പെരുവണ്ണാമൂഴി സെക്‌സ് റാക്കറ്റ്‌ കേസിലെ മൂന്ന്‌ പ്രതികളെ ദോഹയില്‍ പിടികൂടി. അന്‍സാര്‍ , സുബൈര്‍ , ഷാഫി എന്നിവരെയാണ്‌ ദോഹയിലെ മലയാളികള്‍ പിടികൂടി തടഞ്ഞുവെച്ചിരിക്കുന്നത്‌. പെരുവണ്ണാമൂഴി സംഭവം വാര്‍ത്തയാതോടെയാണ്‌ മുഖ്യപ്രതികളെന്ന്‌ സംശയിക്കുന്ന മൂന്നുപേര്‍ വിദേശത്തേക്ക്‌ കടന്നത്‌. ഇവരുടെ ചിത്രങ്ങള്‍ ഉള്‍പ്പെടെയുള്ള വിവരങ്ങള്‍ ഫേയ്‌ബുക്ക്‌ ഉള്‍പ്പെടെയുള്ള സോഷ്യല്‍ നെറ്റ്‌വര്‍ക്കുകളിലൂടെ പ്രചരിച്ചതാണ്‌ പ്രതികളെ തിരിച്ചറിയാന്‍ സഹായകമായത്‌.

സെക്‌സ് റാക്കറ്റുമായി ബന്ധപ്പെട്ട്‌ ചങ്ങരോത്ത്‌ ആവടുക്ക സ്വദേശികളായ കപ്പള്ളിക്കണ്ടി വീട്ടില്‍ അരുണ്‍ നാരായണന്‍ (23), വലിയപ്പുരക്കല്‍ മുബീഷ്‌ തങ്കപ്പന്‍ എന്ന പ്രജീഷ്‌ (26), കവുങ്ങളുള്ള ചാലില്‍ അശ്വിന്‍ ചന്ദ്രന്‍ (22), തണ്ടോറപ്പാറ സ്വദേശി കുന്നോത്ത്‌ മീത്തല്‍ സുജിത്ത്‌ കുഞ്ഞിക്കണ്ണന്‍ (26) എന്നിവരെ ഡിവൈ.എസ്‌.പി വി.പി. സുരേന്ദ്രന്റെ നേതൃത്വത്തിലുള്ള അന്വേഷണ സംഘം അറസ്‌റ്റ് ചെയ്‌തിരുന്നു.

പെണ്‍വാണിഭ സംഘത്തിലെ ഇടനിലക്കാരിയായ കളമുള്ളപറമ്പില്‍ സറീനയെ കോഴിക്കോട്‌ സെഷന്‍സ്‌കോടതി റിമാന്റ്‌ ചെയ്‌തിരിക്കുകയാണ്‌. ഇതിനിടെ നാദാപുരം ഡിവൈ.എസ്‌.പി വി.പി. സുരേന്ദ്രനെ മാറ്റി റൂറല്‍ എസ്‌.പി അഷ്‌റഫാണ്‌ ഇപ്പോള്‍ കേസ്‌ അന്വേഷിക്കുന്നത്‌.

പെണ്‍വാണിഭ സംഘത്തിന്റെ വലയിലകപ്പെട്ട പടത്തുകടവ്‌ സ്‌കൂള്‍ പത്താം ക്ലാസ്‌ വിദ്യാര്‍ഥിനി കഴിഞ്ഞ ആഗസ്‌റ്റ് 17നാണ്‌ ആത്മഹത്യ ചെയ്‌തത്‌. നേരത്തെ അറസ്‌റ്റിലായ നാലു യുവാക്കളും മരിച്ച പെണ്‍കുട്ടിയേയും ആത്മഹത്യക്ക്‌ ശ്രമിച്ച പെണ്‍കുട്ടിയേയും പീഡിപ്പിച്ചതായാണ്‌ പൊലീസ്‌ പറയുന്നത്‌.