ഷാര്‍ജയില്‍ നിന്ന് മത്സ്യബന്ധനത്തിന് പോയ 3 ഇന്ത്യക്കാരെ കാണാനില്ല; സമുദ്രാതിര്‍ത്തി കടന്നുണ്ടാവുമോ എന്ന ആശങ്കയില്‍ ബന്ധുക്കള്‍
ഷാര്‍ജയില്‍ നിന്ന് മത്സ്യബന്ധനത്തിന് പോയ മൂന്ന് ഇന്ത്യന്‍ തൊഴിലാളികള്‍ ഒരാഴ്ചയിലേറെയായിട്ടും തിരിച്ചെത്തിയില്ല. തമിഴ് നാട് കന്യാകുമാരി പുത്തന്‍തുറൈ സ്വദേശി റോബര്‍ട്, കേശവന്‍ പുത്തന്‍തുറൈ സ്വദേശി സെല്‍വന്‍, തിരുനല്‍വേലി കൂത്തന്‍കുഴി സ്വദേശി വിയഗുലം എന്നിവരെയാണ് കാണാതായത്. ഇവര്‍ ഈ മാസം രണ്ടിന് ഷാര്‍ജയില്‍ തിരിച്ചെത്തേണ്ടവരായിരുന്നു. ഇവരുടെ കൂടെ, ഒരു യുഎഇ സ്വദേശിയുണ്ടായിരുന്നതായും പറയുന്നു. യുഎഇയില്‍ മത്സ്യബന്ധനത്തിന് പോകുമ്പോള്‍ ഒരു സ്വദേശിയുണ്ടായിരിക്കണമെന്നത് നിര്‍ബന്ധമാണ്.
എത്ര ദിവസം മുന്‍പാണ് ഇവര്‍ ഷാര്‍ജയില്‍ നിന്ന് യാത്ര തിരിച്ചതെന്ന് തിരിച്ചറിഞ്ഞിട്ടില്ല. സാധാരണ ഗതിയില്‍ മത്സ്യബന്ധനത്തിന് പോയാല്‍ മീനിന്റെ ലഭ്യതയ്ക്കനുസരിച്ചാണ് തിരിച്ചുവരാറ്. കൂടിപ്പോയാല്‍ അഞ്ച് ദിവസത്തിനകം എത്താറുണ്ടെന്ന് ഈ മേഖലയില്‍ ജോലി ചെയ്യുന്നവര്‍ പറയുന്നു. ഇവരുടെ ബോട്ട് അബദ്ധത്തില്‍ യുഎഇ സമുദ്രാതിര്‍ത്തി കടന്നു ഇറാന്‍ അധികൃതരുടെ കസ്റ്റഡിയിലായിരിക്കുമോ എന്നാണ് ബന്ധുക്കളുടെ ആശങ്ക. മാതാപിതാക്കളും ഭാര്യയും കുട്ടികളുമടങ്ങുന്ന ഇവരുടെ കുടുംബം കണ്ണീരിലും പ്രാര്‍ഥനയിലുമാണ് കഴിയുന്നത്.
എന്നാല്‍, മത്സ്യത്തൊഴിലാളികളുടെ ബോട്ട് കടല്‍ക്ഷോഭത്തില്‍ പെട്ടുപോയിരിക്കാനുള്ള സാധ്യത തള്ളിക്കളയാനാവില്ലെന്ന് ഇതുസംബന്ധിച്ച് അധികൃതര്‍ക്ക് പരാതി നല്‍കിയ ഇന്റര്‍നാഷനല്‍ ഫിഷര്‍മെന്‍ ഡെവലപ്‌മെന്റ് ട്രസ്റ്റ്(ഇന്‍ഫിഡെറ്റ്) സ്ഥാപക പ്രസിഡന്റ് ജസ്റ്റിന്‍ ആന്റണി മനോരമയോട് പറഞ്ഞു. കേന്ദ്ര വിദേശ കാര്യമന്ത്രി സുഷമാ സ്വരാജ്, യുഎഇയിലെ ഇന്ത്യന്‍ സ്ഥാനപതി ടി.പി.സീതാറാം, ഇറാനിലെ ഇന്ത്യന്‍ സ്ഥാനപതി ഇ.സൗരഭ് കുമാര്‍, തമിഴ്‌നാട് മുഖ്യമന്ത്രി ജയലളിത തുടങ്ങിയവര്‍ക്കാണ് ഇദ്ദേഹം പരാതി നല്‍കിയത്.
https://www.facebook.com/Malayalivartha
