ദുബായിലെ പാര്പ്പിടസമുച്ചയത്തില് പാചകവാതക സിലിണ്ടര് പൊട്ടിത്തെറിച്ച് ഇന്ത്യക്കാര്ക്ക് ഗുരുതര പരുക്ക്
അല്ഖൂസ് അല്ഖേല് ഗെയ്റ്റിലെ പാര്പ്പിട സമുച്ചയത്തില് പാചകവാതക സിലിണ്ടര് പൊട്ടിത്തെറിച്ചു ഇന്ത്യക്കാരായ യുവതിക്കും കുട്ടിക്കും ഗുരുതര പരുക്കേറ്റു. ഫേസ് ഒന്നിലെ 39ാം കെട്ടിടത്തില് അഞ്ചാം നിലയിലെ അപാര്ട്മെന്റില് ഇന്ന്(ബുധന്) രാവിലെ പതിനൊന്നരയോടെയായിരുന്നു സംഭവം. ഉഗ്രശബ്ദത്തോടെയുണ്ടായ പൊട്ടിത്തെറിയില് ഫ്ളാറ്റിന്റെ ചുമരുകള് തകര്ന്നു. ഫ്ലാറ്റിലുണ്ടായിരുന്ന കുടുംബത്തിനാണ് പരുക്കേറ്റത്. ഉടന് സ്ഥലത്തെത്തിയ പൊലീസും സിവില്ഡിഫന്സും രക്ഷാ പ്രവര്ത്തനം നടത്തി.
പരുക്കേറ്റവരെ റാഷിദ് ആശുപത്രിയിലെ തീവ്രപരിചരണ വിഭാഗത്തിലേക്ക് മാറ്റി. ഇവരുടെ നില അതീവ ഗുരുതരമാണെന്നാണ് ഏറ്റവും ഒടുവില് ലഭിച്ച റിപ്പോര്ട്ട്. കെട്ടിടത്തിലെ വൈദ്യുതി ബന്ധം വിച്ഛേദിക്കുകയും താമസക്കാരെ ഒഴിപ്പിക്കുകയും ചെയ്തു. കെട്ടിട അവശിഷ്ടങ്ങള്ക്കിടയില് കുടുങ്ങിക്കിടന്ന നിലയിലായിരുന്നു യുവതിയും കുട്ടിയുമെന്ന് ദുബായ് പൊലീസ് സേര്ച്ച് ആന്ഡ് റെസ്ക്യു വിഭാഗം ഡെപ്യുട്ടി ഡയറക്ടര് ലഫ്.കേണല് അഹമ്മദ് ബുര്ഖിബ പറഞ്ഞു. അവശിഷ്ടങ്ങള് നീക്കം ചെയ്താണ് ഇവരെ പുറത്തെടുത്തത്.
വന് ശബ്ദം കേട്ട് ഞെട്ടിവിറച്ച തങ്ങള് ഉടന് കെട്ടിടത്തില് നിന്ന് ഇറങ്ങിയോടുകയായിരുന്നുവെന്ന് ഇതേ കെട്ടിടത്തിലെയും സമീപത്തുള്ളവയിലെയും താമസക്കാര് പറഞ്ഞു. പരുക്കേറ്റവരെക്കുറിച്ചുള്ള കൂടുതല് വിവരങ്ങള് പൊലീസ് പുറത്തുവിട്ടിട്ടില്ല. മലയാളികളടക്കം ആയിരക്കണക്കിന് കുടുംബങ്ങള് താമസിക്കുന്ന കെട്ടിട സമുച്ചയമാണ് അല് ഖായില് ഗെയ്റ്റ്.
https://www.facebook.com/Malayalivartha
