന് കൃത്യമായ മറുപടി കേട്ടപ്പോൾ വാത്സല്യപൂർവം അവളുടെ കവിളിൽ ചുംബിക്കുകയായിരുന്നു.

നിമിഷങ്ങൾ മാത്രം നീണ്ടുനിന്ന ഈ കൂടിക്കാഴ്ച സ്നേഹത്തിന്റെയും ലാളിത്യത്തിന്റെയും ഉത്തമ ഉദാഹരണമായി മാറി. പ്രോട്ടോക്കോളുകളുടെ അതിർവരമ്പുകളില്ലാതെ സാധാരണക്കാരോടും കുട്ടികളോടും ഷെയ്ഖ് മുഹമ്മദ് പുലർത്തുന്ന ഈ ഹൃദയബന്ധം പ്രവാസികളടക്കമുള്ള വലിയൊരു ജനവിഭാഗത്തിന്റെ പ്രശംസ പിടിച്ചുപറ്റുകയാണ്.

ഭരണാധികാരി എന്നതിലുപരി ഒരു പിതാവിന്റെയും മുത്തച്ഛന്റെയും വാത്സല്യത്തോടെയുള്ള ആ ഇടപെടൽ സോഷ്യൽ മീഡിയയിൽ ലക്ഷക്കണക്കിന് ആളുകളാണ് ഇതിനകം ഏറ്റെടുത്തത്. സ്നേഹത്തിന് ഭാഷയോ പദവിയോ തടസ്സമല്ലെന്ന് വീണ്ടും ഓർമിപ്പിക്കുന്നതായിരുന്നു ഈ ഹൃദയസ്പർശിയായ നിമിഷം.