തായിഫ് (സൗദി അറേബ്യ): ബനീമാലിക്ക് സയ്യാദയിലെ പെട്രോള്‍ പമ്പ് ജീവനക്കാരനായ മലയാളിയെ  ജോലിക്കിടെ കൊല്ലപ്പെട്ടകേസില്‍ പ്രതി അറസ്റ്റില്‍. സമീപത്തെ പമ്പില്‍ ജോലി നോക്കുന്ന ബംഗ്ലാദേശ് സ്വദേശിയാണ് പൊലീസ് പിടിയിലായത്.

തിരുവനന്തപുരം കിളിമാനൂര്‍ മഞ്ഞപ്പാറ ചാരുവിള വീട്ടില്‍ ഹുസൈനെ(47)യാണ്  നവംബര്‍ 29ന് കൊല്ലപ്പെട്ടനിലയില്‍ കണ്ടെത്തിയത്. പിടിയിലായ ബംഗ്ലാദേശ് സ്വദേശി ജോലി നോക്കുന്ന പമ്പും ഹുസൈന്റെ സ്‌പോണ്‍സറുടെ ഉടമസ്ഥതയിലുള്ളതാണ്. 

കൊലപാതകം നടന്ന സ്ഥലത്ത് പ്രതിയെ എത്തിച്ച് കഴിഞ്ഞ ദിവസം തെളിവെടുപ്പ് നടത്തി. കൃത്യം നടത്തിയ രീതി അന്വേഷണോദ്യോഗസ്ഥര്‍ക്ക് പ്രതി കാണിച്ചു കൊടുത്തു. നവംബര്‍ 29ന് വെള്ളിയാഴ്ച പുലര്‍ച്ചെ ഹുസൈന്‍ ജോലിനോക്കുന്ന പെട്രോള്‍ പമ്പിലെത്തിയാണ് പ്രതി കൊലപാതകം നടത്തിയത്. മഴു ഉപയോഗിച്ച് പ്രതി തലക്ക് വെട്ടുകയായിരുന്നു.

ആക്രമണത്തില്‍ തലതകര്‍ന്ന് രക്തം വാര്‍ന്നനിലയിലായിരുന്നു മൃതദേഹം. കൃത്യത്തിനുപയോഗിച്ച ആയുധം കണ്ടെടുത്തിട്ടുണ്ടെന്നും പ്രതിയെ വിശദമായി ചോദ്യം ചെയ്തുവരികയാണെന്നും പൊലീസ് മേധാവി കേണല്‍ തുര്‍ക്കി അല്‍ശഹ്‌രി പറഞ്ഞു. അന്വേഷണത്തിന്റെ ഭാഗമായി സമീപത്തുള്ള ഒട്ടേറെ പേരെ പൊലീസ് ചോദ്യംചെയ്തിരുന്നു. 14 വര്‍ഷമായി ഹുസൈന്‍ ഈ പമ്പില്‍ ജോലിനോക്കിവരുന്നു. ബംഗ്ലാദേശ് സ്വദേശിയും തൊട്ടടുത്തുള്ള പമ്പില്‍ 17 വര്‍ഷത്തോളമായി ജോലിനോക്കുകയാണ്. 

ഒന്നര വര്‍ഷം മുമ്പാണ് ഹുസൈന്‍ അവസാനമായി നാട്ടില്‍ അവധിക്ക് പോയിവന്നത്. തായിഫ് കിംഗ് ഫൈസല്‍ ആസ്പത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം നാട്ടിലെത്തിച്ച് മറവ് ചെയ്യുന്നതിനുള്ള നടപടിക്രമങ്ങള്‍ പുരോഗമിച്ച് വരുന്നതായി നിയമസഹായത്തിന് രംഗത്തുള്ള കെ.എം.സി.സി നേതാവും കോണ്‍സുലേറ്റ് സാമൂഹിക ക്ഷേമസമിതി പ്രതിനിധിയുമായ മുഹമ്മദ് സാലി പറഞ്ഞു. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha